Read Te Tusi Tapu I Te Gana Tuvalu Lomiga Lua ESOTO 39 Bible Online

ESOTO 39 - Te Tusi Tapu I Te Gana Tuvalu Lomiga Lua bible

ESOTO 39

¹Ne faite ne latou a gatu gali mo faitaulaga ki te vulu lanu usi, kulakula, mo te lanu kula, ke 'pei ki ei i te taimi e galue ei a latou i loto i te Potu Tapu. Ne fai ne latou a gatu fakafaitaulaga mo Alona, e pela eiloa mo te fakatonuga a te Aliki ki a Mose.

²Ne sui ne latou a te efota ki laugatu lino gali fakatasi mo te vulu lanu usi, lanu kulakula, mo te kula, mo te filo aulo.

³Ne tuki foki ne latou te aulo ke manifinifi kae isiisi ne latou fakalauliki, laga ei ne latou ki loto i te laugatu lino gali mo vulu lanu usi, kulakula, mo te lanu kula.

⁴Ne faite foki ne latou a pakave e lua kae sui atu ki feitu takitasi o te efota, ko te mea ke mafai o fakamau a te efota ki ei.

⁵A te fusi, tela ne laga foki ki mea ne laga ki ei a te efota, ne soko atu ki te efota ko te mea ke pela me se mea e tasi, e pela mo te fakatonuga a te Aliki ki a Mose.

⁶Ne fakatoka ne latou a fatu kaneli kae fakamau ki tulaga aulo o latou. I luga o fatu kaneli konei ne ta ei ne latou a igoa o tama a Iakopo e tinoagafulu mo te tokolua.

⁷Ne fakamau ne latou a fatu kaneli ki pakave o te efota e fakaasi ei matakaiga o Isalaelu e sefulu lua, e pela eiloa mo te fakatonuga a te Aliki ki a Mose.

⁸Ne fai foki ne latou a te ufi fatafata ki mea foki kola ne fai ki ei a te efota fakatasi mo suiga fakagaligali kola e tai pau eiloa mo suiga fakagaligali o te efota.

⁹A te ufi fatafata e pau lei ana feitu e fa kae e fetulua, e luasefulu lua senitimita te loa kae luasefulu lua foki senitimita te lauefa.

¹⁰I luga o te ufi fatafata ne fakamau ne latou ki ei e fa laina o fatu taua, i te laina muamua ko te lupi, te topasi, mo te kaneti;

¹¹i te lua o laina, ko te emela, te safaila, mo te taemani,

¹²i te tolu o laina, ko te takosi, te akate, mo te emesita,

¹³kae i te fa o laina, ko te pelila, te kaneli, mo te iasepi. A fatu taua konei ne fakamau ki tulaga aulo o latou.

¹⁴I fatu taua konei takitasi, ko oti ne ta ki ei igoa o tamaliki a Iakopo, e fakaasi ei a matakaiga o Isalaelu e sefulu lua.

¹⁵Kae ne faite ne latou ne filifili mai te tina aulo mo te ufi fatafata, kae ne fili eiloa ne latou ke pela me ne kafa.

¹⁶Ne faite foki ne latou e lua tulaga aulo mo mama aulo e lua kae fakamau ne latou a mama e lua ki mata tulimanu tafa ki luga o te ufi fatafata.

¹⁷Sai ei ne latou a mata e lua o filifili aulo e lua ki mama aulo e lua,

¹⁸kae sai foki a nisi mata e lua o filifili aulo ki tulaga aulo e lua, kae i te faiga tenei ko fakamau ne latou mai mua o pakave o te efota.

¹⁹Ne faite foki ne latou ne mama aulo e lua kae fakamau atu ki mata tulimanu tafa ki lalo o te ufi tafatafa, i te feitu ki loto tela e tafa ki te efota.

²⁰Ne toe faite ne latou ne mama aulo e lua kae fakamau mai lalo, i mua o pakave e lua o te efota, e pili ki te matatuiga kae mai luga faeloa o te fusi.

²¹E pela mo te fakatonuga a te Aliki ki a Mose, ne sai ei ne latou a mama o te ufi fatafata ki mama o te efota ki te filo lanu usi, ko te mea ko te ufi fatafata ke moe tonu mai luga o te fusi kae ke se matagataga.

²²A te gatu loa tela e loa atu i te efota ne faite katoa ki te vulu lanu usi.

²³Ko te ua o te gatu ne fakamalosigina ki se lagaga fakatamilo ko te mea ke se masae gofie.

²⁴A kapakapa ki lalo o te gatu loa ne sui fakatamilo ne latou ki ei a ata o fuagalakau o te pomekalanite ki te laugatu lino gali mo te vulu lanu usi, lanu kulakula mo te kula, kae fakavasavasa ki 'pele aulo, e pela eiloa mo te fakatonuga a te Aliki ki a Mose.

²⁷Ne sui ne latou a tilima mo Alona mo ana tamaliki tagata,

²⁸mo te laugatu sai o te ulu, mo pulou mo tivae lino,

²⁹mo te fusi laugatu e laga ki lino gali mo vulu lanu usi, kulakula mo te lanu kula kae fakagaligali ki suisuiga fakagaligali, e pela eiloa mo te fakatonuga a te Aliki ki a Mose.

³⁰Ne faite ne latou se mea ki te tina aulo, kae tusi i ei a pati konei, “Ko fakatapu mo te Aliki.”

³¹Fakamau ei ne latou ki te koga i mua o te pulou ki te uka lanu usi e pela eiloa mo te fakatonuga a te Aliki ki a Mose.

³²A galuega katoa i te faitega o te Faleie o te Aliki ne fakapalele lei eiloa. A tino Isalaelu ne faite ne latou a mea katoa o te Faleie, e pela eiloa mo te fakatonuga a te Aliki ki a Mose.

³³Ne avatu ne latou ki a Mose a te Faleie mo ana mea katoa, ko ana pine fakalave, ko te foitino fale, ko talava fiti, ko ana pou mo ona tulaga;

³⁴ko te ufi pakili mamoe lanu kula, mo te ufi pakili manu malosi, mo te laugatu pui,

³⁵mo te Pusa o te Feagaiga tela e fao i ei a papa fatu, mo ana amo, mo tena pono;

³⁶mo te taipola mo ana mea katoa, mo te falaoa e ofo atu ki te Atua;

³⁷mo te tulaga moli aulo fakatasi mo ana moli mo ana mea katoa, mo te sinu e utu ei a moli;

³⁸mo te fata-fai-taulaga aulo, mo te sinu tapu, mo taulaga manogi, mo te pui laugatu o te mataloa o te Faleie;

³⁹mo te fata-fai-taulaga palasi mo tena mea valavala palasi, mo ana amo, mo ana mea katoa; mo te pesini fano mo tena tulaga;

⁴⁰mo te pui laugatu o te pui loto fakatasi mo ana pou mo olotou tulaga, mo te pui laugatu o te mataloa o te pui fakatamilo mo ona lopu; mo pine fakamau o te Faleie; mo mea katoa kola ka fakaaoga i te Faleie;

⁴¹mo gatu gali ke fakaaoga ne faitaulaga i te Potu Tapu — gatu tapu e o Alona te faitaulaga mo ana tamaliki tagata.

⁴²Ne fai eiloa ke oti a te galuega ne tino Isalaelu ke pela eiloa mo te mea ne fakatonu mai ne te Aliki ki a Mose.

⁴³Ne asi ne Mose a mea katoa takitasi kae ne lavea ne ia me ko maea a mea katoa ne fai ne latou ke pela eiloa mo te fakatonuga a te Aliki, tena, fakamanuia atu ei ne Mose a latou.