Read Te Tusi Tapu I Te Gana Tuvalu Lomiga Lua ESOTO 4 Bible Online

ESOTO 4 - Te Tusi Tapu I Te Gana Tuvalu Lomiga Lua bible

ESOTO 4

¹Ne tali atu a Mose ki te Aliki, “Kae kafai la e se talitonu a tino Isalaelu ki a au, kae se faka'logo mai ki pati e fai atu ne au. Se a te mea ka fai ne au mafai se talitonu latou i a koe ne fakaasi mai ki a au?”

²Ne fesili mai te Aliki ki a ia penei, “Se a te mea tena i tou lima?” Kae tali atu a Mose, “Se tokotoko.”

³Muna te Aliki, “Pei aka ki lalo.” I te peiga ne Mose a te tokotoko ki lalo, te mea eiloa ko liu gata. Tele ei Mose o faka'mao keatea mai i ei.

⁴Ne toe fai mai te Aliki ki a Mose, “Punou ki lalo o puke i tena velo.” Ne punou ifo Mose ki lalo, puke aka ne ia, ko te mea eiloa ko toe liu tokotoko.

⁵Ne fai atu te Aliki, “Fai ne koe te mea tena ke fakatalitonu ki ei tino Isalaelu, i te Aliki, te Atua o olotou tupuga, te Atua o Apelaamo, Isaako mo Iakopo, ne fakaasi atu ki a koe.”

⁶Ne toe faipati mai te Aliki ki a Mose penei, “Faulu tou lima ki loto i tou gatu.” Ne faulu te lima o Mose ki loto i tena gatu, kae i te taimi ne tata ake ei ne ia ko lepela, ko 'kena eiloa pela me se kiona.

⁷Ne fai atu te Aliki, “Toe faulu tou lima ki loto i tou gatu.” Ne toe faulu tena lima ki tena gatu, kae i te tataga ki tua, ko 'lei, ko 'pau eiloa mo tena foitino katoa.

⁸Ne muna mai te Aliki ki a Mose, “Kafai se talitonu latou i te vavega tela muamua, ka talia eiloa ne latou te vavega tena.

⁹Kae kafai la e tumau eiloa te lotou se talitonu ki a koe, mo te se fia faka'logo atu ki au pati; asu mai la ne vai mai i te vaitafe o te Naila kae ligi ki luga i te laukele; ko te vai tena ka liu toto.”

¹⁰Ne fai atu a Mose ki te Aliki, “Te Aliki, sa ugagina au. Au se se tagata e poto i te faipati. I te taimi ne kamata ei koe o faipati mai ki a au ke oko ki taimi nei, e seki lagona eiloa ne au se mafuliga ki taku faipati. Taku faipati e se 'lei kae tuai.”

¹¹Ne tali mai te Aliki ki a ia, “Ko oi ne fai ne ia te gutu o te tagata? Ko oi e fai ne ia a tagata ke 'tuli kae gugu? Ko oi e fai ne ia a mata o te tino ke pula kae ke 'kivi foki? Ko au eiloa ko te Aliki.

¹²Nei la, vau o fano, ka fesoasoani atu au ki tau faipati, ka tukutuku atu foki ne au ki a koe a pati e 'tau o fai.”

¹³Ne tali atu a Mose, “Te Aliki, fakamolemole uga aka se tino fakaatea.”

¹⁴Ona ko te mea tenei, ne ita ei te Aliki ki a Mose kae fai atu penei, “E iloa ne koe tou taina tela ko Alona mai te matakaiga o Levi? E iloa ne au me poto a ia i te faipati, kae tenei ko vau o fakafetaui ki a koe, kae ka fiafia a ia o kilo ki a koe.

¹⁵Faipati ki ei, fai atu foki a pati e 'tau ke fai ne ia. Ka fesoasoani atu au ki a koulua o akoako atu a pati ke fai ne koulua.

¹⁶Ka fai a ia mo tino failauga ia koulua o faipati atu ki tino; ka ko koe ka pela mo te Atua, o fakasinosino ki a ia a pati e 'tau o fai ne ia.

¹⁷Puke te tokotoko tenei ke olo mo koulua, me ka fakaaoga ne koulua mo fai a vavega e uke.”

¹⁸Ne foki atu a Mose ki a Ietelo, te tamana o tena avaga, kae fai atu ki a ia penei, “Fakamolemole tuku mai au ke foki ki Aikupito o asi atu ki oku kaiga me koi ola me ikai.” Ne tuku atu ne Ietelo a ia ke fano, fakatofa atu ei ki a ia.

¹⁹Ka koi nofo eiloa Mose i Mitiana, ne fai mai te Aliki ki a ia penei, “Foki ki Aikupito, i tino kola ne taumafai o tamate koe ko oti katoa ne 'mate.”

²⁰Ne puke aka ei Mose ki tena avaga, mo ana tamaliki tagata, faka'sopo ki luga i te asini, ma'laga atu eiloa latou ki Aikupito. Kae ave foki ne ia te tokotoko tela ne fai atu te Atua ke fano mo ia.

²¹Ne toe fai mai te Aliki ki a Mose, “Nei ka foki koe ki Aikupito, sa puli la o fai vavega kola ne tuku atu ne au ke fai ne koe i mua o te tupu. Ka fakamakeke ne au a te loto o te tupu, ke se talia ne ia tino Isalaelu ke olo.

²²Kae ka fai atu koe ki te tupu i a Au, te Aliki, ne fai atu penei, ‘A Isalaelu ko taku toekimua tagata.

²³Au e fai atu ki a koe ke tuku mai taku tama ke fano, ko te mea ke tapuaki mai ki a au, kae ita koe. Nei, ka tamate ne au tau toekimua tagata.’ ”

²⁴I te lotou auala ki Aikupito, ne ma'nava a Mose mo tena kaiga, kae ne fanatu te Aliki o taumafai o tamate a ia.

²⁵Ne puke aka ne Sepola, te avaga a Mose, te fatu mata'kai o pilitome a tena tama tagata, kae fakapatele ki vae o Mose.[7] Pela mo te faifaiga o te pilitome, ne fai atu ei Sepola ki a Mose, “Koe nei ko taku avaga i te toto.” Tena ne fakasao ei te ola o Mose ne te Aliki.

²⁷I vaitaimi kona, ko oti te Aliki ne faipati ki a Alona penei, “Fano ki te koga lavaki o fakafetaui ki a Mose.” Ne fano loa ei a Alona o fakafetaui ki a Mose i te Mauga Tapu; ka ko te la fetauiga ne sogi atu ei a ia ki a Mose.

²⁸I kona foki eiloa ne fakamatala katoa atu ne Mose a pati a te Aliki ne fai ki a ia, i te faiatuga ke foki a ia ki Aikupito; ne tala atu foki ne ia a vavega kola ne fakatonu atu ne te Aliki ke fai.

²⁹Ne olo ei Alona mo Mose ki Aikupito, fakamaopoopo eiloa ne laua a takitaki katoa o tino Isalaelu.

³⁰Ne folafola atu ne Alona a pati katoa a te Aliki kola ne fai ki a Mose, oti aka, fai ei ne Mose a vavega katoa i mua o latou.

³¹Ne talitonu latou; ka ko te 'logoga i te Aliki ne fanatu ki a latou, kae ne lavea ne ia te lotou nofo pologa, ne ifo latou kae tapuaki.