Read Te Tusi Tapu I Te Gana Tuvalu Lomiga Lua ESOTO 40 Bible Online

ESOTO 40 - Te Tusi Tapu I Te Gana Tuvalu Lomiga Lua bible

ESOTO 40

¹Muna a te Aliki ki a Mose,

²“Fakatu ne koe a te Faleie o te Aliki i te aso muamua o te masina muamua.

³Ave a te Pusa o te Feagaiga tela e tuku i ei a Tulafono e Sefulu ki loto kae 'tau mai ona mua tena pui laugatu.

⁴Ave foki ki loto a te taipola kae fakatoka ana mea katoa i luga i ei. Ke ave foki a te tulaga‐moli ki loto kae fakamau ana moli ki ei.

⁵Fakatu a te fata-fai-taulaga aulo mo sunu a taulaga manogi mai mua o te Pusa o te Feagaiga kae 'tau ake a te pui laugatu o te mataloa o te Faleie.

⁶Ke fakatu mai mua o te Faleie a te fata-fai-taulaga mo sunu a taulaga.

⁷Ke fakatu a te pesini fano i te va o te Faleie mo te fata-fai-taulaga kae utu ke fonu i vai.

⁸Ke fakatu foki ne koe a te pui fakatamilo kae tautau foki te pui laugatu i tena mataloa.

⁹“Tena la, ko fakatapu ei ne koe a te Faleie mo ana mea katoa i te milimili ne koe ki te sinu tapu, ko tapu katoa ei.

¹⁰Ka oti ko fakatapu ei ne koe a te fata-fai-taulaga mo ana mea katoa i te milimili ne koe ki te sinu tapu, kae ka tapu katoatoa eiloa.

¹¹Ke fakatapu foki ne koe a te pesini fano mo tena tulaga i te faiga eiloa tena.

¹²“Puke mai Alona mo ana tamaliki tagata ki te mataloa o te Faleie, kae fakatonu ki a latou ke koukou.

¹³Fakapei Alona ki ona gatu fakafaitaulaga, mili ki te sinu tapu, kae i te faiga tena, ko fakatapu ne koe a ia, ko te mea ke mafai ne ia o tavini mai ki a au i te tofi faitaulaga.

¹⁴Puke mai ana tamaliki tagata kae fakapei ki tilima o latou.

¹⁵Tena la, ko mili ei ne koe a latou ki te sinu tapu, ke pela eiloa mo te faiga ne fai ne koe ki te tamana o latou, ko te mea ke mafai ne latou o tavini mai ki a au i te tofi faitaulaga. A te miliga tenei ki te sinu tapu ka fai ei a latou mo faitaulaga i taimi katoa mai mua.”

¹⁶Ne fai eiloa ne Mose a mea katoa ke pela eiloa mo te mea ne fakatonu mai ne te Aliki.

¹⁷Tela la, i te aso muamua o te masina muamua o te lua o tausaga mai te taimi ne teka mai ei a latou mai Aikupito, ne fakatu ei a te Faleie o te Aliki.

¹⁸Ne fakatu ake ne Mose a tulaga, fakatu foki a te foitino o te fale, fakamau atu ona talava, kae fakatu mo ona pou.

¹⁹Ne fola ne ia te laugatu pulou o te tuafale o te Faleie kae toe pulou atu foki mo tena ufi mai tua, ke pela eiloa mo te fakatonuga a te Aliki.

²⁰Tela, ave ei ne ia a papa fatu e lua o tuku ki loto i te Pusa o te Feagaiga. Ne faulu foki ne ia a amo ki mama o te pusa kae tuku atu foki mo tena pono ki luga.

²¹Tela, avatu ei ne ia a te Pusa o te Feagaiga ki loto i te Faleie kae 'tau ne ia a te laugatu pui e pui ei a te Pusa. I te faiga tenei, ko puipui ne ia a te Pusa o te Feagaiga ke pela eiloa mo te fakatonuga a te Aliki.

²²Ne fakatu ne ia a te taipola i te Faleie ki te feitu ki matu mai tua o te pui laugatu,

²³kae tuku ne ia i luga i te taipola te falaoa tela e ofo atu ki te Aliki, ke pela eiloa mo te fakatonuga a te Aliki.

²⁴Ne fakatu ne ia a te tulagamoli i loto i te Faleie i te feitu ki saute kae fakafesagai tonu eiloa mo te taipola,

²⁵kae i kona ka fakaka ei ne ia a te moli i mua o te Aliki, ke pela eiloa mo te fakatonuga a te Aliki.

²⁶Ne fakatu ne ia a te fata-fai-taulaga aulo mai mua o te pui laugatu i loto i te Faleie,

²⁷kae ne sunu ne ia a taulaga manogi i ei, ke pela eiloa mo te fakatonuga a te Aliki.

²⁸Ne 'tau ne ia a te pui laugatu o te mataloa o te Faleie,

²⁹kae i te koga tena, mai mua o te pui laugatu, ne fakatu ei ne ia a te fata-fai-taulaga e sunu i ei a taulaga sunu. Kae i luga o te fata-fai-taulaga tena ne sunu ei ne ia a taulaga sunu mo taulaga meakai ki te Aliki, ke pela eiloa mo te fakatonuga a te Aliki.

³⁰Ne fakatu ne ia a te pesini fano i te va o te Faleie mo te fata-fai-taulaga kae utu ke fonu i vai.

³¹Ne 'fano a lima o Mose pela foki mo Alona mo ana tamaliki tagata, kae mulu foki mo vae o latou i te koga tena,

³²i so se taimi e olo atu ei a latou ki loto i te Faleie io me ki te fata-fai-taulaga, ke pela eiloa mo te fakatonuga a te Aliki.

³³Ne fakatu ake ne Mose a te pui fakatamilo o te Faleie mo te fata-fai-taulaga kae 'tau ake ne ia a te laugatu pui o te mataloa o te pui fakatamilo. Tena, ko palele katoa ei a galuega ne fai ne ia.

³⁴ Ko ufi ne te kaumana a te Faleie kae ko fonu i te mainaga o te Aliki.

³⁵Ona ko te mea tenei, ne seki mafai ei ne Mose o fano ki loto i te Faleie.

³⁶I te taimi e masagi ei a te kaumana keatea mai te Faleie, ko fatoa mafai ei ne tino Isalaelu o siki a fale o latou ki se isi koga.

³⁷Kafai e tumau eiloa a te kaumana i kona, e se mafai eiloa ne latou o olo keatea.

³⁸I taimi katoa o te takasesega o te fanauga a Isalaelu, ne matea eiloa ne latou a te kaumana o te Aliki i luga o te Faleie i te ao kae i te po se afi 'ka i luga o te Faleie.