Read Te Tusi Tapu I Te Gana Tuvalu Lomiga Lua ESOTO 5 Bible Online

ESOTO 5 - Te Tusi Tapu I Te Gana Tuvalu Lomiga Lua bible

ESOTO 5

¹Fakamuli ifo, ne olo atu a Mose mo Alona ki te tupu o Aikupito, kae fai atu penei, “A te Aliki, te Atua o Isalaelu, ne fai mai ke tuku atu ona tino, te kau Isalaelu, ke olo ki te koga lavaki o fai se kaiga fiafia o fakaaloalo ki a ia.”

²Kae fai mai te tupu, “Ko oi te Aliki tena ka fakalogo fua ei au ki a ia, kae tuku tino Isalaelu ke olo? E seiloa ne au te Aliki; kae ka se tuku atu foki ne au a tino Isalaelu ke olo.”

³Ne tali atu a Mose mo Alona, “A te Atua o tino Epelu ko oti ne fakaasi mai ki a maua. Fakasaoloto mai matou ke olo atu ki te vao i aso e tolu o fai omotou taulaga kae tapuaki ki te Aliki te motou Atua. Kafai se fai ne matou te mea tena ko te mea ka 'ta ne ia matou ki famai io me i taua.”

⁴Muna te tupu ki a Mose mo Alona, “Ai a e taumafai ei koulua o ave a tino Isalaelu keatea mai olotou galuega? Fakafoki atu pologa kona ki olotou galuega!

⁵Koutou tino Isalaelu ko gasolo o tokouke atu i tino Aikupito. Kae nei ko manako koutou ke se galue koutou!”

⁶I te aso tena, ne fakatonu ne te tupu a tino Aikupito kola e pule i pologa, mo tino Isalaelu kola e takitaki i galuega penei:

⁷“Sa toetuku ki tino Isalaelu ne kau saito mo fai olotou puliki, tuku eiloa ke olo latou o 'sala.

⁸Kae ke tumau eiloa te aofaki o puliki e masani o fai ne latou. E se uke olotou galuega e fai; tena te mea e fai mai faeloa ke tuku atu latou ke olo o fai olotou taulaga ki te lotou Atua!

⁹Faka'mafa aka galuega a latou ko te mea ke galue faeloa, ke seai se taimi o latou o faka'logo ki pati loi.”

¹⁰A pule Aikupito, mo tino Isalaelu kola e takitaki i galuega, ne olo atu kae fai atu ki tagata Isalaelu penei, “Te tupu ne fai mai ke se toetuku atu ne kau saito mo fai otou puliki.

¹¹Muna ia ke olo loa koutou o sala ne otou kau saito mo fai otou puliki i so se koga, kae ke tumau eiloa te aofaki o puliki a koutou e fai.”

¹²Tela olo atu ei latou o 'sala olotou kau saito mo fai olotou puliki i koga katoa i luga i Aikupito.

¹³Ne fakama'losi a pule Aikupito o tulituli te kau Isalaelu ke galue malosi ke katoa te aofaki o puliki a latou i te aso, pela eiloa mo te aofaki i taimi kola koi maua gofie ei ne latou a kau saito.

¹⁴Ko kini ne pule Aikupito a takitaki Isalaelu kola ne tuku atu ke takitaki ne latou te faiga o galuega. Ne fai atu a pule Aikupito konei ki takitaki Isalaelu penei, “Ai a ko se katoa ei te aofaki o puliki e faite ne koutou pela mo te masani?”

¹⁵Ne fai te tagi a takitaki Isalaelu ki te tupu penei, “Tou malu, ai a ko fai ei ne koe te mea tenei ki a matou?

¹⁶Ko seai ne kau saito e tuku mai ki a matou, kae fakatonu mai faeloa ke faite puliki; kae nei matou ko kini, e pogai mai i a koe.”

¹⁷Ne tali mai te tupu, “Koutou ne tino paie kae se fia galue, tena te mea e fai mai faeloa ei koutou ke olo koutou o avatu otou taulaga ki te Aliki.

¹⁸Foki nei ki otou galuega! E seai ne kau saito e avatu, kae taumafai loa koutou o fakakatoa te aofaki o puliki kola e masani o faite sale ne koutou.”

¹⁹Ne iloa eiloa ne takitaki Isalaelu i a latou ko maua ne te fakalavelave i te faiatuga o te tupu ke tumau eiloa te aofaki o puliki e fai ne latou i te aso pela eiloa mo taimi muamua.

²⁰I te lotou auala ki tua, ne fetaui latou mo Mose mo Alona, kola ne fakatali ki a latou.

²¹Ne fai atu a takitaki ki a Mose mo Alona penei, “Ko lavea ne te Aliki te mea a koulua ne fai, kae ka fakasala koulua ne ia me ne fai ne koulua te tupu mo ana tino maluga ke ita mai ki a matou. Ko oti ne fai ne koulua se ala ka tamate ei matou ne latou.”

²²Ne toe fakasaga atu Mose ki te Aliki kae fai atu ki a ia penei, “Te Aliki, ai a e fakasaunoa ei ne koe ou tino? Ai a ne uga mai ei ne koe au ki konei?

²³Mai i taimi ne fano ei au o faipati ki te tupu mo koe; ne fakasaua ne ia tou fenua. Kae seki ai loa sou fesoasoani kai fai ki a latou!”