Read Te Tusi Tapu I Te Gana Tuvalu Lomiga Lua ESOTO 6 Bible Online

ESOTO 6 - Te Tusi Tapu I Te Gana Tuvalu Lomiga Lua bible

ESOTO 6

¹Kae ne tali mai a te Aliki ki a Mose, “Nei, ka lavea ne koe a te mea ka fai ne au ki te tupu. Ka fai malo ne au ke tuku atu oku tino ke olo. Ka fai malo ne au ke tuli ne ia latou mai Aikupito.”

²Ne faipati mai te Atua ki a Mose penei, “Au ko te Aliki.

³Au ne fakaasi ki a Apelaamo, mo Isaako, pela foki ki a Iakopo i a au ko te Atua Tafasili i te Malosi, kae seki fakailoa toku igoa tapu, tela ko te ALIKI. [8]

⁴Ne fai foki taku feagaiga mo latou; ne tauto au ki a latou me ka tuku ne au te fenua o Kanana ke nofo ei latou, te fenua tela ne 'nofo ei latou pela me ne tino fakaatea.

⁵Nei ko oti ne lagona ne au te tagi fita o tino Isalaelu, kola e fakapologa ne tino Aikupito; kae ne masaua ake ei ne au taku feagaiga.

⁶Tela la, fai ki tino Isalaelu i au e fai atu ki a latou, ‘Au ko te Aliki; ka fakasao kae fakasaoloto ne au koutou mai te nofopologa i Aikupito. Ka sisi aka toku lima tafasili i te malosi o tuku ifo fakasalaga 'mafa eiloa ki luga i a latou, kae ka fakasao koutou ne au.

⁷Ka fai ne au koutou mo oku tino tonu eiloa, ka ko au ka fai mo otou Atua. I te taimi e fakasaoloto atu ei koutou ne au mai te pologa i Aikupito, ko te taimi tena ka iloa ei ne koutou i au ko te Aliki te otou Atua.

⁸Ka tuku atu ne au te fenua tela ne tauto ne au ke tuku ki a Apelaamo, Isaako mo Iakopo, kae ka tuku atu ne au mo koutou. Au ko te Aliki.’ ”

⁹Ne fai atu ne Mose a pati konei ki tino Isalaelu kae seki talitonu latou me ko fita olotou mafaufau i te fakagalue fakamafa ne tino Aikupito.

¹⁰Ne fai mai te Aliki ki a Mose,

¹¹“Fano o fai ki te tupu o Aikupito ke tuku atu a tino Isalaelu ke olo keatea mai tena fenua.”

¹²Ne tali atu Mose, “Kona a tino Isalaelu seki fakalogo mai ki a au, kae ka pefea eiloa o fakalogo mai ki a au a te tupu o Aikupito? Au nei se tagata valea fua i te faipati.”

¹³Ne fakatonu mai ne te Aliki a Mose mo Alona penei: “Fai ki tino o Isalaelu mo te tupu o Aikupito i a koulua ne fakatonu atu ne au ke taki ne koulua a tino Isalaelu keatea mai Aikupito.”

¹⁴Ko Leupena, te toekimua a Iakopo, e tokofa ana tama tagata: ko Hanoka, ko Palu, ko Heselona mo Kami; ko latou ko tupuga o kaukaiga kola e iloa i olotou igoa.

¹⁵Simeona e tokoono ana tama tagata: ko Iemuelu, ko Iamina, ko Ohata, ko Iakini, ko Soala mo Saula, te tama tena a te fafine Kanana; ko latou kona ko tupuga o kau kaiga kola e iloa i olotou igoa.

¹⁶A Levi e tokotolu ana tama tagata: ko Kelesona, ko Koate mo Melali; ko latou ko tupuga o kau kaiga kola e iloa i olotou igoa. A Levi ne ola e tusa mo te 137 ona tausaga.

¹⁷A Kelesona e tokolua ana tama tagata: ko Lipini mo Simei; a te tokolua nei e tokouke la fanau.

¹⁸A Koate e tokofa ana tama tagata: ko Amalamo, ko Isala, ko Hepelona mo Usieli. Ne ola Koate e tusa mo te 133 ona tausaga.

¹⁹A Melali e tokolua ana tama tagata: ko Mali mo Musi. Konei katoa te kau kaiga o Levi mo olotou fanauga.

²⁰Ne avaga Amalamo ki a Iokapeta, te tuagane o tena tamana; ko laua ko matua o Alona mo Mose. Ne ola Amalamo e tusa mo te 137 ona tausaga.

²¹A Isala e tokotolu ana tama tagata: ko Kola, ko Nefeku mo Sikeli.

²²E tokotolu foki tamaliki a Usieli: ko Misaeli, ko Elisafana mo Siteli.

²³Ne avaga Alona ki te tuagane o Nasona tela ko Elisepa, te tama a Aminatapu; ne fai la tama ko Natapu mo Apiu mo Eleasalo mo Itamala.

²⁴A Kola e tokotolu ana tama tagata: ko Asili, ko Elekana mo Apiasafa; a latou ko tupuga o te kau kaiga o Kola.

²⁵A Eleasalo te tama tagata a Alona ne avaga ki te tama fafine a Petueli kae fai te la tama ko Fineaso. Ko latou konei ko ulu o kaiga mo kaukaiga o te matakaiga o Levi.

²⁶Ko Alona mo Mose ko te tokolua ne fai ki ei te Aliki ke taki te kau Isalaelu keatea mai Aikupito.

²⁷Ko laua kola ne fai ki te tupu o Aikupito ke fakasaoloto te kau Isalaelu.

²⁸I te faipatiga a te Aliki ki a Mose i Aikupito,

²⁹e penei ana pati: “Au ko te Aliki. Fai ki te tupu o Aikupito a mea katoa kola ne fai atu ne au ki a koe.”

³⁰Kae tali atu a Mose, “E iloa ne koe i au se tino e valea i te faipati; ai a ka fakalogo mai fua ei te tupu ki a au?”