Read Te Tusi Tapu I Te Gana Tuvalu Lomiga Lua ESOTO 7 Bible Online

ESOTO 7 - Te Tusi Tapu I Te Gana Tuvalu Lomiga Lua bible

ESOTO 7

¹Ne fai atu a te Aliki ki a Mose, “Ka fai ne au a koe e pela me se Atua ki te tupu o Aikupito, ka ko Alona tou taina ka fai pela me se pelofeta a koe o faipati ki te tupu.

²Fakamatala atu ki a Alona a mea katoa kola ne fakatonu atu ne au ki a koe, kae ka faipati a ia ki te tupu ke tuku atu a tino Isalaelu ke olo keatea mai tena fenua.

³Ka fakamakeke ne au a te loto o te tupu ke mo a e fakalogo atu ki a koulua, faitalia eiloa me pefea te uke o mea fakama'taku e fai ne au i luga o Aikupito.

⁴Ka oti aka, ko fakasala 'mafa ei ne au a Aikupito kae 'taki tino Isalaelu keatea mai ei.

⁵I kona foki eiloa, ka iloa ne tino Aikupito i a au ko te Aliki, mafai ko fakamafa toku lima ki luga ia latou kae taki Isalaelu keatea mai te lotou fenua.”

⁶Ne fai eiloa ne Mose mo Alona te fakatonuga a te Aliki.

⁷I te taimi tena ne faipati ei laua ki te tupu, a Mose ko valusefulu tausaga o tena olaga ka ko Alona ko valusefulu tolu.

⁸Muna te Aliki ki a Mose mo Alona,

⁹“Kafai e se talitonu te tupu ki a koulua, kae fai atu ke fai ne koulua se vavega mo ona fakatalitonu, fai ki a Alona ke 'pei ifo tena tokotoko i mua o te tupu, ka liu gata ei te tokotoko.”

¹⁰Ne olo Mose mo Alona ki te tupu, fai eiloa ne laua a mea kola ne fakatonu atu ne te Aliki. Ne pei ne Alona tena tokotoko ki mua o te tupu mo ana ofisa, ko te mea eiloa ko liu gata te tokotoko.

¹¹Ne kalaga te tupu ki ana tino 'poto mo tino fakataulaitu; ne fai foki ne latou te vavega tena.

¹²Ne 'pei foki olotou tokotoko ki lalo te mea eiloa ko liu gata katoa; kae ne 'folo katoa ne te tokotoko o Alona.

¹³Ne tumau eiloa te loto makeke o te tupu, kae e pela eiloa mo pati a te Aliki ne fai, a te tupu e se fia fakalogo eiloa ki a Mose mo Alona.

¹⁴Ne fai atu te Aliki ki a Mose, “Ko oko eiloa te loto makeke o te tupu, kae se talia ne ia ke tuku atu a tino ke olo.

¹⁵Fano o fakafetaui ki te tupu i te tafataeao mafai e fano a ia ki te vaitafe ko te Naila. Ke ave ne koe te tokotoko tela ne fakaliu gata, ko fakatali ei koe ki a ia i te kaugutu o te vaitafe.

¹⁶Fai atu ki a ia penei: ‘Te Aliki, te Atua o tino Epelu, ne uga mai ne ia au ke fai atu ki a koe ke tuku atu ona tino ke olo, ko te mea ke tapuaki atu ki a ia i te koga lavaki. Ka ko koe seki fakalogo eiloa ke oko mai ki te taimi nei.

¹⁷Kae nei, tou malu, muna a te Aliki me ka fai ne ia se mea fakaofoofogia ko te mea ke iloa ne koe i a ia ko te Aliki. Ka 'kini ne au a te vaitafe ki te tokotoko tenei, ko te mea eiloa ko liu toto te vai.

¹⁸A ika ka mate, ka ko te vaitafe ka 'pou; ko tino Aikupito ka se mafai o inu ki ei.’ ”

¹⁹Muna te Aliki ki a Mose, “Fai ki a Alona ke puke tena tokotoko kae fakasaga ki vaitafe, Kanala, mo koga suasua katoa i luga o Aikupito. A vai ka liu toto, pela foki mo koga katoa i luga o Aikupito, ke oko foki eiloa ki vai i loto i taapu lakau mo sioki fatu ka liu toto katoa.”

²⁰Ne fai ne Mose mo Alona a te fakatonuga a te Aliki. Ne sisi ake te tokotoko o Alona i mua o te tupu mo ana ofisa, kini eiloa ei ne ia ki luga i te vai o te vaitafe; ko te vai eiloa ko liu toto.

²¹Ne 'mate a ika i te vaitafe, ka ko manogi masei eiloa te vai ko se maua ne tino Aikupito o inu ki ei. Ko 'fonu koga katoa i Aikupito i te toto.

²²Ne mafai foki ne tino fakataulaitu a te tupu o fai te vavega tena, tela la, a te tupu e tumau eiloa tena loto makeke. Pela eiloa mo pati a te Aliki, a te tupu se fia fakalogo eiloa ki a Mose mo Alona.

²³Ne fano te tupu ki tena palesi, se fia saga eiloa ki te mea tena e tupu.

²⁴A tino Aikupito katoa ko olo fua o keli a kaugutu o te vaitafe o sala ne vai mo olotou inu, i vai o te vaitafe ko se maua eiloa o inu.

²⁵Ko fitu nei a aso ko 'teka i te fakaliu totoga ne te Aliki te vaitafe.