Read Te Tusi Tapu I Te Gana Tuvalu Lomiga Lua ESOTO 8 Bible Online

ESOTO 8 - Te Tusi Tapu I Te Gana Tuvalu Lomiga Lua bible

ESOTO 8

¹Ne fai atu a te Aliki ki a Mose, “Fano ki te tupu kae taku atu a pati a te Aliki konei, ‘Tuku mai oku tino ke olo, ko te mea ke tapuaki mai ki a au.

²Kafai se talia ne koe, ka fakasala ne au tou fenua, ka faka'fonu ne au ki lane.

³Ka fonu te vaitafe ko te Naila i lane, ka olo atu ki tou palesi mo tou potumoe mo tou moega mo fale o ou tino maluga mo ou tino, ke oko eiloa ki au ogaumu mo au mea tao meakai.

⁴Ka eva atu foki latou ki luga i tou foitino mo ou tino, mo ou tino maluga katoa.’ ”

⁵Muna te Aliki ki a Mose, “Fai ki a Alona ke sisi aka tena tokotoko o fakasaga ki vaitafe, Kanala mo koga suasua katoa i Aikupito; ko lane ke olo aka ke fakafonu koga katoa o Aikupito.”

⁶Ne sisi aka te tokotoko o Alona o fakasaga ki vai katoa i Aikupito, kae mafuta ake mo lane, fonu eiloa te fenua.

⁷A tino fai vailakau a te tupu ne mafai foki ne latou o fai a lane ke olo aka ki luga i te fenua.

⁸Ne kalaga te tupu ki a Mose mo Alona kae fai atu ki a laua penei, “Talo ki te Aliki ke ave keatea a lane konei, ko tuku atu ei ne au otou tino ke olo, ko te mea ke fai olotou taulaga ki te Aliki.”

⁹Ne tali atu a Mose, “Ka fiafia au o talo mo koe. Fai mai se taimi ke talo ei au mo koe mo ou tino maluga mo tou fenua. Tena ko seai ei ne lane i luga i te laukele kae 'toe fua ko lane i te vaitafe ko te Naila.”

¹⁰Muna te tupu, “Taeao ko talo ei koe mo oku.” Muna Mose, “Ka fai ne au te mea tena e fai mai koe, ka iloa ei ne koe me seai aka foki se atua pela mo te Aliki te motou Atua.

¹¹Ka seai ne lane i tou palesi mo fale o ou tino maluga mo ou tino, kae ka 'toe fua ko lane i te vaitafe ko te Naila.”

¹²Ne tiakina ne Mose mo Alona a te tupu, kae ne talo Mose ki te Aliki ke ave keatea lane kola ne aumai ne ia o fakasala a te tupu.

¹³Ne talia ne te Aliki te 'talo a Mose, tela ne 'mate katoa ei a lane i loto i fale, i tafafale mo malae fatoaga.

¹⁴Ne fakaputu ne tino Aikupito a lane 'mate ki fakaputuga 'lasi, kae ko manogi masei te fenua i ei.

¹⁵I te laveaga ne te tupu i lane ko 'mate, ne toe makeke foki tena loto, kae pela eiloa mo pati a te Aliki, a te tupu e se fia fakalogo eiloa ki a Mose mo Alona.

¹⁶Muna te Aliki ki a Mose, “Fai ki a Alona ke 'kini te laukele ki tena tokotoko; ko te pefu katoa i luga i Aikupito ka liu kutu.”

¹⁷Ne 'kini ne Alona te laukele ki tena tokotoko, te mea eiloa ko te pefu i Aikupito katoa ko liu kutu; ko fonu a tino mo manu i kutu.

¹⁸Ne taumafai a tino fai vailakau a te tupu o fai ke olo aka a kutu kae seki mafai ne latou. A koga katoa ko fonu i kutu.

¹⁹Kae ne fai atu a tino fai vailakau ki te tupu, “Te mea tenei ne fai ne te Atua!” Ka ko te tupu e tumau eiloa tena loto makeke, kae pela eiloa mo pati a te Aliki, a te tupu e se fia fakalogo eiloa ki a Mose mo Alona.

²⁰Ne fai atu a te Aliki ki a Mose, “I te tafataeao o te aso taeao, ko fano koe o fakafetaui ki te tupu i tena auala ki te vaitafe, kae fai atu ki a ia i te Aliki ne faipati penei, ‘Tuku mai oku tino ke olo ko te mea ke tapuaki mai ki a au.

²¹Au e fai atu ki a koe, kafai se fakalogo koe, ko koe ka fakasala ne au; ka avatu ne au a lago ki a koe mo ou tino maluga pela foki ki tou fenua. A fale o tino Aikupito ka fonu i lago, pela foki mo te laukele.

²²Kae ka fakasao ne au te fa'kai o Kosena, tela e nofo ei oku tino, ko tino Isalaelu, ke seai ne lago i ei. Ka fai ne au a te mea nei, ko te mea ke iloa ne koe i a au, te Aliki, e pule i te fenua tenei.

²³Ka faka'kese[9] ne au a tino Isalaelu mo tino Aikupito. A te mala tenei ka oko mai taeao. ”’

²⁴Ne tuku mai ne te Aliki a lago e uke eiloa ki loto i te palesi o te tupu mo fale o ana tino maluga. Ko fakamasei a te fenua o Aikupito ne lago.

²⁵Ne kalaga te tupu ki a Mose mo Alona kae fai atu ki a laua penei, “Olo o fai otou taulaga ki te otou Atua i konei, i te fenua tenei.”

²⁶Ne tali atu a Mose, “E se lei ma fai taulaga matou i konei me ka se fiafia a tino Aikupito ki manu kola ka tamate ne matou mo fai omotou taulaga ki te Aliki te motou Atua. Kafai e fai a taulaga a matou i konei ki manu konei e takalialia ei a tino Aikupito, ko matou ka peipei ne latou ki fatu ke 'mate.

²⁷E 'tau mo matou o olo atu i aso e tolu ki te vao o ofo atu omotou taulaga ki te Aliki te motou Atua, pela eiloa mo tena fakatonuga.”

²⁸Muna te tupu, “Ka tuku atu ne au koutou ke olo o ofo atu otou taulaga ki te Aliki te otou Atua i te vao, mafai e pili fua te koga e olo koutou ki ei. Kae talosia mai au.”

²⁹Ne tali atu a Mose, “I te taimi eiloa e tiakina ei ne au a tou palesi, ka talo au ki te Aliki ke ave keatea a lago mai i a koe, ou tino maluga mo tou fenua i te aso taeao. Kae mo a eiloa koe ma toe vau o fakaloiloi mai matou, io me 'vao mai matou ke se olo o ofo atu taulaga ki te Aliki.”

³⁰Ne tiakina ne Mose te tupu, talo ei a ia ki te Aliki,

³¹kae ne talia ne te Aliki tena 'talo. Ne olo keatea a lago mai te tupu, ona tino maluga mo tena fenua; e seai eiloa se lago e toe.

³²Kae oti aka, ka toe fakamakeke foki te loto o te tupu, ka ko ita foki ma tuku te kau Isalaelu ke olo.