Read Te Tusi Tapu I Te Gana Tuvalu Lomiga Lua ESOTO 9 Bible Online

ESOTO 9 - Te Tusi Tapu I Te Gana Tuvalu Lomiga Lua bible

ESOTO 9

¹Ne fai mai te Aliki ki a Mose, “Fano ki te tupu, fai atu ki ei i te Aliki, te Atua o tino Epelu ne fai atu penei, ‘Tuku mai oku tino ke olo ko te mea ke tapuaki mai ki au.

²Kafai e se toe talia ne koe latou ke olo,

³ka fakasala koe ne au, ka tuku atu ne au te masaki fakamataku ki au manu; au solofanua, asini, kamela, pulumakau, mamoe mo kouti.

⁴Ka fakamailoga ne au a manu a tino Isalaelu ke lavea te kese mo manu a tino Aikupito, kae seai eiloa se manu a se Isalaelu e mate.

⁵Ka ko Au, te Aliki, ko oti ne fakamoe ne Au a te aso taeao ke tupu ei te mea tenei.’ ”

⁶I te taeaoakega, ne fai ne te Aliki te mea tela ne faipati a ia ki ei. Ne 'mate katoa a manu a tino Aikupito, kae seai eiloa se manu a se tino Isalaelu ne mate.

⁷Ne fesili te tupu me se a te mea ne tupu, kae ne logo aka a ia me e seai eiloa se manu a se tino Isalaelu ne mate. Kae e tumau eiloa tena loto makeke; se talia eiloa ne ia ke olo a tino Isalaelu.

⁸Ne fai mai te Aliki ki a Mose mo Alona, “Aku aka ne lefu mai se umu, ko pei ei ne Mose ki luga i mua o te tupu.

⁹Ka salalau pela me se pefu i luga i Aikupito, kae i koga katoa e 'to i ei, ka fakafua mai ei a fakafoa i tino mo manu.”

¹⁰Tela, olo atu ei a Mose mo Alona ki mua o te tupu mo lefu i la lima. Ne pei ne Mose a lefu ki luga i mua o te tupu, tela ko mafua mai ei a fakafoa i tino mo manu.

¹¹A tino faivailakau a te tupu ko se mafai o 'mai ki mua o Mose me ko fonu latou i fakafoa, pela foki mo tino Aikupito katoa.

¹²Kae ne fakamakeke ne te Aliki te loto o te tupu; kae e pela eiloa mo muna a te Aliki, ne seki fakalogo eiloa te tupu ki a Mose mo Alona.

¹³Ne fai mai a te Aliki ki a Mose penei, “I te tafataeao malu eiloa taeao, fano koe ki te tupu kae fai atu ki a ia i te Aliki, te Atua o tino Epelu e fai atu ki a ia penei, ‘Tuku mai oku tino ke olo, ko te mea ke tapuaki mai ki a au.

¹⁴I te taimi tenei, ka fakasala ne au se ko ou tino maluga fua mo tino Aikupito, kae ka fakasala foki ne au a koe; ko te mea ke iloa ne koe me seai aka foki loa se tino e pau mo au i te lalolagi katoa.

¹⁵Moi ne 'ta ne au a koutou mo tino Aikupito ki famai, penei la ko leva eiloa koutou ne seai.

¹⁶Ka ko tuku atu ne au a koe ke ola ko te mea ke lavea ne koe toku malosi; ka ko au foki ke takutakua i te lalolagi katoa.

¹⁷Kae ne tumau eiloa tou loto makeke, e se talia eiloa ne koe ke tuku atu oku tino ke olo.

¹⁸I te taimi penei ma taeao, ka fakato ifo ne au a te vaiua fatu tela e seki matea eiloa ne tino Aikupito talu mai olotou olaga.

¹⁹Nei la, fakatonu atu ki tino, ko olotou manu mo mea taua a latou i olotou matafale ke fakamalu katoa. A te vaiua fatu ka 'to ki luga i tino mo manu kola i te matafale, kae ka 'mate katoa latou.’ ”

²⁰E isi ne tino maluga a te tupu ne mataku i pati konei a te Aliki; ne faulu ei ne latou olotou tavini mo manu ki fale o fakamalu.

²¹Ka ko nisi ne seki fakalogo. Ne tuku eiloa olotou tavini mo manu i matafale.

²²Muna a te Aliki ki a Mose, “Sisi aka tou lima ki te lagi, kae ka 'to te vaiua fatu i luga o Aikupito katoa; i luga o manu, tino, mo lakau katoa i tua i fatoaga.”

²³Ne sisi ake te tokotoko o Mose ki te lagi, fakato ifo ei ne te Aliki a te vaiua fatu, fakapa ne ia te fatili kae fakalapa ne ia a uila i te laukele.

²⁴Ne fakato ne te Aliki te vaiua fatu lasi eiloa mo uila ko 'lapa valevale. Ko toe afā fakamataku eiloa tenei i luga o Aikupito talu mai tena tala tuku fakasolo.

²⁵I luga o Aikupito katoa, ne fakamasei ne te afā tenei a mea katoa kola i te matafale; e aofia foki i ei a manu mo tino. Ne fakamasei ne ia a lakau katoa, kae fatifati, foki ne ia a lakau lasi katoa.

²⁶Ko Kosena fua, te koga tela e nofo ei a tino Isalaelu e seki oko atu ki ei te afā tenei.

²⁷Ne uga te fekau a te tupu ki a Mose mo Alona kae fai mai ki a laua penei, “I te taimi nei au ko agasala; a te Aliki e tonu ka ko au mo tino Aikupito e 'se.

²⁸'Talo atu ki te Aliki! Ko logofiofio matou i te afā tenei! Au ko tauto o tuku atu koutou ke olo; se 'tau mo koutou o toe 'nofo i konei.”

²⁹Ne tali atu a Mose, “I te taimi eiloa e fano ei au ki tua o te fa'kai, ko au ka sisi oku lima ki luga kae 'talo ki te Aliki. A te fatili mo te vaiua fatu ka gata, ko te mea ke iloa ne koe i te lalolagi nei e o te Aliki.

³⁰Kae e iloa ne au i a koe mo au tino maluga e seki mataku eiloa i te Aliki te Atua.”

³¹A lakau ko te lino mo te kalite ko oti ne fakamasei, me i te taimi tena ko matua a kalite, ka ko lino ko matala olotou pula.

³²Kae e seai eiloa se saito ne masei me e seki matua.

³³Ne fano keatea Mose mai te tupu, o fano ki tua o te fa'kai, kae sisi ake ona lima kae 'talo ki te Aliki. I kona foki eiloa ne gata ei te fatili mo te vaiua fatu mo te vaiua.

³⁴I te laveaga ne te tupu me ko 'lei a te afā, ne toe agasala foki a ia. Ne toe tumau foki te makeke o te loto o te tupu mo ana tino maluga.

³⁵Kae pela eiloa mo pati a te Aliki ki a Mose, seki tuku eiloa ne te tupu a tino Isalaelu ke olo.