Read Te Tusi Tapu I Te Gana Tuvalu Lomiga Lua IOPU 1 Bible Online

IOPU 1 - Te Tusi Tapu I Te Gana Tuvalu Lomiga Lua bible

IOPU 1

¹E isi se tagata e igoa ki a Iopu, e nofo i te fenua ko Usa;[1] e tapuaki ki te Atua kae fakamaoni ki ei. A Iopu se tagata lei, kae ko ia eiloa ko fakaeteete i a ia ma agasala.

²E tokofitu ana tama tagata, kae tokotolu ana tama fafine.

³A mamoe a ia e tusa mo te fitu afe, ana kamela e tusa mo te tolu afe, e afe ana pulumakau, kae limaselau ana asini. E tokouke foki ana tavini, kae ko te toe tino maumea eiloa i te Saegala.

⁴A tamaliki tagata a Iopu, e masani o fakasolosolo sale o fai olotou 'kaiga, kae e fakatasi atu ki ei a olotou taina katoa; e masani o kami sale foki ne latou a olotou tuagaene kola e tokotolu, ki olotou kaiga.

⁵I tafataeao takitasi mai tua o kaiga takitasi, e masani sale a Iopu o ala malu o ofo ana taulaga mō ana tamaliki taki tokotasi, ko te mea ke faka'ma ei latou i feitu fakatapuakiga. E fai faeloa ne ia a te faiga tena, se iloa fua manafai ne agasala se tamaliki a ia o fai ne muna se lei ki te Atua i se feitu pasala.

⁶ I te okoga ki te taimi ko tau ei o maopoopo a kau o te lagi[2] ki mua o te Aliki, a Satani ne oko atu foki.[3]E nofo fakatasi mo latou.

⁷Ne fesili atu te Aliki ki a ia penei, “Ne a au mea ne fai?” Ne tali atu a Satani, “Au ne fano sale fua i te lalolagi.”

⁸Ne fesili atu te Aliki penei, “E lavea ne koe taku tavini ko Iopu? E seai se tino i te lalolagi e pau mo ia i te lei mo te fakatuanaki. E tapuaki a ia ki a au, kae ko ia eiloa ko fakaeteete i a ia ma agasala mai ki a au.”

⁹ Ne tali atu a Satani, “E mata e tapuaki atu eiloa a Iopu ki a koe manafai e seai sena lei e maua i tena tapuaki atu ki a koe?

¹⁰Ne puipui faeloa ne koe a ia mo tena kaiga, mo ana mea katoa. Ne fakamanuia ne koe ana mea katoa e fai, kae ko oko foki eiloa i te uke o pulumakau ne tuku ne koe ma ia.

¹¹I te taimi nei, se taumate kafai e ave keatea ne koe ana mea katoa, e iku eiloa o muna masei ne ia a koe!”

¹²Muna a te Aliki ki a Satani, “Ko lei, ko pule koe i ana mea katoa, kae ke mo a eiloa e oko ou lima ki a Iopu.” Tena la, ko Satani eiloa ko fano.

¹³I te aso e tasi, ne fai te kaiga a tamaliki a Iopu i te fale o te tamaliki matua,

¹⁴kae ne tele mai te avefekau ki a Iopu, ana muna, “A matou ne fakama'lu te laukele ki pulumakau, ka ko asini e nofo mai fua i te koga moukua pili mai.

¹⁵E poi eiloa matou i te kau Seepa[4] ko taua mai, puke katoa ei ne latou a mea kona. Ne tamate ne latou a au tavini katoa, kae toe mai fua ko au. Ko au fua tenei ne sao mai o fakaasi atu te mea tena ne tupu.”

¹⁶Ne seki oti tena faipatiga, kae oko mai mo te sua tavini, muna a ia penei, “E isi se uila ne lapa ki mamoe mo tausi mamoe, tena ne mate katoa ei. Ko au fua tenei ne sao mai o fakaasi atu te mea tena ne tupu.”

¹⁷Ne seki oti tena faipatiga kae oko mai mo te sua tavini, muna a ia penei, “E isi se potukau masei mai i Kaletaia17 [5] ne taua mai ki a matou; ne puke ne latou a kamela, kae tamate a au tavini katoa, ko au fua ne sao. Ko au fua ne sao mai o fakaasi atu a te mea tena ne tupu.”

¹⁸Ne seki oti tena faipatiga kae vau te sua tavini, ana muna penei, “Au tamaliki ne fai kaiga i te fale o te tamaliki matua,

¹⁹kae ne poko te kautaufa, ne ui mai i te toafa. Ne agina ki lalo a te fale, mate katoa eiloa au tamaliki. Ko au fua tenei ne sao mai o fakailoa atu a te mea tena ne tupu.”

²⁰Tena, ne tu aka a Iopu kae saesae ona gatu i te fanoanoa. Ne vele tena ulu, kae fakasiga fakafaō ki lalo i te laukele.

²¹Muna a ia penei, “Au ne fanau mai mo te seai, ka mate atu foki au mo te seai. Ne aumai ne te Aliki aku mea, kae nei ko ave keatea foki ne ia. Ke vikia te igoa o te Aliki!”

²²E ui eiloa i mea katoa kola ne tupu, ka ko Iopu e seki agasala eiloa o lou me ko te Aliki e pogai ei a mea kona ne tupu.