Read Te Tusi Tapu I Te Gana Tuvalu Lomiga Lua IOPU 10 Bible Online

IOPU 10 - Te Tusi Tapu I Te Gana Tuvalu Lomiga Lua bible

IOPU 10

¹Au ko fita i te olaga nei. Fakalogo mai ki toku se malie.

²Te Atua, sa fakamalaiagina au. Taku mai me se a taku mea se ne fai?

³Mata se mea lei ke saua koe pena? Ke takalialia ki te mea ne faite foki eiloa ne koe? Ka oti ko kata ei koe ki togafiti a tino amio masei?

⁴E a, e pau tau kiloga mo te kiloga a te tagata?

⁵E mata e toetoe tou ola e penei mo te ola o matou?

⁶Ai a la e salasala ei koe ki aku agasala katoa? Ai a e sukesuke ei ne koe aku mea se katoa ne fai?

⁷E iloa ne koe i a au e se se, e iloa foki ne koe me e Seai se tino e mafai ne ia o fakasao au mai i a koe.

⁸Au ne faite ne koe ki ou lima, Ko lima foki kona ne ta fakamasei ei au.

⁹Masaua i a au ne faite ne koe mai i te one;[11] E a, ka toe tukipala ne koe au ke toe liu one au?

¹⁰Ne avatu ne koe te malosi ki toku tamana ke fakafua ei au; Ne puti ake ne koe au i te moegatama o toku matua.

¹¹Ne faite ne koe toku foitino ki ivi mo uaua, Kae ufi ne koe a ivi ki kano mo pakili.

¹²Ne aumai ne koe ki a au te ola, Ne tumau foki tou alofa ki a au, Ko tau tausiga tenei e fakatumau ei toku ola.

¹³Kae nei, ko iloa ne au i a koe ne mafaufau muni ke fakapakia ne koe a au.

¹⁴Ne alamati ne koe te taimi e agasala ei au, Ko te mea ke se fakamagalo ne koe a au.

¹⁵I te taimi eiloa e agasala ei au, Ko au eiloa ko fakasala ne koe, Kae kafai e fai ne au te mea tonu, E seai se taui e maua ne au. Au ko puapuaga kae ko masiasi masei eiloa.

¹⁶Kafai e manuia au i se mea, kae vau koe o sala au o ta, e pela koe me se leona; E fakaaoga foki eiloa ne koe a vavega o ta ei au.

¹⁷E isi faeloa ne molimau a koe e uiga ki toku se lei; A tou ita ki a au, e gasolosolo ake eiloa o lasi; E fai faeloa au fuafuaga fou e ta ei au.

¹⁸Te Atua, ai a ne tuku mai ei ne koe au ke fanau ki te lalolagi nei? Au ne 'tau eiloa o mate atu kae seki lavea oku mata ne tino.

¹⁹A te fanatu mai i te moegatama ki te tanuga se mea tafasili i te lei, E pela eiloa moi ne seki tupu mai lele eiloa.

²⁰E a, e se pili nei au ki te mate? Tuku mai au ke filemu! Tuku mai au ke fiafia i mu taimi o oku konei koi toe.

²¹Se leva nei ko fano ei au, se toe foki mai eiloa; Au e fano ki te fenua pouli kae seai se mainaga i ei.

²²Se fenua o te pouliga mo te fenumiaki valevale, A te mainaga i ei ko te pouliga.