Read Te Tusi Tapu I Te Gana Tuvalu Lomiga Lua IOPU 11 Bible Online

IOPU 11 - Te Tusi Tapu I Te Gana Tuvalu Lomiga Lua bible

IOPU 11

¹E a, e seai se tino e tali mai ki muna se aoga konei? E a, e mata e fakasao te tino ne ana muna e uke?

³Iopu, a koe e mafaufau me e se mafai ne matou o tali au pati kona e fai? I tau fakatau, ka se maua ne matou o tali ki au muna fakaosooso kona?

⁴E talitonu koe i au muna e fai e tonu katoa; E fai ake koe i a koe e se 'se i mua o te Atua.

⁵Aku muna eiloa ke tali mai te Atua ki au pati kona e fai!

⁶Ka fai mai a ia me e uke a feitū o te poto; E isi ne mea e se oko ki ei te mafaufau o te tagata. A te fakasalaga o koe ne te Atua ko to foliki, ne tau o lasi atu.

⁷E a, e mafai ne koe o iloa te tuakoi o te mana mo te takutakua o te Atua?

⁸A te lagi e se ko te gataga o te Atua, kae e se oko foki koe ki ei. A te Atua e iloa ne ia te lalolagi o tino mate, Ka ko koe, e se iloa ne koe.

⁹A te takutakua o te Atua e lasi atu i te lalolagi, Kae lauefa atu i te tai.

¹⁰Kafai e puke fakapagota koe ne te Atua, Kae aumai koe ki te fono, Ko oi te tino e mafai ne ia o taofi te Atua?

¹¹E iloa ne te Atua a tagata se aoga; E lavea fakalei eiloa ne ia olotou amioga masei katoa.

¹²A tagata valea ka kamata o poto, E pela mo asini vao ka kamata foki o lata.

¹³Iopu, ke toka tou loto, Kalaga atu ki te Atua.

¹⁴Ave keatea te masei mo te agasala mai i tou fale.

¹⁵Tena, ko toe taumafai ei koe o saga mai ki te lalolagi tenei e ola tatou i ei, kae ke toa tou loto.

¹⁶Tena la, ka se mafaufau koe ki ou fakalavelave, E pela mo lofiaga ko 'teka kola ko se toe masaua atu.

¹⁷A tou olaga ka maina atu i lo te mainaga o te la i te tutonu; Ka ko itula pouli eiloa o tou olaga ka maina e pela me se vaveao.

¹⁸Ka ola koe mo te saogalemu, kae fonu i te fakamoemoega lei; Ka tausi koe ne te Atua, kae avatu ki a koe te filemu.

¹⁹Ka se toe mataku koe i ou fili; ka tokouke tino ka o'mai ki a koe mo se fesoasoani.

²⁰Ka ko tino masei ka kilo aka ki olotou feitu mo te fanoanoa, me ko seai se auala e 'sao ei latou. Ko te fakamoemoega e tasi o latou, ko latou ke na mate.