Read Te Tusi Tapu I Te Gana Tuvalu Lomiga Lua IOPU 12 Bible Online

IOPU 12 - Te Tusi Tapu I Te Gana Tuvalu Lomiga Lua bible

IOPU 12

¹E tonu, a koutou ko te leo o te fenua, kafai e mate koutou, E mate tasi atu eiloa koutou mo te poto.

³Au se tagata e lasi toku mafaufau, e pena foki eiloa mo koutou; Au e se fatauva atu i a koutou, e iloa ne tino katoa otou muna katoa ne fai.

⁴Oku taugasoa e kata mai foki ki a au; e kata latou, Kae tela la, au e amiotonu kae seai saku agasala; Kae e isi se taimi ne tali mai ei te Atua ki aku talosaga.

⁵E seai ne fakalavelave e oko ki a koutou, Kae o'mai faeloa koutou o fakalili au; E ta ne koutou te tagata tela ko pili foki eiloa o paku ki lalo.

⁶A tino kaisoa mo tino se talitonu ki te Atua, E ola i te manuia mo te filemu, kae tela la, A te atua o latou ko te lotou malosi.

⁷Ke oko foki eiloa ki manu eva mo manu o te laukele, E uke foki eiloa a mea e mafai o akoako mai ne latou ki a koe;

⁸Fesili atu ki manu o te laukele mo manu o te tai ke tuku mai olotou poto.

⁹E iloa ne latou katoa, me ko te Aliki ne faite ne ia latou.

¹⁰Ko te Atua e pule i te ola o ana mea ne faite; A te ola o tagata katoa e i tena pulega.

¹¹E pela mo tou laulaufaiva e fiafia o tami ki meakai, E pena foki te fiafia o tou taliga o fakalogo ki muna.

¹²A toeaina e isi te poto i a latou, kae ko te Atua e poto atu kae mana atu foki i a latou. A toeaina e isi te atamai i a latou, ka ko te Atua e atamai atu Kae isi foki sena mana o fai a mea valevale.

¹⁴Kafai ne ofa ne te Atua se mea, ko oi te tino e mafai ne ia o toe faite? Ko oi foki te tino e mafai ne ia o fakasao te tino ne pei ki te falepuipui ne te Atua?

¹⁵A te oge vai e mafua manafai e taofi ne te Atua a vaiua ke se tō; A te lofiaga e mafua manafai e tuku mai ne te Atua a vai ke tafe mai.

¹⁶A te Atua e mafi kae manumalo faeloa; A te tino loi mo te tino ne fakaloiloigina, E i lalo katoa o tena pulega.

¹⁷E ave keatea ne ia a te poto o takitaki, Kae fai ne ia a tino pule ke pela me ne vale.

¹⁸E tapale keatea ne ia a tupu mai olotou nofogaaliki, Kae fakapagota ne ia latou;

¹⁹E fai ne ia a faitaulaga mo tino maluga ke malalo.

²⁰E pono ne ia a gutu o tino kola e fakatuagagina, Kae ave keatea ne ia a te poto o toeaina.

²¹E fakamasiasi ne ia a tino i tofi maluga, Kae fakagata ne ia a te malosi o tino pule.

²²E avatu ne ia a te mainaga ki koga kola e pouli pela mo te mate.

²³E fai ne ia a malo ke malosi kae takutakua, Ka oti ko fakatakavale kae ta fakapalele ne ia.

²⁴E fai ne ia olotou takitaki ke valea, Kae tuku ke tekateka sale fua kae se iloa o fai se mea;

²⁵E oloolo sale latou i te pouliga, kae takasese e pela me ne tino kona.