Read Te Tusi Tapu I Te Gana Tuvalu Lomiga Lua IOPU 13 Bible Online

IOPU 13 - Te Tusi Tapu I Te Gana Tuvalu Lomiga Lua bible

IOPU 13

¹A muna katoa a koutou kona e fai, ko oti ne lagona ne au muamua. E malamalama au i au muna katoa kona; A toku atamai e pena eiloa mo tou atamai. Au e se malalo atu i a koe.

³A te mea tenei e kinau ei au, se mea eiloa i te va o maua mo te Atua kae se ko koutou; Au e manako ke kinau maua mo te Atua ki te mea tenei e mafa i toku loto.

⁴E fai otou muna fakaloiloi, ko te mea ke fakagalo ei te otou valea; A koutou e pela me ne tokita kola ko se mafai o faka'lei se tino.

⁵Sa faipati, kae ka mafaufau aka a tino i a koutou e poto!

⁶Fakalogologo mai i te taimi e fakaasi ei te mea e mafa i toku loto.

⁷Ai a e loi ei koutou? I te otou fakatau, e fiafia te Atua i tala loi a koutou?

⁸E a, a koutou e taumafai o pulu te Atua? E a, e sui ne koutou te Atua ke kinau tatou i te fono?

⁹Mata e isi se lei e mafai o lavea ne te Atua i a koutou, manafai e onoono fakalei atu ki a koutou? I te otou fakatau, e mafai ne koutou o fakaloiloi a te Atua, E pela mo tagata e fakaloiloi gofie sale fua ne koutou?

¹⁰E ui eiloa e funa ne koutou te otou takalialia ki nisi tino, Kae ka kote eiloa koutou ne te Atua,

¹¹Kae ka fakamatakutaku ne ia koutou ki tena mana.

¹²A otou muna poto ka se aoga pela me ne lefu; A otou fakamatalaga ka se aoga pela me ne one.

¹³Sa uā, tuku mai soku avanoaga ke faipati atu au, Ka ko te ikuga tena eiloa e vau.

¹⁴A au ko toka o peti toku ola.

¹⁵Ko seai soku fakamoemoega; e lei faeloa manafai e tamate au ne te Atua. Au ka faipati ki te Atua i te mea e ma'fa ei toku loto.

¹⁶E se taumate, e iku au o sao i a au e loto malosi o faipati ki te Atua. Me e seai se tino masei e mafai o fano o faipati fakafesagai ki te Atua.

¹⁷Fakalogo mai ki taku fakamatalaga.

¹⁸Au ko toka o fai taku tagi, me e iloa ne au i au e sao.

¹⁹Te Atua, e a, e 'lou ne koe i au e agasala? Kafai e fai ne koe te mea tena, ko au ka se faipati, Ko toka foki au o mate.

²⁰Talia mai taku fakamolemole tenei, ki mea e lua konei e manako au ki ei, Kae ka se taumafai au o muni mai i a koe;

²¹Fakagata tau fakasala ki a au, kae sa fakamatakutakugina au.

²²Te Atua, faipati muamua koe, ko tali atu ei au. Io me tuku mai ke faipati au, kae tali mai koe.

²³Ne a aku agasala? Ne a mea se ne fai ne au? Ne a agasala e 'lou mai me ne fai ne au?

²⁴Ai a e kalo ei koe keatea mo au? Ai a e fai ei ne koe au e pela me se fili o koe?

²⁵A koe e taumafai o fakamatakutaku au? Au nei se lau lakau fua; A koe e faitaua mai fua ki kau saito.

²⁶E 'lou ne koe me ne fai ne au a agasala masei, Ke oko foki eiloa ki mea ne fai ne au i aso koi talavou ei au.

²⁷ E saisai ne koe oku vae ki seni; e kilokilo fakalei koe ki aku mea e fai, Ke oko foki eiloa ki gao o oku vae.

²⁸Tena la, a te ikuga, ko au ko masei valevale e pela me se laupapa pala, Pela me se peleue ne kai ne mogamoga.