Read Te Tusi Tapu I Te Gana Tuvalu Lomiga Lua IOPU 14 Bible Online

IOPU 14 - Te Tusi Tapu I Te Gana Tuvalu Lomiga Lua bible

IOPU 14

¹A tatou katoa ne fanau mai e vaivai kae seai se mea e mafai o fai. E ola katoa tatou i te olaga toetoe tenei, kae fonu i fakalavelave.

²A tatou e tupu ake, kae toe mage atu e pela me ne pula lakau; A tatou e galo atu fua e pela me ne ata.

³Te Atua, e a, e kilo mai eiloa koe ki a au io me ave ne koe au ki te fono ke fakamasino au ne koe?

⁴E seai eiloa se mea ma e mafai o maua i te tagata, I te tagata se mea lailai.

⁵A te leva o tena olaga ko leva ne fuafuagina — pela mo te aofaki o masina e ola ei a ia. Ko oti ne fakamoe ne koe, tela la, e se mafai o fuli.

⁶Kilo keatea mai i a ia, kae tuku ei a ia ke nofo tokotasi; Tuku atu ei a ia ke fakafiafia tena olaga, manafai e mafai ne ia.

⁷Kafai se lakau ne kati ki lalo, kae e isi eiloa se fakamoemoega me e mafai o toe ola aka.

⁸E ui eiloa ko ma'tua ona aka, mo tena tafito foki ko mate i te laukele,

⁹Kae e mafai eiloa o toe ola aka pela me se lakau fatoa tupu aka, manafai e isi te vai i ei.

¹⁰Ka ko te tagata, kafai ko mate, tena eiloa tena gataga; E mate atu a ia, tefea la te koga e fano a ia ki ei?

¹¹E pela mo vaitafe kola ko gata te tafe, mo namo kola ko masa pakupaku,

¹²E pena a tino, e 'mate atu se toetu ake. E se toe ala aka eiloa i te taimi e tumau ei te lagi; E se toe ga'sue eiloa latou mai te lotou moe.

¹³Aku muna eiloa ke fakamuni ne koe au i te lalolagi o tino mate; Tuku mai au ke muni ke oko ki te taimi e gata ei tou kaitaua, Tena, ko onoono ei koe ki se taimi e toe masaua mai ei au.

¹⁴Kafai e mate se tagata, e mata e mafai o toe ola mai? Ka ko au ka fakatalitali ki te taimi lei, Ka fakatali au ke oti atu a taimi o fakalavelave konei.

¹⁵Tena la, ka kalaga mai koe, kae tali atu au, Kae ka fiafia ei koe ki a au, tau mea ola ne faite.

¹⁶Ka kilokilo fakalei koe ki oku ala, kae ka se toe salasala koe ki aku agasala.

¹⁷Ka fakamagalo ne koe aku agasala, kae ave keatea ne koe; Ka solo faka'ma ne koe aku mea se katoa ne fai.

¹⁸Ka oko mai aso e 'siga ei a mauga, mo kaupapa malosi ka fakagasue.

¹⁹A kaupapa ka kaikai lemu ne te vai, Ka ko vaiua ka ave keatea ne latou a one; Tena la, ko ofa ne koe a te fakamoemoega o te tagata i a ia e ola.

²⁰E fakatakavale ne koe a te tagata, kae uga keatea ne koe ke galo atu ki te se gata mai; Ko mafuli ona foliga me ko mate atu.

²¹E maua ne ana tama tagata ne tulaga fakaaloalogina, Kae e seai foki se tino e fakaasi atu ki a ia i ana tama tagata ko masiasi.

²²E lagona fua ne ia a te mae o tena foitino mo te mafatia o tena mafaufau.