Read Te Tusi Tapu I Te Gana Tuvalu Lomiga Lua IOPU 15 Bible Online

IOPU 15 - Te Tusi Tapu I Te Gana Tuvalu Lomiga Lua bible

IOPU 15

¹Iopu, au muna kona ne muna se aoga! Ne muna se aoga!

³E seai se tagata poto e faipati pena mo koe, Io me taumafai o puipui a ia ki muna se aoga pena.

⁴Kafai e fai ne koe te mea e loto koe ki ei, Ka seai se tino e mataku ki te Atua; Ka seai foki se tino e talo atu ki a ia.

⁵A tou uiga masei ko lavea atu eiloa i au muna kona e fai; A koe e taumafai o muni mai tua o au muna gali kona e fai.

⁶Ko se tau eiloa o fakamalaia ne au a koe; A koe ko fakamalaia eiloa ne au muna katoa kona ne fai.

⁷I tau fakatau, a koe ko te tino muamua ne fanau mai? Ne nofo koe i te taimi ne faite ei ne te Atua a mauga?

⁸Ne lagona ne koe a fuafuaga a te Atua ne fai? E pule koe i te poto faka‐te‐tagata?

⁹E seai se mea e iloa ne koe kae e se iloa ne matou.

¹⁰A matou ne akoako ne tagata ko sinā olotou ulu; Ne akoako matou ne tagata kola e matua atu i tou tamana.

¹¹Ne avatu ne te Atua te filemu; ai a e se talia ei ne koe? Ne fai foki matou mo sui o te Atua o faipati atu a muna fakamafanafana.

¹²A koe ko to manavase kae pula 'toka mai koe ki a matou mo te kaitaua.

¹³A koe ko kaitaua ki te Atua kae ko taku fakaseaoga ne koe a ia.

¹⁴ E a, e isi se tino e mafai o ma katoatoa? E isi se tino e mafai o sao i mua o te Atua?

¹⁵A te Atua e se talitonu foki ki ana agelu; Me e se ma katoatoa foki i ona mua.

¹⁶A te tagata e inu ki te masei, e pela eiloa me e inu ki vai; E tonu, a te tagata e se aoga, e se aoga eiloa.

¹⁷Iopu, fakalogo mai ki te mea e iloa ne au.

¹⁸Au ne akoako ne tino poto ki poto e uke, kola ne tauloto ne latou mai olotou tamana, Kae e seai ne mea e funa ne latou.

¹⁹E seai ne tino fakaatea i te lotou laukele; E seai ne tino ke taki ei latou keatea mai i te Atua.

²⁰A te tino amio masei tela e fakapuapuaga ne ia a nisi tino, E fakafitagina i tena olaga kātoa.

²¹A leo fakamataku ka pakalaga i ona taliga, Kae ka taua atu ki a ia a tino fao mea, I te taimi e mafaufau ei a ia i a ia ko sao.

²²E seai sena fakamoemoega ke sao a ia mai i te pouliga, Me e isi se koga e fakatalitali ei te pelu o tamate a ia,

²³Mo manu ko valatua e fakatalitali o kai tena foitino mate. E iloa eiloa ne ia i ona aso fakamuli e pouli, seai se lei e maua i ei;

²⁴A te puapuaga e pela me se tupu malosi tela ko fakatalitali o ta a ia.

²⁵Tena te ikuga o te tagata tela e fia toa ki te Atua Kae se fia saga ki te Atua Malosi.

²⁶A te tagata e fakamatamata kae fia teke; E loto makeke eiloa a ia o puke tena talita, E loto makeke eiloa o puke tena talita, Kae tele o taua ki te Atua.

²⁸Tena te tagata tela e fakatakavale ne ia a fa'kai Kae puke ne ia a fale kola ko seai ne tino i ei me ko oti ne 'tele, Ka fakamasei a fa'kai mo fale kona i se taua.

²⁹Ka se tumau tena maumea i se taimi leva; E seai se mea a ia e tumau i a ia. Ke oko foki eiloa ki tena ata ka galo atu,

³⁰Kae ka se sao eiloa a ia mai i te pouliga. Ka pela a ia me se lakau tela ne sunu ona kaula i se afi, Mo ona pula ko agina keatea ne te matagi.

³¹Kafai ko to valea a ia, o talitonu ki te masei, Ko tena uiga, ko te masei foki ko tena taui.

³²Ka mage atu a ia, kae koi tuai o oko mai tena taimi, Ka mage pela me se kaula kae ka se toe ola lau usiusi.

³³A ia ka pela me se vine tela ko galo ona fuagā vine kola seki sulu; Pela me se lakau ko te olive tela ko 'to keatea ona pula.

³⁴Ka seai se gafa o tino se talitonu ki te Atua, A fale kola ne faite i faiga fakatogafiti ka fakamasei katoa i te afi.

³⁵Kona a tagata kola ne fuafua ne latou a togafiti masei, Kae fai a amioga masei; a olotou loto e fonu faeloa i uiga fai togafiti.