Read Te Tusi Tapu I Te Gana Tuvalu Lomiga Lua IOPU 18 Bible Online

IOPU 18 - Te Tusi Tapu I Te Gana Tuvalu Lomiga Lua bible

IOPU 18

¹Iopu, kae a, ko tino pena mo koe e se mafai o nofo filemu? Kafai e nofo malie koe o fakalogologo, Ko faipati atu ei matou ki a koe.

³Se a te pogai e mafaufau ei koe i a matou e valea pela me ne pulumakau?

⁴A koe e fakamae foki eiloa ne tou kaitaua. E mata ka lavaki te lalolagi i tou kaitaua? E a, ka fakagasue ne te Atua a mauga ke fakamalie ei koe?

⁵ A te mōli a te tagata masei e tamate eiloa; A tena ulaga ka se toe ula eiloa.

⁶A te moli i tena faleie ka fakapouli.

⁷A ona pou ne mautakitaki, kae nei ko siga fua; Ko siga a ia — e pogai eiloa i ona manatu fia tonu.

⁸E sasale a ia ki loto i te tili, tena ko lavelave ei ona vae;

⁹Ko lave ona mulivae i te malei, tena ko taofi ei a ia ne te malei.

¹⁰E isi se malei ne funa i te laukele; E isi se malei ne tao i tena auala.

¹¹A te fakamataku e fakatalitali ki a ia i ona feitu katoa; E tautali i a ia i ona maga katoa.

¹²Ne maumea a ia, kae nei ko likiliki; A te puapuaga ko tu o fakatalitali i ona tafa.

¹³A tena foitino ko tofu i te masaki fakamataku, Ko pogai ei te pala o ona lima mo ona vae.

¹⁴Ko ave keatea a ia mai i te faleie ne nofo ei a ia mo te saogalemu, Kae ko toso ki mua o te Tupu o te Mate.

¹⁵Nei, so se tino e fia nofo i tena faleie Manafai ko oti ne fakapauta ki te pauta ko te salufa e fakama ei te faleie mai i te masaki.

¹⁶A ona aka mo kaula ko mage kae ma'lo.

¹⁷Ko se takutakua a ia i loto i tena kaiga, pela foki ki tino katoa; Ko se toe masaua a ia ne tino.

¹⁸Ka afuli a ia keatea mai i te fenua o tino ola, Ka afuli keatea mai i te mainaga ke fano ki te pouliga.

¹⁹E seai ne tino i tena gafa e ola mai.

²⁰A tino katoa, mai i te saegala ki te togala, Kola e lagona ne latou tena ikuga, ka polepole i te mataku.

²¹Tena te ikuga o tino amio masei, te ikuga o tino kola e se saga lele eiloa ki te Atua.