Read Te Tusi Tapu I Te Gana Tuvalu Lomiga Lua IOPU 2 Bible Online

IOPU 2 - Te Tusi Tapu I Te Gana Tuvalu Lomiga Lua bible

IOPU 2

¹I te taimi ne toe maopoopo ei a te kau o te lagi ki mua o te Aliki, ka ko Satani ne nofo foki i kona.

²Ne fesili atu a te Aliki ki a Satani penei, “A koe ne vau mai i fea?” Ne tali mai Satani, “Au ne fano sale fua i te lalolagi.”

³Ne fesili atu te Aliki ki a Satani penei, “E lavea ne koe taku tavini ko Iopu? E seai eiloa se tino i te lalolagi e pau mo Iopu i te fakamaoni mo te lei. E tapuaki ki a au, kae ko ia eiloa ko fakaeteete i a ia ma agasala mai ki a au. Ne fai mai koe ki a au ke talia atu koe ke fano o fakapuapuaga a Iopu kae seai se pogai tau, ka ko Iopu ne tumau eiloa tena loto fakamaoni.”

⁴Muna a Satani, “A te tagata e mafai fua o tiakina ana mea katoa manafai ko manako ke ola a ia.

⁵Kafai e fakapakia ne koe tena foitino, e iku eiloa o muna masei atu ki a koe!”

⁶Muna a te Aliki ki a Satani, “Ko lei, ko pule koe i a Iopu, kae mo a eiloa e tamate ne koe.”

⁷Tena, ne fano keatea ei Satani mai mua o te Aliki, fai ei ne ia a Iopu ke fonu tena foitino i mea pala.

⁸Ne fanatu a Iopu o sagasaga i tafa o te fakatugā kaiga, kae soisoi ona matakili ki te matifiga o te tiā kele.

⁹Muna a te avaga a Iopu penei, “A koe e tumau eiloa tou fakatuanaki ki te Aliki, ne? Ai a se na muna masei ei ne koe te Atua ko mate ei koe?”

¹⁰Ne tali atu a lopu penei, “Ko oko eiloa i tou valea mo au pati kona e fai! Kafai e aumai ne te Aliki ne mea lei ki a tatou, e talia ne tatou mo te fiafia. Ai a la e muimui ei tatou manafai e aumai ne ia a puapuaga?” E ui eiloa i te uke o puapuaga ne oko ki a Iopu, kae e seki ai eiloa se muna masei ne fai ne Iopu ki te Atua.

¹¹E tokotolu taugasoa o Iopu, ko Elifasa mai i te fa'kai o Temanu, ko Pilitati mai i te fenua o Sua, mo Sofala mai i te fenua o Naama. I te logoga a latou i a Iopu ko oko eiloa i te puapuaga, tena ne mafaufau ei latou o olo o fakamafanafana a Iopu.

¹²I te taimi koi mao ei latou, ne lavea ne latou a Iopu, kae e se iloa ne latou me ko Iopu. I te iloaga ne latou me ko Iopu, ne tagi kae paka'laga kae saesae olotou gatu i te fanoanoa, kae pei a pefu ki luga ke to ki luga i olotou ulu.

¹³Tena ne sagasaga ifo ei latou i tafa o Iopu i ao mo po e fitu, seai eiloa ne muna a latou ne fai i aso kona, me ko lavea ne latou te mafa o te puapuaga o Iopu.