Read Te Tusi Tapu I Te Gana Tuvalu Lomiga Lua IOPU 24 Bible Online

IOPU 24 - Te Tusi Tapu I Te Gana Tuvalu Lomiga Lua bible

IOPU 24

¹Ai a e se fakatoka ei ne te Atua se taimi mo fai fakamasinoga, Se aso e fakaasi ei te mea tonu ki a latou kola e tavini ki a ia?

²E siki ne tagata a fatu o olotou tuakoi ke fakaopoopo te lasi o olotou manafa; E kaisoa ne latou a mamoe, kae tuku ki olotou lafu.

³E puke ne latou a asini a tamaliki kola e seai ne matua, Kae sai ne latou a pulumakau a fafine seai ne avaga Ke oko ki te taimi e togi mai ei olotou kaitalafu.

⁴E taofi ne latou a saolotoga o tino mativa, Kae fai malo ne latou a tino puapuaga ke tele o muni.

⁵Tela la, a tino mativa ko olo o salasala meakai pela mo ne asini vao i te koga e seai ne vai i ei; Ko seai aka foki eiloa se koga e mafai o maua ei ne meakai ma olotou tamaliki.

⁶Ko olo latou o kati te taukai i fatoaga kola e se o latou,[15] Kae tau vine i togavine a tino amio masei.

⁷I te po, e moe latou kae seai ne sulukafu, Seai ne sulu mo kafu latou mai i te moko.

⁸Ko siu latou i te vaiua tela e to ki mauga, Kae ko fakapikipiki fua ki kaupapa ke malu latou.

⁹A tagata amio masei ko fakapologa ne latou a tamaliki seai ne tamana o latou, Kae puke ne latou a tamaliki a tino mativa mo togi olotou kaitalafu i a latou.

¹⁰A tino mativa e olo seai ne gatu e puipui ei olotou foitino; E tau eiloa o olo mo te likiliki o kati te taukai saito.

¹¹E tau ne latou a olive ke maua ei te sinu, Ka ko fuagavine ke maua ei te uaina, ka ko latou e mate fiainu.

¹²A tino pakia mo tino ko pili o mate i loto i fa'kai e tagi, ka ko te Atua e se saga ki olotou talo.

¹³E isi ne tino e teke ne latou te mainaga, E se malamalama latou i ei, Kae se fia tautali foki i te koga e fano ki ei.

¹⁴I te vaveao, a te tagata tatino e tu ki luga o fano o tamate a tino mativa, Kae i te po ko fano a ia o kaisoa.

¹⁵A te tino mulilua e fakatalitali ki te afiafi po, E funa ona mata ke se lavea a ia ne tino.

¹⁶I te po, a tino kaisoa e olo o kaisoa i fale o tino, Kae i te ao, ko muni me ko se manako ki te mainaga.

¹⁷E mataku latou i te mainaga o te ao, Kae ko te pouliga o te po e se mataku latou i ei.

¹⁸[16]A te tagata amio masei ko ave i te lofiaga, A tena laukele ko i lalo i te fakamalaiaga a te Atua; Ko se fano eiloa a ia o galue i tena toga vine

¹⁹A te tagata agasala ka galo atu keatea mai i te fenua o tino ola, E pela eiloa mo te kiona tela e matafi i te vela mo te oge vai.

²⁰Ke oko foki eiloa ki tena matua ko se manatua ne ia a ia; ko kai tena foitino ne ilo, Kae ko pala pela me se lakau siga.

²¹Ne tupu te mea tena me ne seki fai fakalei ne ia a fafine ko mate olotou avaga kae se alofa ki fafine seai ne fanau.

²²E ta fakapalele ne te Atua a tino malosi i tena malosi; E gasue te Atua, ko te tino amio masei eiloa ko mate.

²³E mafai ne te Atua o tuku atu te tagata tena ke ola mo te saogalemu, Kae e onoono eiloa a ia ki ei i taimi katoa.

²⁴A te tagata masei e maumea i se taimi toetoe, Se leva ko mage atu ei a ia e pela me se mouku, E pela me se saito tela ko oti ne kati keatea.

²⁵E a, e isi se tino e mafai ne ia o faka'se te manatu tena? E isi se tino e mafai ne ia o taku tonu mai i aku pati e se tonu?