Read Te Tusi Tapu I Te Gana Tuvalu Lomiga Lua IOPU 29 Bible Online

IOPU 29 - Te Tusi Tapu I Te Gana Tuvalu Lomiga Lua bible

IOPU 29

¹Iopu ko toe faipati.

²Aku muna eiloa ke foki toku olaga ki aso kola ne tausi faka'lei sale ei au ne te Atua.

³I aso kona, a te Atua e fakatasi mai faeloa ki a au Kae ne aumai ne ia a te mainaga i te taimi ne sasale ei au i loto i te pouliga.

⁴I aso kona, au ne maumea, ka ko toku fale ne puipui eiloa ne te Atua me i a maua e taugasoa.

⁵A te Atua Malosi ne fakatasi mai ki a au, Ka ko au ne nofo fakatasi mo aku tamaliki.

⁶E uke a susu ne maua ne au mai i aku pulumakau mo aku kouti, Ka ko aku lakau ko olive e ola i laukele papapa.

⁷I so se taimi e maopoopo ei a toeaina, kae nofo au i ei,

⁸A tamataene e faka'tafa atu keatea manafai e lavea ne latou a au, Ka ko toeaina e tu ki luga o fakaaloalo mai ki a au.

⁹A takitaki o te fenua ko se faipati;

¹⁰Ke oko foki eiloa ki tino tafasili i te tāua ko se faipati.

¹¹A tino katoa kola ne lavea ne latou a au, io me ne logo i oku tala, E tavae ne latou aku mea ne fai.

¹²Au e fesoasoani ki tino mativa manafai e manako ki ne fesoasoani; E fesoasoani foki au ki tamaliki seai ne matua, kola ko seai se koga e olo ki ei.

¹³A tino puapuaga e tavae ne latou a au, E fesoasoani foki au ki fafine ko mate olotou avaga, Ke saogalemu olotou olaga.

¹⁴Aku mea katoa e fai sale, ne fai mo te amiotonu mo te fai mea tonu.

¹⁵Au e pela me ne mata ki tino kivi, pela me ne vae ki tino e masei a vae.

¹⁶Au e pela me se tamana ki tino mativa kae fesoasoani foki au ki tino fakaatea kola e maua ne puapuaga.

¹⁷E fakaseaoga ne au te malosi o tino amio masei, Kae fakasao ne au a tino kola ka ta ne latou.

¹⁸Au ne fakamoemoe faeloa o ola i se olaga loa, Kae mate foki au i toku fale mo te filemu.

¹⁹Au e pela me se lakau tela e isi faeloa ne vai i ona aka mo ona kaula e siu faeloa i te sau.

²⁰A tino katoa e masani o tavae sale ne latou a au, A toku malosi e se mafai o gata.

²¹Kafai e fai oku manatu fakatonutonu, a tino e se ua katoa, Kae fakalogologo faka'lei katoa ki aku muna e fai;

²²E seai foki eiloa se lotou muna e fakaopoopo, manafai ko oti aku muna ne fai. Aku muna e ulu ki olotou loto e pela me ne motigā ua;

²³A tino katoa e talia ne latou aku muna, e pela eiloa mo tino toki lakau e talia ne latou mo te fiafia a vaiua i te tau o te muakiga.

²⁴Au e kata ki a latou, manafai ko isi te loto fakalotoloto lua i a latou; E fakamalosigina olotou loto manafai e kilo mai ki oku mata e mata fiafia.

²⁵Ne fai au mo takitaki, fai foki ne au a ikuga; Ne takitaki ne au latou e pela me se tupu e takitaki ana kautau, Kae e fakamafanafana foki ne au latou i taimi o puapuaga.