Read Te Tusi Tapu I Te Gana Tuvalu Lomiga Lua IOPU 30 Bible Online

IOPU 30 - Te Tusi Tapu I Te Gana Tuvalu Lomiga Lua bible

IOPU 30

¹A tagata kola e foliki atu i a au e fakalili ne latou a au! A olotou tamana ne tagata e seai ne aoga, Tena te mea ne seki tuku ne au ke fesoasoani ki aku kuli i te tausiga o mamoe.

²A latou ne tagata ko se aoga valevale, ko to vaivai seai se lotou mea e mafai o fai mo oku.

³Ko oko eiloa latou i te mativa kae fia'kai, tela ko gau fua ne latou a aka malo i te po, i vao i koga masei.

⁴E unu ne latou a lakau o te toafa kae kai ne latou, Ke oko foki eiloa ki aka o te lakau ko te pulumu, Tela e seai sena gali i te kai.

⁵E pakalaga atu a tino katoa ki a latou o afuli ke tele, E pela eiloa me pakalaga ki tino kaisoa.

⁶Ko seai ne koga e nofo ei latou, na ko ana eiloa, I pūga kola e keli i kaokao o kaupapa.

⁷E kalaga latou pela me ne manu kae fakaputuputu fakatasi i lalo o lakau.

⁸A latou ne tino seai ne aoga kae seai ne igoa! A latou ne afuli keatea mai te fenua.

⁹Nei, ko o'mai latou o kata fakatauemu mai ki a au; Au ko pela fua me se mea faifa'kata a latou.

¹⁰E fai fakamasei ne latou a au; e mafaufau latou pela i a au e se fetaui mo latou, Latou ko te lei ka ko au se tino se aoga fua. E o'mai foki eiloa o puapuaki mai oku mata.

¹¹Ona ko au ne fai ne te Atua ke vaivai kae se aoga, Tena ko o'mai ei latou mo olotou kaitaua o fai fakamasei a au.

¹²A te potukau kona ko faitaua mai ki a au; ko afuli ne latou a au; Ko fakatoka te toe tauaga a latou ki a au.

¹³E pono ne latou te auala e sao ei au, kae taumafai o tamate au; Ko seai se tino ke fakagata ne ia te lotou mea tena e fai.

¹⁴E sao mai latou ki loto i toku olo; E ta ne latou au i te taimi e takavale ei au.

¹⁵Au ko oko eiloa i te mataku; a toku toa ko seai, Pela fua me se laumatagi; a toku maumea foki ko galo atu pela me se kaumana.

¹⁶Au nei ko pili o mate; e seai eiloa se lei o toku fi'ta.

¹⁷I te po, a oku ivi e mae katoa; a toku mae e se mafai o gata.

¹⁸A te Atua e puke mai ki te kola o toku gatu, Kae mio ne ia oku gatu ke mafuli fakaatea.

¹⁹E 'pei ne ia au ki lalo i te pelapela; au ko pau fua mo te pefu.

²⁰Te Atua, au ne kalaga sale atu ki a koe, kae ne seki tali mai eiloa koe; I te taimi e talo ei au, ka ko koe e se saga mai lele eiloa.

²¹Au ko fai fakamasei ne koe; ko fakasaua ne koe a au i tou mana katoatoa.

²²Ne tuku ne koe au ke agi keatea ne te matagi; E luelue ne koe au i te kautaufa malosi.

²³E iloa ne au, i a au ko ave ne koe ki toku mate, Ki te ikuga tela e oko ki ei a tino katoa.

²⁴Ai a e ta ei ne koe te tagata ko se aoga, Te tagata ko se mafai ne ia o fai se mea, na ko te akai fua?

²⁵E a, ne seki tagi fanoanoa au fakatasi mo tino ko maua ne puapuaga, Kae alofa foki au i a latou kola e mativa?

²⁶Au ne fakamoemoe ke maua te fiafia mo te mainaga, Kae ko te puapuaga fua mo te pouliga ne oko mai.

²⁷Au ko oko eiloa i te mae kae i aso takitasi, E gasolosolo ake foki eiloa toku fita mo te puapuaga.

²⁸Au e fanofano sale eiloa mo te fanoanoa, E seai eiloa se mata fiafia; E tu au i mua o tino kae fakamolemole ke maua soku fesoasoani.

²⁹A toku leo ko oko eiloa i te fakaalofalofa, E pela mo te leo o te manu ko te tiakolo mo te manu ko te ositelite.

³⁰A toku pakili ko lanu uli; au ko tai ka i te vela o te fiva.

³¹Ne masani lagona ne au i konei a pese o te fiafia, Nei ko te tagi fanoanoa fua tenei e lagona ne au.