Read Te Tusi Tapu I Te Gana Tuvalu Lomiga Lua IOPU 31 Bible Online

IOPU 31 - Te Tusi Tapu I Te Gana Tuvalu Lomiga Lua bible

IOPU 31

¹Ko oti ne fai ne au se tautoga malu, ke mo a e kilo oku mata ki se fafine mo toku loto lailai.

²Se a te mea a te Atua Malosi e fai ki a tatou? E taui pefea ne ia a faifaiga a tino?

³E aumai ne ia a puapuaga mo te fakamasei ki a latou kola e fai mea 'se.

⁴E iloa ne te Atua aku mea katoa e fai; e lavea ne ia oku auala katoa.

⁵Au e tauto me ne seki fai eiloa ne au ne amioga masei, Kae seki fakaloiloi foki eiloa ne au a nisi tino.

⁶Te Atua ke fua ne ia au i fua mea mafa kola e tonu katoatoa, kae ka iloa ne ia i au e se 'se.

⁷Kafai au ne kalo keatea mai i te auala tonu, Io me ne tautali au i te masei, Kafai ko fonu oku lima i te agasala,

⁸Ko 'tau ei o tuku atu aku lakau kaina ke fakamaseigina, Io me o'mai a tino o kai a mea ne toki ne au.

⁹Kafai au ne manako ki te avaga a toku tuakoi, Kae ne muni au o fakatalitali ki ei i tua o tena mataloa,

¹⁰Ko tuku atu la ei taku avaga ke 'tunu ne ia a meakai a te sua tagata kae ke 'moe i te moega o te sua tagata.

¹¹A vaega amioga masei pena e tau o fakasala ki te mate.

¹²Ka pela me se afi fakamataku tela e sunu ei aku mea katoa.

¹³Kafai se tavini a aku e tagi mai ki a au, Me e isi se mea e se malie ei, Au e fakalogologo eiloa ki tena tagi, Kae e fai eiloa ne au ki ei a te mea tonu.

¹⁴Kafai ne seki fai ne au, e mafai la pefea ne au o fakafesagai te Atua? Ne a aku pati ka fai manafai ko vau te Atua o fakamasino au?

¹⁵A te Atua ne faite ne ia a au, ko te Atua foki tena ne faite ne ia taku tavini.

¹⁶E seki ai se taimi kai ita ei au ma fesoasoani ki tino mativa; E seki tuku tiaki foki eiloa ne au a fafine ko mate olotou avaga ke nofo puapuaga;

¹⁷E seki tiakina foki eiloa ne au a tamaliki ko mate olotou matua ke olo mo te fiakai i te taimi e kai ei au.

¹⁸Ne saga eiloa au o tausi a latou kona i aso ne ola ei au.

¹⁹Kafai ne maua ne au se tino mativa tela ko se maua eiloa ne ia o togi ne gatu mo ia,

²⁰E ave eiloa ne au ki ei a laugatu ne faite ki vulu, Ko vulu mai aku mamoe. Tena la, ko tavae ei ne ia a au mo tena loto katoa.

²¹Kafai ne fakaloiloi ne au se tamaliki ko seai ne ana matua, Me e iloa ne au i au e mafai o manumalo i te fono tulafono,

²²Ko tau la ei o fatifati aka oku lima, Kae ke 'to keatea foki mai i oku tuauma.

²³Ona ko au e mataku i te fakasalaga a te Atua, Tena te pogai e se mafai ei ne au o fai se vaega mea pena.

²⁴Au ne seki talitonu eiloa ki te aoga o koloa

²⁵Io me fakamatamata i toku maumea.

²⁶E seki tapuaki foki eiloa au ki te la ona ko tena mainaga io me ko te masina ona ko tena gali.

²⁷E seki mafuli eiloa au o fakaaloalo ki ei, O sogi oku lima o fakaasi toku fakaaloalo ki ei.

²⁸A te vaega agasala pena e tau o fakasala ki te mate; E fakaseaoga ne ia te Atua Malosi.

²⁹E seki ai eiloa se taimi kai fiafia ei au manafai e puapuaga oku fili, Io me katakata manafai ko maua latou ne fakalavelave;

³⁰E seki agasala eiloa au i te agasala ko te talo ke mate oku fili.

³¹A tagata katoa kola e galue i a au, e iloa ne latou me e tali lei faeloa ne au a tino fakaalofa.

³²E aumai ne au a tino faimalaga ki loto i toku fale, Kae seki tuku eiloa ne au latou ke moe i auala.

³³A nisi tagata e taumafai o funa olotou agasala, Ka ko au e se mafai ne au o funa aku agasala.

³⁴Au e seki mataku eiloa ki muna a tino e taumafai o fai; Au e seki nofo mū eiloa io me nofo i loto i fale, Me i a au e mataku i olotou gutu kotekote.

³⁵E a, e seai se tino e fakalogo mai ki aku muna konei e fai atu? Au e tauto atu me i muna kona e tonu katoa. Te Atua Malosi ke tali mai ki aku muna ne fai. Kafai ne fakamau ki lalo a te molimau o aku fili o teke ki a au, Ko te mea ke lavea ne au,

³⁶Kaati e fakamau eiloa ne au mo te fakamatamata i toku tuauma kae na i toku ulu e pela me se kalauna.

³⁷Ka fakamatala ne au ki te Atua aku mea katoa ne fai, Kae ne fanatu au ki mua o te Atua mo toku ulu e fakatutonu eiloa ki luga.

³⁸Kafai ne kaisoa ne au a te laukele tenei e toki ne au Io me ne puke ne au mai i tino kola e o latou tonu te laukele;

³⁹Kafai ne kai ne au a fuaga o lakau e ola i kona kae tuku a tino toki lakau kola ne toki ne latou ke fia'kai,

⁴⁰Ko tau la ei ke ola fua i kona a mouku mo lakau makaikai, Kae ke se ola i ei ne saito mo kalite. Ko gata i kona muna a Iopu.