Read Te Tusi Tapu I Te Gana Tuvalu Lomiga Lua IOPU 36 Bible Online

IOPU 36 - Te Tusi Tapu I Te Gana Tuvalu Lomiga Lua bible

IOPU 36

¹Kufaki mai o fakalogologo mai ke tai leva malie, ki aku muna konei ka fai atu, E fai ei au mo sui o te Atua.

³A toku iloa e lasi; ka fakaaoga ne au te mea e iloa ne au o fakaasi atu i te Atua tela ne faite ne ia a au e fai mea tonu.

⁴E seai se muna loi e fai ne au; Ko matea mai ne koe i ou mua te tinā tagata poto.

⁵A te Atua se Atua e malosi! E se sona takalialia ki se tino; E seai se mea e se oko ki ei tena malamalama.

⁶E se talia ne ia a tino agasala ke ola faeloa, Kae e fai faeloa ne ia te mea tonu ki tino mativa.

⁷E puipui ne ia a tino amiotonu; e talia ne ia ke pule latou e pela me ne tupu kae ke fakaaloalogina ki te se gata mai.

⁸Kae kafai ko saisai a tino ki seni, o fakapuapuaga ona ko olotou mea ne fai.

⁹Ko fakaasi atu ei ne te Atua ki a latou olotou agasala mo olotou uiga fakamatamata.

¹⁰E fai ne ia latou ke fakalogo ki tena folafolaga ke fulitua latou ki te agasala.

¹¹Kafai e fakalogo latou ki te Atua kae tavini atu ki a ia, Kae ka ola latou i se olaga maumea kae filemu.

¹²Kae kafai e se fakalogo latou, ko latou ka mate i te lotou valea kae olo atu ki te lalolagi o tino mate.

¹³A tino kola e se talitonu ki te Atua, e tumau faeloa te lotou kaitaua, Kae kafai e fakasalagina latou, e se ka'laga foki eiloa ki se fesoasoani.

¹⁴E mate latou kae 'koi malosi, e ola fita i se olaga masiasi.

¹⁵Ka ko te Atua e fakapuapuaga ne ia a tagata ko te mea ke akoako latou i mea e tau o fai ne latou; E fakaaoga ne ia a mala ko te mea ke fakapula ei olotou mata.

¹⁶Ne fakasao koe ne te Atua mai i fakalavelave kae tuku ne ia koe ke ola i se olaga saogalemu, Kae fakafonu ne ia tau taipola ki meakai.

¹⁷Kae nei, koe ko fakasala ona eiloa ko au mea ne fai.

¹⁸Masaua ke mo a e fakakolekole gofie koe ne tino ki olotou koloa; Masaua foki ke mo a e faka'se koe ne koloa.

¹⁹Ka seai se aoga e kalaga ei koe mō se fesoasoani; Ka seai se mea e mafai ne koe o fai ke maua ei sou fesoasoani.

²⁰Sa manako ki te po ke oko mai, ko te taimi tena e ta fakapalele ei a malo.

²¹Masaua o sa fuli ki te masei; a tou puapuaga ne aumai ko te mea ke fakamao koe keatea mai i te agasala.

²²Masaua i te mana o te Atua e tafasili i te lasi; A ia ko te toe faiakoga tafasili eiloa i te maluga kae sili i faiakoga katoa.

²³E seai se tino e mafai ne ia o fakatonu te Atua ki mea e tau o fai ne ia io me lou ne ia i te Atua ne fai ne ia se mea masei.

²⁴A te Atua ne tavaegina faeloa i ana mea ne fai; E 'tau foki mo koe o tavae atu ki a ia.

²⁵Ko oti ne matea ne tino katoa a mea ne fai ne te Atua; Kae e seai se tino e malamalama faka'lei i ei.

²⁶E se mafai o iloa tonu ne tatou tena takutakua, E se mafai foki o lau ne tatou a tausaga o tena olaga.

²⁷Ko te Atua e avake ne ia a vai mai i te lalolagi kae fuli ne ia ke fai mo motiga ua.

²⁸E fai ne ia te vaiua ke to mai i kaumana mō tino katoa.

²⁹E seai se tino e iloa ne ia me e gasue pefea a kaumana, io me e 'pa pefea a fatili i te lagi, Te koga e nofo ei te Atua.

³⁰E faka'lapa ne ia uila i te lagi katoa, Ka ko koga 'poko o te moana e pouli faeloa.

³¹E fagai pena ne ia, kae aumai ne ia meakai e uke.

³²E taofi ne ia te uila ki ona lima kae fakatonu ne ia ke 'to tonu i te koga ne fakasino ke to i ei.

³³E folafola ne te fa'tili te kautaufa ka oko mai kae e iloa ne pulumakau me ka oko mai.