Read Te Tusi Tapu I Te Gana Tuvalu Lomiga Lua IOPU 37 Bible Online

IOPU 37 - Te Tusi Tapu I Te Gana Tuvalu Lomiga Lua bible

IOPU 37

¹E fai ne te kautaufa toku fatu ke tuki valevale.

²Fakalogo mai koutou katoa ki te leo o te Atua ki te fa'tili tela e vau mai i tena gutu.

³E fai ne ia te uila ke takato fakalava i te lagi, Mai i te sua kapakapalagi ki te sua kapakapalagi.

⁴Tena la ko te 'gulu eiloa o tena leo ko lagona atu, Ko te leo fakatupu o te fa'tili; Kae i te vaitaimi katoa tena, A te uila e lapalapa sale eiloa.

⁵E 'tupu a mea fakaofoofogia i te fakatonuga a te Atua, Ko mea fakaofoofogia kola e se mafai o malamalama tatou i ei.

⁶E fakatonu ne ia te kiona ke 'to ki te lalolagi, Kae faka'to ne ia vaiua 'lotu eiloa.

⁷E fakagata ne ia a galuega a tagata; E fakaasi ne ia ki a latou i a ia ko fai ana galuega.

⁸A manu vao ko olo ki olotou ana.

⁹A matagi o te afā e vau mai i saute, mo te 'moko masukisuki mai i matu.

¹⁰E fakaliu aisa ne te Atua a vai ki tena mānava, O fai eiloa ke makeke pela me ne poloka aisa.

¹¹A uila lapalapa mai i kaumana,

¹²I te taimi e gasue ei i te fakatonuga a te Atua. E fai ne latou a mea katoa e fakatonu mai ne te Atua, I kogā koga i te lalolagi.

¹³E aumai ne te Atua a vaiua mo fakasūsū te lalolagi; E mafai foki ne ia o aumai mo fakasala ei a tagata, Io me fakaasi ki a latou tena alofa.

¹⁴Iopu, mānava malie kae fakalogo mai; mafaufau aka ki mea gali kola e fai ne te Atua.

¹⁵E iloa ne koe me e fai pefea te fakatonuga a te Atua tela e ala ei o 'lapa mai a uila mai i kaumana?

¹⁶E iloa ne koe me ai a e tapeapea ei a kaumana i te lagi, Ko te galuega tena o te 'mana o te Atua?

¹⁷Ikai, a koe e puapuaga fua i te 'vela manafai ko vau te matagi mai saute o fakasauā te fenua.

¹⁸E mafai ne koe o fesoasoani ki te Atua i te folaaga o te lagi, Kae fai ke makeke e pela me se fiti ne fakamalapulapu?

¹⁹Akoako mai a muna e tau o fai ne matou ki te Atua? A omotou mafaufau ko seai ne mea i ei; Ko seai ne muna e tau o fai ne matou.

²⁰Au se manako ke faipati au ki te Atua; Ai a ka fai fua ei ne au se mea e ta ei ne ia a au?

²¹Nei, a te mainaga i te lagi ko oko eiloa i te maina, Ko tō maina, ko se maua ne matou o kilo ki ei; Ka ko te lagi ko mā, ko seai ne kaumana i ei, Me ko oti ne ave keatea ne te matagi.

²²A te mainaga malipolipo, pela mo te lanu o te aulo, E lavea atu i matu, ka ko matou ko ma'taku i te 'malu o te Aliki ko i luga i a matou.

²³A te 'mana o te Atua ko oko eiloa i te maluga, Tena te mea ko se mafai ei ne tatou o fakapilipili atu ki a ia; E amiotonu kae faimeatonu i ana faiga ki tagata.

²⁴Tela la, e tau eiloa te ma'taku o tino ki a ia. Kae e fakaseaoga ne ia a tino kola e fai pela i a latou e poto.