Read Te Tusi Tapu I Te Gana Tuvalu Lomiga Lua IOPU 38 Bible Online

IOPU 38 - Te Tusi Tapu I Te Gana Tuvalu Lomiga Lua bible

IOPU 38

¹A te Aliki ne faipati mai ki a Iopu mai i loto i te afā.

²Ko oi koe ke fakafesili ne koe toku poto ki au muna se aoga kona?

³Tu ki luga pela me se tagata o tali aku fesili konei e fesili atu.

⁴E a, ne nofo koe i te taimi ne faite ei ne au a te lalolagi? Kafai e lasi te mea e iloa ne koe, Ko fakamatala mai ke lagona atu ne au.

⁵Ko oi te tino ne fuafua ne ia te lasi o te lalolagi? Ko oi te tino ne fua ne ia te loa o te lalolagi? E a, e iloa ne koe a tali ki fesili katoa kona?

⁶Se a te mea tela e taofi ne ia a pou kola e tokai ki ei te lalolagi? Ko oi te tino ne fakatakato ne ia a te fatu tulimanu o te lalolagi?

⁷I te vaveao o te aso tena, ne usu pese fakatasi a fetu, Mo te kau o te lagi ne kalaga mo te fiafia.

⁸ Ko oi te tino ne pono ne ia a mataloa kola e taofi ei a te tai, I te taimi ne vau ei mai i loto i te lalolagi?

⁹Ko au ne ufi ne au te tai ki kaumana, kae fakapulupulu ne au ki te pouliga.

¹⁰Ne vase ne au te tuakoi o te tai, kae tuku atu ke taofi ne mataloa ne loka fakalei.

¹¹Ne fai au ki ei penei, “Tena tou gatamaiga! E tau ou galu malosi o gata i te koga tenei.”

¹²Iopu, kai fakatonu eiloa ne koe se aso ke liu vaveao i tou olaga katoa?

¹³Kai fakatonu eiloa ne koe a te vaveao ke puke ne ia te lalolagi, Kae lue ne ia ke to mai keatea a tino amio masei mai i olotou koga muni?

¹⁴A mauga mo vanu e matea lei i te mainaga o te ao, Pela me ne 'fetuga o gatu, e lavea fakalei pela mo te ata o se fakailoga a se tino i luga i te kele.

¹⁵A te mainaga o te ao ko tō maina ki tino amio masei, Kae taofi foki ei latou ke mo a e fakasaua.

¹⁶Kai oko eiloa koe ki koga kola e 'puna mai ei te tai i koga 'poko o te moana? Kai sasale eiloa koe i te takele papa o te moana?

¹⁷Kai fakaasi atu eiloa ne se tino ki a koe a mataloa kola e puipui ei te lalolagi o tino mate?

¹⁸E mata e iloa ne koe me e pefea te lasi o te lalolagi? Tali mai aku fesili manafai e iloa ne koe.

¹⁹E iloa ne koe me e vau mai i fea te mainaga, Io me se a te pogai o te pouliga?

²⁰E mafai ne koe o fakaasi ki a latou te 'mao e olo ei latou, Io me uga atu latou ke foki?

²¹E talitonu au me e mafai ne koe, me i a koe ko oko eiloa i tou matua, Kae ne nofo foki koe i te taimi ne faite ei te lalolagi!

²²Kai oko eiloa koe ki potu kola e 'teu ne au i ei a te kiona mo te vaiua fatu?

²³E tausi fakalei ne au ke fakaaoga i taimi o fakalavelave, Mo aso o taua.

²⁴Kai oko koe ki te koga tela e fanake ei te la, Io me ko te koga e agi mai i ei a te matagi mai i te saegala?

²⁵Ko oi te tino ne keli ne ia te alavai mō te vaiua 'lotu, Kae faka'ma keatea te auala o te kautaufa?

²⁶Ko oi te tino e fai ne ia te vaiua ke tō i te koga e seai ne tino e ola i ei?

²⁷Ko oi te tino ne fakasūsū ne ia te laukele malo kae fiainu, tenei ko ola aka ei a mouku?

²⁸E a, e isi ne tamana o te vaiua mo te sau?

²⁹Ko oi te matua o te aisa mo te kiona,

³⁰Tela e fuli ne ia te vai ke liu fatu kae fakaliu aisa ne ia a te tai?

³¹ E mafai ne koe o 'sai fakatasi a fetu ko Mataliki io me tala ne koe a te saiga tela e sai fakatasi ei a Melemele?

³²E mafai ne koe o takitaki a fetu i tau takitasi o te tausaga kae fakatonutonu ne koe te auala o fetu ko Pea Lasi mo Pea Foliki.

³³E iloa ne koe a tulafono o te lagi, kae e mafai ne koe o fakaaoga ke aoga ki te lalolagi?

³⁴E a, e mafai ne koe o fakatonu a kaumana ke fakato mai a vaiua ke siu pala'ki tou foitino?

³⁵Kafai e fakatonu atu koe ki te uila ke 'lapa, E mata e vau o fai atu i a ia ko toka o fai tau fakatonuga?

³⁶Ko oi e fakailoa ne ia ki te manu eva ko te ipisi[20] i te vaitafe ko te Naila ka lofia? Ko oi foki e fakailoa ne ia ki te moa tagata a te vaiua ko pili o tō?

³⁷Ko oi te tino e lasi tena poto ke mafai ne ia o lau a kaumana kae fulifuli ne ia ke tō mai ei te vaiua,

³⁸Te vaiua tela e fakamakeke ei te laukele?

³⁹E a, e sala ne koe a meakai ma leona, Kae fakamalie foki ne koe te fia'kai o punuā leona,

⁴⁰Manafai e muni i olotou ana, io me e fakatalitali i olotou pu?

⁴¹Ko oi e fagai ne ia a manu eva ko leveni, Manafai ko olo sale fua i te fiakai, Manafai e tagi mai olotou punua ki au ki ne meakai?