Read Te Tusi Tapu I Te Gana Tuvalu Lomiga Lua IOPU 39 Bible Online

IOPU 39 - Te Tusi Tapu I Te Gana Tuvalu Lomiga Lua bible

IOPU 39

¹E iloa ne koe te taimi e fanau i ei a kouti o mauga? Kai onoono eiloa koe ke fanau se tia vao?

²E iloa ne koe te leva o te taimi e tauave ei ne latou olotou tama? E iloa ne koe te taimi e fanau ei?

³E iloa ne koe te taimi ka ta'kato ifo ei o faka'to mai olotou tama ki te lalolagi?

⁴I te vao, a olotou tama e gasolo ake o malosi; E olo atu latou keatea, se toe foki mai.

⁵Ko oi ne avatu ne ia te saolotoga o asini vao? Ko oi ne ana fakasaolotogina kae tuku ke taka sale fua?

⁶Ne avatu ne au te vao ke fai mo koga e nofo ei latou, Kae tuku atu latou ke nofo i kogā koga laugatasi.

⁷E faka'mao latou keatea mai i fa'kai logoā, Kae seai se tino e mafai ne ia o faka'lata a manu kona kae fai ke galue.

⁸A mauga ko koga e kaikai ei latou, ko koga e salasala ei latou ki so se vao lauusiusi mo olotou kai.

⁹E mata e mafai se pulumakau vao o galue mō koe? E mata e talia ne ia o moe i tau falemanu i se po e tasi?

¹⁰E mata e mafai ne koe o 'sai se manu e tasi ki te lopu, Kae fai ne koe ke fakamalū te laukele? Io me fai ne koe ke 'toso ne ia te mea tofa laukele i au fatoaga?

¹¹E mafai ne koe o fakatuaga ki tena malosi, Kae fakamoemoe ke fai ne ia au galuega mafa?

¹²E fakamoemoe koe ke tau mai ne ia a fua o au fatoaga kae fakaputu mai ne ia au saito mai i te koga solo saito?

¹³E se faka'tau eiloa i te vave o te kapatā o kapakau o te manu ko te ositelite! Kae e seai se ositelite e mafai o eva pela me se matuku.

¹⁴A te ositelite e tuku ana fua i te laukele ko te mea ke fakavelavela i te vela o te one.

¹⁵E seai ne ona manatu me e mafai o laka ne se tino, io me se manu vao.

¹⁶E fai ana faiga e pela eiloa me e se o ia a fua, Kae e se manatu 'mafa ki te maumau o ana fitaga.

¹⁷Ko au ne fai ne au te manu tena ke valea, Kae seki ave ne au ki ei te poto.

¹⁸Kae kafai ko kamata o tele, ko mafai ei o kata ki so se solofanua mo te tino e sopo i ei.

¹⁹Iopu, ko koe ne fai ne koe a solofanua ke malosi kae tuku atu ki a latou a fulu ua gali?

²⁰Ko koe ne fai ne koe ke evaeva pela me ne se akelise kae fakamatakutaku a tagata ki olotou gulu?

²¹E tukeli ne latou a te laukele i te vanu; Kae tele ki loto i te taua mo olotou malosi katoa.

²²E se iloa ne latou te uiga o te mataku, E seai se pelu e mafai o fai ne ia latou ke toe ma'fuli mai.

²³A meatau kola e ave ne olotou tino i solofanua e gasuesue kae malāpu i te mainaga o te la.

²⁴A solofanua ko tele fa'kefu i mua me ko 'pole i te fia olo o taua; i te tagiga o pu, ka ko se mafai eiloa o 'tu malie.

²⁵E 'gulu latou i taimi katoa e tagi ei te pu; E mafai o iloa ne latou me e isi se taua e fai kae seki pilipili atu eiloa latou ki te koga tena e fai ei te taua, Kae e lagona ne latou a ofisa e fai olotou fakatonuga.

²⁶E a, e fakaakoako ne koe a te manu ko te oka ke eva i te taimi e fola ei ona kapakau faka'saga ki saute?

²⁷E mata e fakatali eiloa te aeto ki se fakatonuga mai i a koe, Ko fatoa faite ei sena ofaga i koga maluga i luga i mauga?

²⁸E fai tena fale i kaupapa maluga, kae fai ne ia a papa tu makaikai mo fai tena olo fakalafi.

²⁹Mai i kona, e onoono ei a ia ki koga pili mai mo koga 'mao ki ne manu ke tamate o kai.

³⁰ A aeto e maopoopo fakatamilo i foitino 'mate, Ka ko punuā aeto e inu i toto o manu 'mate kona.