Read Te Tusi Tapu I Te Gana Tuvalu Lomiga Lua IOPU 4 Bible Online

IOPU 4 - Te Tusi Tapu I Te Gana Tuvalu Lomiga Lua bible

IOPU 4

¹Iopu, e mata e ita koe manafai e faipati atu au? Ko se mafai ne au o taofi toku fia faipati atu.

³E tokouke tino ne akoako ne koe, E tokouke foki tino ne fakamalosi ne koe a olotou loto.

⁴Kafai se tino ko pakū, ko vaivai kae fita, Ko au muna e toe maua ei ne ia a te malosi.

⁵Nei, ko koe ko puapuaga, ko se maua ne koe o fakafesagai tou puapuaga me i a koe ko manavase.

⁶A koe e tapuaki ki te Atua, a tou olaga foki, e seai eiloa se pona i ei; Tela la, e tau mo koe o talitonu kae fakamoemoe i a koe e toe lei eiloa.

⁷Toe fakasolo aka ou mafaufauga ki taimi ko teka. Taku mai se tagata amiotonu ne maua ne puapuaga.

⁸Ko oti ne lavea ne au a tino fai amioga masei, Kae toki ne latou te amio masei pela me ne fuataga; Kae ne fua mai i ei ko te masei foki eiloa.

⁹Ne ta fakapalele latou ne te Atua i tena kaitaua, Pela me ne tino ne fue ne se kautaufa.

¹⁰A tino masei ko gulu pela me ne leona, Kae ne fakagata ne te Atua olotou gulu, Kae fatifati foki olotou nifo.

¹¹Ko pela latou me ne leona kola ko seai ne manu e ta ne latou mo olotou kai, E 'mate atu latou ka ko olotou tamaliki ko salalau valevale.

¹²I te taimi e tasi, e isi se fekau ne oko mai ki a au i se leo foliki, Ko oko eiloa i te foliki o te leo tela ko tai se lagona eiloa ne au.

¹³ Ko se lei eiloa taku moe ne fai ne te mea tena, Ko pela eiloa me se moemiti.

¹⁴Ne pole toku foitino kae fakamakali'lili; A toku foitino katoa ko pole eiloa i te mataku.

¹⁵E isi se matagi foliki ne poko mai ki oku mata, Kae ne fiti oku kili i te mataku.

¹⁶E isi se mea e lavea ne au e tu mai i te koga tela; Ne faka'toka atu oku mata, Kae e se lavea lei ne au me se a te mea tena. Tena, kae lagona ei ne au a te leo penei:

¹⁷“E a, e isi se tino e mafai o taku amiotonugina i mua o te Atua, Io me 'ma katoatoa i mua o te Atua tela ne faite ne ia a ia?

¹⁸A te Atua e se fakatuaga ki ana tavini fakatelagi E isi foki ne mea 'se e maua ne ia i ana agelu.

¹⁹I tau fakatau, e talitonu a ia ki se manu ne faite ki one, Ki se mea ne faite ki te pefu, Tela e mafai fua o tuki ke palapala pela me se mogamoga?

²⁰A te tagata e mafai o ola i te taeao, se leva kae mate, Kae e se iloa ne tino ke oko eiloa ki te afiafi.

²¹A mea katoa a ia, ko ave tasi mo ia; ko mate atu a ia, Kae e seki maua eiloa ne ia a te poto.”