Read Te Tusi Tapu I Te Gana Tuvalu Lomiga Lua IOPU 42 Bible Online

IOPU 42 - Te Tusi Tapu I Te Gana Tuvalu Lomiga Lua bible

IOPU 42

¹Tena, kae tali atu foki a Iopu ki te Aliki.

²Te Aliki, e iloa ne au me e o koe te 'mana mo te malosi katoatoa, Kae mafai foki ne koe o fai a mea katoa e manako koe ki ei.

³ Ne fai mai koe ki a au me se a te fekau ne fia poto atu ei au ki a koe, i a au se tagata valea fua. Au ne faipati ki mea e se malamalama ei au, Ki mea fakaofoofogia e se oko ki ei toku iloa.

⁴ Ne fai mai koe ki a au ke fakalogologo ki a koe e faipati mai, kae ke taumafai au o tali au fesili.

⁵I te taimi ko teka ne iloa ne au a koe i tala a tino, kae nei ko lavea eiloa ne au a koe ki oku mata.

⁶Tela la, au ko oko eiloa i te ma i aku pati katoa kola ko oti ne fai. Au ko salamo mo toku loto katoa.

⁷I te otiga ne faipati a te Aliki ki a Iopu, ne faipati atu ei ki a Elifasa penei, “Au ko kaitaua ki a koe, pena foki ki ou taugasoa kona e tokolua, me e seki faipati ne koutou te mea tonu e uiga ki a au, e pela mo taku tavini ko Iopu ne faipati ne ia te mea tonu.

⁸Puke mai ne pulumakau tagata e fitu kae fitu mamoe tagata o ave ki a Iopu, kae ofo mai mo fai te taulaga a koutou. Ka talo a Iopu mo koutou, kae ka tali ne au tena talo, ko se fakamasiasi ei ne au koutou, ka ko koutou ne tau eiloa o fakamasiasigina. E seki faipati ne koutou te mea tonu e uiga ki a au, e pela mo ia ne faipati ne ia te mea tonu e uiga ki a au.”

⁹Ne fai eiloa ne Elifasa, Pilitati mo Sofala a te mea tela ne fakatonu atu ne te Aliki ki a latou, tena la, ne tali mai eiloa te Aliki ki te talo a Iopu.

¹⁰ I te otiga o te talo a Iopu mō ona taugasoa kola e tokotolu, tena kae toe fakamaumea a ia ne te Atua, kae avatu ki a ia e lua taimi te uke atu o ana mea i te taimi nei i lo ana mea mua.

¹¹Ne o'mai katoa a taina mo tuagaene o Iopu, mo ona taugasoa mua, o fai 'kaiga mo ia i tena fale. Ne fakaasi mai te lotou alofa, kae fakamafanafana mai e uiga ki fakalavelave kola ne aumai ne te Aliki ki a ia. Ne tofu katoa latou mo mu tupe mo mama aulo takitasi o tuku ma Iopu.

¹²Ne fakamanuia ne te Aliki te vaega fakaoti o te olaga o lopu, e silia atu i te fakamanuiaga muamua. A mea a Iopu ne maua fakamuli nei, e sefulufa afe mamoe, e ono afe kamela, e lua afe pulumakau, kae afe asini.

¹³E tokofitu ana tamaliki tagata, kae tokotolu tama fafine.

¹⁴Ne fakaigoa ne ia te tamaliki fafine matua ko Iemaima, te tokolua ko Kesia, ka ko te tamaliki fafine fakaoti ko Kelena Hapuka. [22]

¹⁵E seai eiloa ne fafine i so se koga o te lalolagi e 'gali pela mo tamaliki fafine a Iopu. Ne avatu ne te lotou tamana ne vaega o latou, fakatasi mo olotou tuagaene i ana koloa.

¹⁶Ne toe ola atu eiloa Iopu i tausaga e selau fasefulu; ne lavea ne ia ana mokopuna, pela foki tamaliki a ana mokopuna.

¹⁷Ne mate atu a ia ka ko toeaina eiloa.