Read Te Tusi Tapu I Te Gana Tuvalu Lomiga Lua IOPU 9 Bible Online

IOPU 9 - Te Tusi Tapu I Te Gana Tuvalu Lomiga Lua bible

IOPU 9

¹E tonu, ko oti ne lagona ne au a mea katoa kona muamua. E mafai pefea o manumalo se mataupu a se tagata e teke atu ki te Atua?

³Ko oi te tino e mafai o fakakinau mo te Atua? E mafai faeloa ne ia o tuku mai a fesili e afe, Ko fesili e se mafai lele eiloa ne se tino o tali.

⁴A te Atua e tafasili tena poto mo tena mana; E seai se tino e mafai o fakafesagai ki te Atua.

⁵E mafai faeloa ne ia o faka'gasue a mauga kae seai se fakailoaga; E ofa ne ia a mauga i tena kaitaua.

⁶E aumai ne te Atua a mafuie, kae lulu ne ia a te laukele; E fakagasue ne ia a pou kola e tokai ei te lalolagi.

⁷E mafai ne ia o taofi te la ke se fanake; E pela foki mo fetu ke se maina i po.

⁸E seki ai se tino ne fesoasoani ki te Atua i te folaaga o te lagi; Io me ko te lakalakaga o te tua o te manu fekai o te tai. [9]

⁹ Ne fakatulaga ne te Atua a fetu i te lagi, Ko Pea Lasi, ko Melemele, ko Mataliki, mo fetu o saute.

¹⁰E se mafai tatou o malamalama i ana mea e fai; E seai se gatamaiga o ana vavega.

¹¹A te Atua e fakasili aka i oku tafa, Kae e se mafai o lavea ne au a ia.

¹²E puke ne ia so se mea e manako a ia ki ei, Kae seai se tino e mafai o fakagata ne ia; E seai se tino e mafai o fesili ki ei penei, “Ne a au mea e fai?”

¹³A te kaitaua o te Atua e tumau. E tukipala ne ia ona fili kola ne fesoasoani Ki te manu fekai o te tai Ko Lahapa[10] o teke ki te Atua.

¹⁴Tela la, ne a aku pati e mafai ei au o tali atu ki te Atua?

¹⁵E ui eiloa i a au e se se, Kae e tau foki eiloa mo au o fakamolemole ki te Atua toku famasino ke alofa mai ki a au.

¹⁶Kae kafai foki e talia ne ia ke faipati au. Kae e iloa ne au me e se fakalogologo mai ki a au.

¹⁷E aumai ne ia a kautaufa ke fakalogofiofio ei au, Kae tela la, seai se mea se a aku ne fai.

¹⁸E se manako eiloa a ia ke ola lei au; Ko fakafonu ne ia toku olaga ki te mae.

¹⁹E a, ka taumafai au o fakaaoga te fai malo? O fai malo te Atua? E a, ka ave ne au a ia ki te fono? Ko oi te tino e mafai ne ia o fai te Atua ke fano ki te fono?

²⁰Au e se agasala kae tumau toku fakamaoni, Ka ko aku pati e fai, e pela me ko agasala ei au. Mo muna katoa e fai ne au e pela me ka malaia fua i ei au.

²¹Au e se agasala, kae e se afaina, Au ko se fia saga ki ei. Au ko fita i te ola. Ko seai se mea e mafaufau mafa au ki ei; Faitalia me agasala me e se agasala, Ka ko tatou e ta fakapalele eiloa ne te Atua.

²³Kafai e mate fakavave se tino se agasala, Kae kata te Atua.

²⁴A te lalolagi ne tuku ne te Atua ki tino amio masei. Ne fai ne ia a famasino katoa ke kivi. Kafai la e seki fai ne te Atua, ko oi ne fai ne ia?

²⁵A oku aso ko tele faka'sili i oku tafa, E seai eiloa se aso e lei.

²⁶A toku olaga ko vave eiloa pela mo te poti makini eiloa, E pela eiloa mo te aeto tela e eva ifo o po te lapiti.

²⁷Kafai au e kata kae taumafai o fakapuli toku mae; Kae ko toe foki mai oku puapuaga o fakalavelave au. E iloa ne au i te Atua e taofi pela i a au e agasala.

²⁹Ona ko manatu koutou pela i a au e agasala, Se a fua la te mea ka saga atu ei au o fakasao au?

³⁰E seai se sopu e mafai o fakama ne ia aku agasala.

³¹E 'pei au ne te Atua ki loto i te lua e fonu i mea masei; A oku gatu ko ma foki i a au.

³²A te Atua moi se tino, e penei e mafai ne au o fakafesagai; E mafai foki ne au ke olo maua ki te fono ke fa'kaiku ei te kinauga a maua.

³³Ka ko te fakalavelave, me e seai se tino e mafai o tu i te ma va; E seai se tino e mafai ne ia o fakamasino maua mo te Atua.

³⁴Te Atua, fakagata aka toku fakasalaga ne koe! Faka'mao atu au mea fakamataku!

³⁵Au se mataku. Au ka faipati, me e iloa eiloa ne au toku loto.