Read Te Tusi Tapu I Te Gana Tuvalu Lomiga Lua SALAMO 103 Bible Online

SALAMO 103 - Te Tusi Tapu I Te Gana Tuvalu Lomiga Lua bible

SALAMO 103

¹[131] Toku agaga, tavae atu ki te Aliki! Toku foitino katoatoa, tavae atu ki tena igoa tapu!

²Toku agaga, tavae atu ki te Aliki, Kae sa puli foki te lasi o tena alofa.

³E fakamagalo ne ia aku agasala katoa, Kae faka'lei foki ne ia oku masaki katoa.

⁴E fakasao ne ia au mai te tanuga, E fakamanuia foki ne ia au ki tena alofa mo tena alofa 'nau.

⁵E fakafonu ne ia toku olaga ki mea 'lei, Ko te mea ke tumau faeloa toku tamataene mo toku malosi pela mo se aeto.

⁶A te Aliki e fakamasino mo te alofa ki tino puapuagatia, Kae tuku ne ia ki a latou a te saolotoga tonu.

⁷Ne taku atu ne ia ki a Mose ana fuafuaga, Ke matea foki ne tino Isalaelu ana galuega 'mana.

⁸ A te Aliki e alofa kae alofa 'nau, E tuai o ita, kae fonu i te alofa tumau.

⁹E se fakasala soko ne ia a tino; E se tumau foki tena ita ki te se gata mai.

¹⁰E se fakasala ne ia tatou e tusa mo 'tou amio masei, E se taui mai foki ne ia 'tou agasala mo 'tou mea 'se.

¹¹E pela mo te maluga o te lagi mai te lalolagi, E pena eiloa te lasi o tena alofa ki tino kola e ma'taku ki a ia.

¹²E pela mo te 'mao o te saegala mai te togala, E pena foki te fakamao ne ia otou agasala mai i a tatou.

¹³E pela mo te alofa o te tamana ki ana tamaliki, E pena foki te alofa o te Aliki ki tino kola e ava ki a ia.

¹⁴E iloa ne ia a te mea ne faite ki ei tatou, E manatua foki ne ia i a tatou ne pefu.

¹⁵Ka ko tatou, e 'pau tou olaga mo mouku, E tupu ake tatou kae lauolaola e pela me se pula o te lakau i te vao;

¹⁶E agi atu ki ei te matagi, ko te mea eiloa ko galo, E seai eiloa se tino e toe lavea atu ne ia.

¹⁷Ka ko te alofa o te Aliki ki tino e fakaaloalo ki a ia, E tumau ki te se gata mai; A tena atafai e tumau ki kautama katoa,

¹⁸Pela foki ki tino kola e tausi ki tena feagaiga Kae fakamaoni o faka'logo ki ana tulafono.

¹⁹E fakatu ne te Aliki a tena nofogaaliki i te lagi; A ia ko te tupu o mea katoa.

²⁰Tavae atu ki te Aliki, koutou agelu ma'losi mo te 'mana, Kola e faka'logo ki ana fakatonuga mo ana muna.

²¹Tavae atu ki te Aliki, koutou mea malosi katoa i te lagi, Mo koutou foki tavini kola e fai tena loto!

²²Tavae atu ki te Aliki, ana mea ola katoa i so se koga e pule ei a ia. Toku agaga, tavae atu ki te Aliki!