Read Te Tusi Tapu I Te Gana Tuvalu Lomiga Lua SALAMO 104 Bible Online

SALAMO 104 - Te Tusi Tapu I Te Gana Tuvalu Lomiga Lua bible

SALAMO 104

¹Toku agaga, ke tavae atu koe ki te Aliki! Te Aliki toku Atua, ko oko eiloa koe i te maluga! E fai mo ou gatu te vikiga mo te malu fakatupu;

²Ko pulupulu koe ki te mainaga. Ne 'fola ne koe a te lagi e pela mo se faleie,

³kae ne faite ne koe tou fale i vai i luga.[132] E fai a kaumana mo fai au kaliota, Kae sopo foki koe i kapakau o te matagi.

⁴ E fakaaoga ne koe a matagi mo fai au ave‐fekau, Kae fai mo au tavini a uila.

⁵Ne fakatu ne koe te lalolagi ke mautakitaki i luga i ona fakavae, Ko te mea ke se toe gasuesue.

⁶Ne fakatakato ne koe te moana i luga o te lalolagi e pela me se gatu 'loa, Ka ko te vai ne ufi ne ia a mauga.

⁷Kafai e makonokono koe ki vai, Ko te mea loa ko tele keatea; Ne vave o tele latou keatea i te lagonaga ne latou a tau fakatonuga 'mafa.

⁸E tafe mai latou mai luga i mauga ki lalo i vanu, Ki te koga ko oti ne fai ne koe mo latou.

⁹Ne fakatuakoi ne koe a vai ke se tafe valevale, Ko te mea ke se toe lofia te lalolagi.

¹⁰Ne fai ne koe a vaipuna ke tafe ifo ki vanu, Mo vaitafe foki i va o mauga.

¹¹E avatu ne latou te vai e inu ei manu o te vao; Pena foki a asini o te vao, e fakamalie ki ei te lotou fiainu.

¹²A lakau e tu pili atu ki ei, E fai ei a ofaga o manu kae usu olotou pese.

¹³E faka'to ifo ne koe te vaiua mai te lagi ki luga o mauga, Mo te lalolagi ko 'fonu i au fakamanuiaga.

¹⁴E fakaola ne koe te mouku ma pulumakau, Mo lakau kaina foki mo te tino Ke mafai ne ia o toki ana fatoaga,

¹⁵Ke maua ei a te uaina e fakafiafia ei a ia, Mo te sinu olive e fakamata fiafia ei a ia, Mo te falaoa e fakamalosi ei a ia.

¹⁶E lasi te vaiua e maua ne alasi o Lepanona; Ko lakau tonu eiloa a te Aliki ne toki ne ia.

¹⁷E ofaga i kona a manu lele; Ka ko matuku e fai olotou ofaga i luga i lakau ko pelosi.

¹⁸A kouti vao e 'nofo i mauga maluga, Ka ko manu e igoa ki patia e muni i kaupapa maluga.

¹⁹Ne faite ne koe te masina e fakailoga ei a masina; Mo te la foki e iloa ne ia tena taimi e tō ei.

²⁰Ne fai ne koe te po, kae i te pouliga Ne takakau ei a manu katoa o te vao.

²¹A punuā leona e tagi'tagi i te salasalaga ki olotou meakai, E salasala ki meakai kola ne fakatoka ne te Atua mō latou.

²²Kafai e sae ake te la, ko 'foki ei latou o takato i olotou ana;

²³Ka ko tino ko olo o fai olotou galuega Ke oko atu eiloa ki te afiafi.

²⁴Te Aliki, ko oko eiloa te uke o mea ne fai ne koe! Ko oko foki eiloa i te poto o tau faitega o mea katoa kona! A te lalolagi ko 'fonu i au mea ola.

²⁵E isi te moana, e lasi kae lauefa, E nofo i ei a mea ola e se lausia, Ko mea ola 'lasi mo mea ola foliki.

²⁶ E fo'lau sale ei a vaka, kae tafao sale foki i ei a Leviatana, Ko te ika lasi tena o te tai ne fai ne koe.

²⁷A mea katoa kona e fakalogo'lago atu katoa ki a koe, Ke avatu ne koe ki a latou a meakai i taimi e fia'kai ei latou.

²⁸E avatu ne koe a meakai ki a latou, ko 'kai ei latou; E fakatoka ne koe a meakai, ke makona ei latou.

²⁹Kafai e se saga mai koe ki a latou, e ma'taku latou; Kafai ko fakagata ne koe olotou manava, ko mate ei latou, Ko 'foki atu ei ki te pefu tela ne faite ei latou.

³⁰Kae kafai e toetuku atu ne koe te manava ki a latou,[133] Ko toe ola ei latou; Me aumai ne koe te ola fou ki te lalolagi.

³¹Ke tumau eiloa te 'malu o te Aliki ki te se gata mai! Ke i te Aliki te fiafia ona ko ana mea ne fai!

³²Ka kilo atu a ia ki te lalolagi, ko te mea eiloa ko gatete, Kafai e fakapatele atu a ia ki mauga, Ko te mea eiloa ko pusa ake te au mai i a latou.

³³Ka pese atu au ki te Aliki i toku olaga katoa; i aso katoa e ola ei au, ka tavae atu faeloa au ki toku Atua.

³⁴Ke fiafia mai a ia ki taku pese, Me i toku fiafia e maua mai i a ia.

³⁵Ke fulu faka'ma atu tino agasala mai te lalolagi; Ke se toe iai i te lalolagi! Toku agaga, ke tavae atu koe ki te Aliki! Tavae atu ki te Aliki!