Read Te Tusi Tapu I Te Gana Tuvalu Lomiga Lua SALAMO 105 Bible Online

SALAMO 105 - Te Tusi Tapu I Te Gana Tuvalu Lomiga Lua bible

SALAMO 105

¹Fakafetai atu ki te Aliki, takutaku atu tena 'malu; Kae fakailoa atu ki fenua ana mea ne fai.

²Usu vikiga ki te Aliki; Taku atu mea fakaofoofogia katoa ne fai ne ia.

³Ke fiafia koutou i a tatou e o ia; Ke fiafia tino katoa kola e tapuaki atu ki a ia.

⁴Salasala atu ki te Aliki mo se fesoasoani; Kae tapuaki atu ki a ia i taimi katoa.

⁵A koutou ne fanau a Apelaamo, tena tavini; Mo koutou te fanau a Iakopo, tena tino tokotasi ne filifilia; Manatua vavega a te Atua ne fai, pela foki mo ana fakamasinoga ne tuku mai.

⁷Te Aliki ko te Atua o tatou; Ana fakatonuga e mō te lalolagi kātoa.

⁸Ka fakamaoni eiloa a ia ki tena feagaiga ki te se gata mai, Ana feagaiga kona e mo te afe o kautama.

⁹ Pela foki mo te feagaiga ne fai ne ia mo Apelaamo, Mo tena tautoga ki a Isaako

¹⁰ Ne fai ne te Aliki te feagaiga mo Isalaelu ke oko ki te se gata mai.

¹¹Ana muna, “Ka avatu ne au mo koe te fenua o Kanana; Ka fai mo ou tofi.”

¹²E se tokouke tino o te fenua o te Atua, Me i a latou ne tino fou ki te fenua o Kanana.

¹³Ne olo sale latou mai te sua fenua ki te sua fenua, Mai te sua malo ki te sua malo.

¹⁴ Kae ne seki tuku atu ne te Atua se tino ke 'teke mai ki a latou, kae ne polopoloki 'mafa ne ia a tupu o fenua fakaatea mo te 'lei o latou:

¹⁵“Mo a ma oko otou lima ki aku tavini filifilia; Sa fakasaua ki aku pelofeta.”

¹⁶ Ne tuku atu ei ne te Aliki te oge ki te lotou fenua, Kae ave katoa keatea olotou meakai.

¹⁷ Ne mua o uga atu ne ia a Iosefa Tela ne fakatau atu ne latou pela me se pologa.

¹⁸ Ne 'sai ana vae ki seni, Mo te kola fiti e fakamau i tena ua,

¹⁹Ke oko eiloa ki te fakataunuga o te valoaga tena. E fakamaoni a muna a te Aliki i a ia e tonu.

²⁰ Tela, fakasaoloto atu ei a ia ne te tupu o Aikupito; E fakasaoloto foki a ia ne te pule o malo.

²¹ Ne tuku ne ia a ia ke pule i tena malo, Kae ne fai foki a ia mo pule i te fenua katoa.

²²E pule katoatoa foki a ia i ofisa a te tupu, Ne tuku atu foki te pule malosi ke fakatonu ne ia tino fesoasoani a te tupu.

²³ Tena, fano ei a Iakopo ki Aikupito, O nofo tumau i ei.

²⁴ Ne tuku atu eiloa ne te Aliki tena fenua ke fanafanau, Kae fai ne ia latou ke tupu malosi atu i olotou fili.

²⁵Kae ne fai foki ne ia tino Aikupito ke loto ma'sei ki Tena fenua kae fakapologa foki ne latou ana tavini.

²⁶I te taimi eiloa tena, uga ei ne ia a Mose, tena tavini, Mo Alona ne filifili ne ia.

²⁷Ne fai ne laua a galuega 'mana a te Atua Mo vavega foki i Aikupito.

²⁸ Ne fakapouli tagataga ne ia a te fenua, Ka ko tino Aikupito ne seki fakalogo eiloa ki ana fakatonuga.

²⁹ Ne fakaliu toto ne ia olotou vaitafe, Ne 'mate katoa ei olotou ika.

³⁰ Ne fakafonu te lotou fenua ki lane, Pela foki mo te palesi o te tupu.

³¹ Ne fai te fakatonuga a te Atua, Tela ne fakafonu ei te fenua katoa ki lago mo kutu.

³² Ne faka'to ifo ne ia te vaiua fatu mo uila ki luga i te fenua, Kae ne taofi ne ia te vaiua ke se to ifo;

³³Ne fakamasei ne ia olotou vine mo mati, Ne fatifati foki ne ia ki lalo a lakau.

³⁴ Ne fai te fakatonuga a ia ko te mea loa ko oko mai a sē akelise, Ko se lausia eiloa te aofaki o latou;

³⁵Ne kai ne latou a lakau katoa i te fenua; Ne kai foki ne latou a fuataga katoa o lakau.

³⁶ Ne tamate ne ia a toekimua tagata o kaiga katoa o Aikupito.

³⁷ Fakamuli ifo, taki ei ne ia a te fanauga a Isalaelu keatea mai Aikupito; Ne ave ne latou a siliva mo aulo, Kae ne malosi faeloa latou kae olaola 'lei.

³⁸I te taimi ne 'teka atu ei latou keatea, ne fiafia tino Aikupito, Me e mataku latou i tino Isalaelu.

³⁹ Ne aumai ne te Atua te kaumana mo fakamalumalu latou, Mo te afi e fakamaina ei latou i po.

⁴⁰ Ne fia'kai latou, aumai ei ne te Aliki a manu eva e igoa ki salu; Ne avatu ne ia a meakai mai te lagi mō fakamalie te lotou fiakai.

⁴¹ Ne 'fo ne ia te papa kae puna mai ei te vai, Ko tafe atu ei ki loto i te toafa e pela me se vaitafe.

⁴²Ne manatua ne ia tena feagaiga 'malu ki a Apelaamo tena tavini.

⁴³Ne 'taki atu eiloa ne ia tena fenua keatea; Ne usuusu olotou pese, Kae kalaga fia'fia.

⁴⁴ Ne tuku atu ne ia a fenua o tino fakaatea ke fai mo latou, Ke fai foki olotou fatoaga mo latou,

⁴⁵Ko te mea ke fakalogo tena fenua ki ana tulafono, Kae tausi foki ne latou ana fakatonuga. Ke viki atu koutou ki te Aliki!