Read Te Tusi Tapu I Te Gana Tuvalu Lomiga Lua SALAMO 106 Bible Online

SALAMO 106 - Te Tusi Tapu I Te Gana Tuvalu Lomiga Lua bible

SALAMO 106

¹ Ke 'viki atu koutou ki te Aliki! Fakafetai atu ki te Aliki me 'lei a ia; A tena alofa e se gata mai.

²Ko oi te tino e mafai o taku atu a mea sili katoa ko oti ne fai ne ia? Ko oi e mafai ne ia o tuku atu a tavaega e katoatoa 'lei ki a ia?

³Amutia latou kola e fakalogo ki ana fakatonuga, Kae fai mea tonu faeloa.

⁴Te Aliki, manatua mai au i taimi e fesoasoani ei koe ki tou fenua; i taimi e fakaola ei ne koe latou, ke aofia foki au i ei.

⁵Fakaasi mai ke matea ne au te maumea o tou fenua, Ke manuia foki au i te manuia o latou, Ke iai foki au i te fiafiaga o latou kola e o koe.

⁶A matou ne agasala e pela mo omotou tupuga; A matou ne tino masei kae amio masei.

⁷ A omotou tupuga i Aikupito ne seki maina latou i uiga o galuega fakaofoofogina a te Atua; Ne puli i a latou te alofa o te Atua tela ne fakaasi ki a latou i taimi e uke, Ne 'teke foki ne latou te Atua Malosi i te Tai Kula.

⁸Kae ne fakaola latou ne te Atua pela mo tena feagaiga ne fai, Ke fakaasi ei tena 'mana sili.

⁹ Ne fai tena fakatonuga ki te Tai Kula, Ko te mea loa ko 'masa pakupaku; Ne 'taki atu ne ia tena fenua i loto i ei pela eiloa me se laukele malō.

¹⁰Ne faka'sao ne ia latou mai tino kola e ita ki a latou; Ne fakaola ne ia latou mai olotou fili.

¹¹Ne ma'lemu olotou fili i te tai; E seai lele se tino e tokotasi o latou ne sao.

¹² Tela, talitonu ei latou ki tena feagaiga, Usu ei ne latou a pese tavae ki a ia.

¹³Kae ne vave o puli i a latou a mea a te Aliki ne fai, Ne fai mea e loto latou ki ei, kae seki fakatali ki se fakatonuga mai i a ia.

¹⁴ Ne 'fonu olotou loto i manakoga e uke i te vao, Kae tofotofo ne latou te Atua;

¹⁵Ne avatu ne ia a mea ne ma'nako mai ki ei latou, Kae fakatupu ake ei ne ia a te famai fakamataku i a latou.

¹⁶ Ne loto ma'sei latou ki a Mose i te vao, Pela foki ki a Alona, te Tavini 'malu a te Aliki.

¹⁷Ne mavae te laukele, folo ei ne ia Tatano, Tanumia ei foki Apelamo mo tena kaiga;

¹⁸Kae ne fanaifo te afi ki tino ne tautali atu ki a laua, kae ka 'suni katoa ei tino amio ma'sei.

¹⁹ Ne faite ne latou te pulumakau aulo i Sinai, Kae tapuaki ki ei;

²⁰Ne fesuiaki ne latou te 'malu o te Atua Ki te fakatusa o te manu kai mouku.

²¹Ne puli i a latou te Atua tela ne fakasao ne ia latou Ki ana galuega 'mana i Aikupito.

²²Ko oko eiloa te fakaofoofogina o mea ne fai ne ia i Aikupito! Pela foki mo mea ne fai ne ia i te Tai Kula!

²³Tela, faipati ei te Atua me ka fakamalaia ne ia tena fenua, Ka ko Mose, tena tavini filifilia, ne tu atu i mua o te Atua e tusa mo te fakalavelave tena, Ko te mea ke taofi tena ita, ke se fakamalaia tena fenua.

²⁴ Tela la, ko se manako latou ki te fenua gali, Me ne se tali'tonu latou ki te folafolaga a te Atua.

²⁵Ne mui'mui latou ki te Atua i loto i olotou faleie, Kae ko se fia fakalogo latou ki te Aliki.

²⁶Tena, polopoloki malosi atu ei a ia ki a latou Me ka 'ta ne ia latou ke 'mate i te vao,

²⁷ Kae fakasalalau olotou fanau i fenua fakaatea, Ko te mea ke 'mate latou i fenua kona.

²⁸ Tela la, ko kau atu a te fenua o te Atua ki te tapuakiga ki a Paala i Peolo, Kae kai latou ki taulaga e ofo atu ki atua 'mate.

²⁹Ne fakaitaita ne latou te Aliki ki olotou amioga masei, Poko ei latou ne te famai fakamataku.

³⁰Kae tu mai ei a Fineaso o fakasala ne ia a latou kola ne fai te mea tena, Ko te mea eiloa ko gata te famai.

³¹A te mea tenei, ko fai mo mea e manatua ei ne ia i tena alofa e se gata mai, Kae ka tumau eiloa pena tena alofa i taimi katoa.

³² Ne fakatupu foki ne latou te ita o te Aliki i te vai o Melipa, Kae ne oko te fakalavelave ki a Mose e pogai mai i a latou.

³³Ne fakaitaita ne latou a Mose, Tela faipati ei a ia ki muna e se 'tau o faipati ne ia.

³⁴ Ne seki tamate ne latou a tino o fenua fakaatea, E pela mo te fakatonuga a te Aliki ki a latou,

³⁵Kae ne fakatau avaga ki a latou, Kae fakaakoako ki tu mo amioga pouliuli a fenua kona.

³⁶A te fenua o te Atua ko tapuaki ki tupua, Tenei te mea ne mafua ei te fakamalaiaga o latou.

³⁷ Ne ofo atu olotou fanau mo fai a taulaga ki atua fapaupau o Kanana;

³⁸ Ko tamate ne latou a tamaliki e seai ne agasala, Ko masei valevale te fenua i te tamatega o tino kona.

³⁹Ko fai eiloa latou ne latou ke ma'sei i olotou amioga, Ka ko se fakamaoni foki ki te Atua.

⁴⁰ Tela, ita ei te Aliki ki tena fenua; Kae takalialia foki ki a latou.

⁴¹Ne tiaki atu ne ia latou ki te malosi o fenua fakaatea, Ko pule ei latou ne olotou fili.

⁴²Ne fakasauagina latou ne olotou fili, Takavale ei latou i olotou fili.

⁴³Ne fakasao ne te Aliki tena fenua i taimi e uke, Kae ne filifili faeloa ne latou a faiga e 'teke atu ei ki te Aliki, Tena la ko gasolo ei latou o 'galo ifo ki te matoluga o te agasala.

⁴⁴Kae ui eiloa i te mea tena, ka ne lagona eiloa ne te Aliki te lotou kalaga atu, Kae lavea mai foki ne ia te lotou puapuaga.

⁴⁵Tela, manatua ei ne ia tena feagaiga mo latou, Kae mai te lasi o tena alofa, Tena ne fuli ei tona mafaufau.

⁴⁶Ne fai ne ia tino kola e fakasaua atu ki a latou ke alofa atu ki a latou.

⁴⁷ Te Aliki te motou Atua, fakaola mai matou, Aumai keatea matou mai fenua fakaatea, Ko te mea ke fiafia matou o avatu fakafetai mo tavaega ki tou igoa tapu.

⁴⁸Ke 'viki atu tatou ki te Aliki, te Atua o Isalaelu; Tavae atu ki a ia nei ke oko ki te se gata mai! Kae ke kalaga tino katoa penei, “Amene!” Ke viki atu koutou ki te Aliki!