Read Te Tusi Tapu I Te Gana Tuvalu Lomiga Lua SALAMO 107 Bible Online

SALAMO 107 - Te Tusi Tapu I Te Gana Tuvalu Lomiga Lua bible

SALAMO 107

¹“Tuku atu te fakafetai ki te Aliki me 'lei a ia; A tena alofa e se gata mai!”

²A koutou katoa kola ne fakasao ne ia, Ke kau fakatasi mo au o tavae atu ki te Aliki. Ko oti ne fakasao ne ia koutou mai i otou fili,

³Kae ne fakafoki mai foki ne ia koutou mai fenua fakaatea, Mai te saegala mo te togala, mai matu foki mo saute.

⁴A nisi o koutou ne takase'se i te koga lavaki e seki 'laka eiloa i ei se vae, Kae ne seki mafai o maua se lotou auala ki se fa'kai o nofo i ei.

⁵A latou ne fiakai kae fiainu Ka ko seai lele eiloa se isi fakamoemoega.

⁶Ne ka'laga latou ki te Aliki i olotou puapuaga, Kae ne fakasao ne ia latou mai fakalavelave kona.

⁷Ne takitaki ne ia latou i te auala tonu Ki te fa'kai ka nofo ei latou.

⁸E 'tau o siki atu ne latou te fakafetai ki te Aliki e tusa mo tena alofa tumau, E tusa foki mo mea gali ne fai ne ia mo latou.

⁹A tino kola ne fiainu ne fainu ne ia Mo tino kola ne fiakai ne fakama'kona ne ia latou ki mea 'lei.

¹⁰A nisi ne ola i loto i te pouliga fakamataku o puapuaga, Ko pagota e ola fi'ta i pikifao ki seni,

¹¹Me ko oti ne 'teke ne latou a fakatonuga a te Atua Malosi, Ko oti foki ne se talia ne latou ana akoakoga.

¹²Ne fi'ta latou i galuega 'mafa; Ne 'siga ki lalo, kae seai se tino e fesoasoani ki a latou.

¹³Ne kalaga latou ki te Aliki i olotou puapuaga, Kae ne fakasao ne ia latou mai fakalavelave kona.

¹⁴Ne aumai ne ia latou keatea mai puapuaga o te pouliga fakamataku Kae ne 'tala foki ne ia a olotou pikifao seni.

¹⁵E 'tau o siki atu ne latou te fakafetai ki te Aliki e tusa mo tena alofa tumau, E pela foki mo mea fakaofoofogia ne fai ne ia mō latou.

¹⁶Ne lepe ne ia ki lalo mataloa palasi, Kae fatifati ne ia a fiti o mataloa.

¹⁷Ne ma'saki nisi o latou i olotou agasala, Ne puapuagatia foki i olotou amio masei;

¹⁸Ko seai se fia'kai i a latou, Me ko pili mai te mate.

¹⁹Ne ka'laga latou ki te Aliki i olotou puapuaga, Kae ne fakasao ne ia latou mai fakalavelave kona.

²⁰Ne fakalei ne ia olotou masaki ki ana muna, Kae ne fakasao ne ia latou mai te tanuga.

²¹E 'tau o siki atu ne latou te fakafetai ki te Aliki e tusa mo tena alofa tumau, E tusa foki mo mea fakaofoofogia ne fai ne ia mō latou.

²²E 'tau mo latou o tuku atu taulaga fakafetai ki a ia, Fakatasi mo pese o te fiafia, e taku atu ei ana mea katoa ne fai.

²³A nisi e fo'lau i vakamutu i luga i te vasa, E galue ke maua mea e tausi ei olotou olaga i luga i tai.

²⁴Ne lavea ne latou a mea ne fai ne te Aliki, Ko ana galuega fakaofoofogia i luga i te moana.

²⁵Ne tuku atu ne ia te fakatonuga, Ko te mea eiloa ko kamata o agi te afā lasi, Kamata ei foki o sou te moana.

²⁶A vakamutu ko se mafai eiloa o toka, me ko to sou te moana. A tino ko ma'taku i vaega fakalavelave pena;

²⁷A latou ne tai 'siga, kae takatipa'tipa e pela me ne tino ko'na; Ka ko se iloa foki ne latou o fai fakalei a galuega.

²⁸Ne kalaga latou ki te Aliki i olotou puapuaga, Ne fakasao ne ia latou mai fakalavelave kona.

²⁹Ne fai ne ia te afā lasi ke malū, A galu foki ko gasolo ifo eiloa o toka.

³⁰Ne fiafia latou me ko malū, Aumai ei latou ne ia ki te taulaga malu 'lei ne manako ki ei latou.

³¹E tau o siki atu ne latou te fakafetai ki te Aliki e tusa mo tena alofa tumau, E tusa foki mo mea fakaofoofogia ne fai ne ia mō latou.

³²E tau mo latou o folafola atu tena 'malu i te fakapotopotoga o tino, Kae tavae atu ki a ia i mua o te fono a toeaina.

³³Ko oti ne faka'masa pakupaku ne te Aliki a vaitafe, Kae taofi foki ne ia te tafe o vaipuna.

³⁴Ko oti ne fuli ne ia laukele ola ke fai mo laukele taitai i te vao, Ona ko te amio ma'sei o tino kola e nofo i ei.

³⁵Ko oti ne fuli ne ia a toafa ke fai mo koga e maua ei a vai, Mo kogā laukele malo ke fai mo vaipuna.

³⁶Ko oti ne tuku atu ne ia a tino fiakai ke 'nofo i kona, Kae faite ne latou se fa'kai mo nofo latou i ei.

³⁷Ne 'toki ne latou a kogā laukele kona ki fuagavine, Tela ne maua mai i ei fuagalakau e uke.

³⁸Ne fakamanuia ne ia tena fenua, tena ne maua ei ne latou tamaliki e tokouke; Ne seki mataku eiloa te lotou manuia i olotou lafu pulumakau.

³⁹Kafai ko fakatakavalegina kae fakamalalogina a tino o te Atua i puapuaga mo fakasauaga,

⁴⁰Ko fakaasi ei ne ia tena takalialia ki tino fakasaua kona, Kae ne fai ne ia latou ke takase'se i toafa seki 'laka ki ei se vae.

⁴¹Kae ne fakasao ne ia a tino sogea mai olotou puapuaga kona, Kae fakatokouke ake olotou kaiga pela me ne lafu manu.

⁴²Ko lavea ne tino amiotonu te mea tena, fiafia ei latou. Ka ko tino amio ma'sei katoa ko se faipati.

⁴³A latou kola e 'poto, ke mafaufau ki mea konei; Ke fakaasi atu ne latou te alofa tumau o te Aliki.