Read Te Tusi Tapu I Te Gana Tuvalu Lomiga Lua SALAMO 108 Bible Online

SALAMO 108 - Te Tusi Tapu I Te Gana Tuvalu Lomiga Lua bible

SALAMO 108

¹[134] Te Atua, toku loto ko tokagamalie! Au ka usu pese kae tavae atu ki a koe! Toku agaga, ala mai!

²Ala mai, taku kitala mo taku faili! Au ka ala ake i te taeao pogipogi o 'viki atu.

³Te Aliki, au e fakafetai atu ki a koe i mua o malo. Au e tavae ki a koe i mua o tino.

⁴A tou alofa tumau e oko atu ki luga i te lagi, Mo tou fakamaoni e oko atu ki te vanimonimo.

⁵Te Atua, fakaasi tou sili i te lagi, Mo tou 'malu i luga o te lalolagi kātoa.

⁶Faka'sao matou i tou malosi; tali mai ki taku talo, Ko te mea ke 'sao a tino kola e alofa koe ki ei.

⁷Ne faipati mai te Atua i tena faletapuaki, “Ko toku manumalo, ka vaevae ei ne au a Sekema, Kae tufatufa ne au a te Vanu o Sukota ki oku tino.

⁸E oku a Kileata mo Manase; A Efalaima ko toku pulou tau. Ka ko Iuta ko toku tokotoko fakatupu.

⁹Ka fai ne au a Moapi mo aku tanoa 'fano Kae ka 'pei oku taka ki luga i Etoma, Ke fai mo fakailoga me e oku a ia. Ka kalaga au mo te manumalo i luga o Filisitia.”

¹⁰Te Atua, ko oi ka ave ne ia au ki te fa'kai e 'pui faka'lei ki olo? Ko oi ka takitaki ne ia au ki Etoma?

¹¹E a, ne tiaki tonu eiloa ne koe matou? E se vau koe o olo tasi mo te motou kautau?

¹²Fesoasoani mai ki a matou o taua mo omotou fili; Me e se aoga lele se fesoasoani mai tino ola.

¹³E manumalo matou ma na fai e kau te Atua i a matou; Ka fakatakavale ne ia omotou fili.