Read Te Tusi Tapu I Te Gana Tuvalu Lomiga Lua SALAMO 109 Bible Online

SALAMO 109 - Te Tusi Tapu I Te Gana Tuvalu Lomiga Lua bible

SALAMO 109

¹[135] Te Atua, au e tavae ki a koe; Mo a ma se tali mai koe!

²A tino amio ma'sei mo tino 'loi ko o'mai o ta au. E fai olotou tala loi e uiga ki a au.

³Kae fai'pati fakamasei ne latou au, Kae e seai se pogai e ta ei au ne latou.

⁴E ui eiloa i toku alofa ki a latou, Kae 'teke mai faeloa ki a au Ka ko au e 'talo faeloa mō latou.

⁵E taui mai ne latou ki a au a toku 'lei ki te masei, Mo toku alofa ki te takalia'lia mai.

⁶Filifili ake se famasino amio masei ke fakamasino ne ia toku fili, Kae tuku atu se tokotasi mai i ana fili ke faka'se ne ia a ia.

⁷Fakamasino aka a ia ke 'se; Ke oko foki eiloa ki tena 'talo, ke lau ki agasala!

⁸ Ke vave mai foki te ikuga o ana aso; Ko te mea ke na sui se isi tino i tena galuega!

⁹Ko ana tamaliki ke seai se lotou tamana, Ka ko tena avaga ke nofo taka!

¹⁰Ke 'nofo fakaalofa ana tamaliki, kae ke fai latou mo tino akai mea kae 'nofo solo. Ka ke afuli foki keatea mai i nofoaga masei e nofo i ei latou!

¹¹A tino e kaitalafu a ia i ei, ke puke katoa ne latou ana mea totino, Kae ke maua foki ne tino fakaatea a mea e maua i tena galuega.

¹²Ke mo a e alofa atu se tino ki a ia; Ke mo a foki se tino e tausi ki ana tamaliki e ola fakaalofa.

¹³Ke 'mate katoa a tino e tupu mai i a ia, Kae ke se manatua tena igoa i te sua tupulaga.

¹⁴Ke manatua ne te Aliki te amio masei o ona tupuga, Mo a foki ma fakamagalo a agasala a tena matua.

¹⁵Ke manatua faeloa ne te Aliki olotou agasala, Ke fakapuli katoatoa foki eiloa latou!

¹⁶A te tino tena, e galo eiloa i a ia a te alofa; A tino mativa mo tino sogea mo tino e ola fakaalofa ne fakasaua kae tamate ne ia.

¹⁷A ia e fiafia o fetū a tino; ke fetugina foki a ia! E se fia fakamanuia ne ia se tino — ke se fakamanuiagina foki a ia!

¹⁸E faigofie fua i a ia o fetū se tino, e pela eiloa mo te faigofie i a ia o pei tena gatu; Ke 'foki atu ana muna fetū ki a ia e pela mo se vai e siu ei tena foitino, Ka ke 'su foki ki loto i ona ivi e pela mo se sinu!

¹⁹Ke pulupulu a ia ne muna fetū e pela mo se gatu, Ke pela foki mo se kafanoa e fusi i a ia!

²⁰Te Aliki, fakasala ake oku fili pena; Latou kola e fai'pati fakamasei ki a au!

²¹Te Aliki toku Atua, fesoasoani mai ki a au e tusa mo tau feagaiga, Kae fakasao mai au e tusa mo tou alofa atafai.

²²Au ko mativa kae fakaalofa; A toku 'mae ko oko ifo ki toku fatu.

²³Ko pili fua o galo atu au e pela mo te 'malu afiafi; Ko agina au e pela me se manu.

²⁴Ko vaivai oku tuli i te se lava o meakai, Au ko se aoga, na ko pakili fua mo ivi.

²⁵ Kafai e kilo mai a tino ki a au, o kata mai; E lulū fakatauemu mai olotou ulu.

²⁶Te Aliki toku Atua, fesoasoani mai ki a au; Fakasao mai au i tou alofa tumau!

²⁷Fai ake ke iloa ne oku fili Me ko koe e sao ei au.

²⁸Ka fetū au ne latou, ka ko koe ke fakamanuia mai au. Ke fakatakavale ne koe a latou kola e fakasaua mai.[136] Ka ko au, tau tavini, ke fiafia.

²⁹Ke fakamasiasi ne koe oku fili, Ke fakatusa te lotou masiasi e pela me se gatu 'loa e 'pei ei latou.

³⁰Au e kalaga fakafetai ki te Aliki; E tavae au ki a ia i te fakapotopotoga a te fenua,

³¹Me puipui ne ia a te tino mativa, Ka sao a ia mai tino kola e fakasala ne latou a ia ki te mate.