Read Te Tusi Tapu I Te Gana Tuvalu Lomiga Lua SALAMO 115 Bible Online

SALAMO 115 - Te Tusi Tapu I Te Gana Tuvalu Lomiga Lua bible

SALAMO 115

¹Ko koe fua e tokotasi, Te Aliki, ko koe fua tokotasi E 'tau o tavaegina kae se ko matou, E tusa mo tou alofa tumau mo tou fakamaoni.

²Ai a e fesili mai a malo ki a tatou penei, “Tefea te Atua o koutou?”

³A te motou Atua e nofo i te lagi; E pule eiloa a ia i mea e fai ne ia.

⁴A olotou atua ne faite ki siliva mo aulo, Ne faite ki lima o tino ola.

⁵E isi olotou gutu kae se mafai o faipati, E isi olotou mata kae se ile.

⁶E isi olotou taliga kae se 'logo, E isi olotou isu kae se 'sogi.

⁷E isi olotou lima kae 'mate, E isi olotou vae kae se mafai o sasale; E seai ne olotou leo.

⁸Ko latou kola ne faite ne latou a tupua kona mo tino katoa kola e talitonu ki ei, Ke pena eiloa latou mo tupua kona ne faite ne latou.

⁹Tali'tonu ki te Aliki, koutou tino Isalaelu. A ia e fesoasoani kae tausi ki a koutou.

¹⁰A koutou faitaulaga a te Atua, talitonu ki te Aliki. A ia e fesoasoani kae tausi ki a koutou.

¹¹A koutou katoa kola e tapuaki ki te Aliki, talitonu ki a ia. A ia e fesoasoani kae puipui ki a koutou.

¹²E masaua tatou ne te Aliki, kae fakamanuia foki ki a tatou; Ka fakamanuia ne ia a tino Isalaelu, Mo faitaulaga katoa a te Atua.

¹³ Ka fakamanuia ne ia a latou katoa kola e mataku ki a ia, E pau faeloa i a ia a tino maluga mo tino malalo.

¹⁴Ke avatu ne te Aliki ne tamaliki ma koutou, Ko koutou mo otou fanau!

¹⁵A te Aliki tela ne faite ne ia te lagi mo te lalolagi, Ke fakamanuia atu ki a koutou!

¹⁶A te lagi e o te Aliki tokotasi, Kae ne tuku atu ne ia te lalolagi ki tino.

¹⁷A te Aliki e se tavae ne tino 'mate, E se tavaegina foki ne tino ko i lalo i tanuga. [139]

¹⁸Ka ko tatou tino ola, ke fakafetai atu ki a ia, E kamata atu nei ke oko ki te se gata mai. Viki atu koutou ki te Aliki!