Read Te Tusi Tapu I Te Gana Tuvalu Lomiga Lua SALAMO 116 Bible Online

SALAMO 116 - Te Tusi Tapu I Te Gana Tuvalu Lomiga Lua bible

SALAMO 116

¹Au e alofa ki te Aliki, me ne talia ne ia au; Ne talia foki ne ia aku talosaga.

²E fakalogo mai ki a au, i taimi katoa e kalaga atu ei au ki a ia.

³Au ne mataku kae manavase, i te mea moi lavelave au i malei o te mate; Ko pili mai foki ki a au a te fakamataku o te tanuga.

⁴Tena ne kalaga atu ei au ki te Aliki penei, “Te Aliki, fakamolemole fakasao mai au!”

⁵A te Aliki e alofa kae aga 'lei; A te tou Atua e loto alofa.

⁶A te Aliki e tausi ki tino e ola fakaa'lofa; Ne fakasao ne ia au i taimi e maua ei au ne fakalavelave.

⁷Toku loto, koe ke toka me i te Aliki ne alofa mai ki a au.

⁸Au ne fakasao ne te Aliki mai te mate; Ne fakagata ne ia oku loimata Ne tausi foki ne ia au ke mo a ma takavale.

⁹Tenei la, au ko sasale i mua o te Aliki i te lalolagi o tino ola.

¹⁰ E ui eiloa i aku pati e fai i au ko takavale masei; Kae tumau eiloa toku talitonu ki te Aliki.

¹¹E tiga foki eiloa toku mataku mo aku pati e fai aka pela, “E seai se tino e talitonu au ki ei,” ka ko au e talitonu faeloa ki te Aliki.

¹²Se a taku mea ka avatu ma te Aliki Mo taui atu tena aga 'lei ki a au?

¹³Ka avatu ne au te taulaga ko te ipu uaina o te fakaolataga ki te Aliki, O fakafetai atu mō toku fakaolaga.

¹⁴I taimi e maopoopo ei ana tino katoa; Ka avatu ei ne au ki a ia a mea kola ne tauto au ki ei.

¹⁵Ko oko eiloa i te 'mafa ki te Aliki, Manafai ko mate se tino tokotasi tela e talitonu ki a ia.

¹⁶Te Aliki, au ko tau tavini, Au e tavini atu ki a koe e pela eiloa mo te tavini atu o toku matua. Ko oti ne fakasao ne koe au mai te mate.

¹⁷Ka avatu ne au se taulaga fakafetai, Ka 'talo atu foki au ki a koe.

¹⁸I te maopoopoga ou tino katoa i loto i tou Faletapu i Ielusalema Ka avatu ei ne au ki a koe te mea ne fai feagaiga au ki ei. Ke viki koutou ki te Aliki!