Read Te Tusi Tapu I Te Gana Tuvalu Lomiga Lua SALAMO 119 Bible Online

SALAMO 119 - Te Tusi Tapu I Te Gana Tuvalu Lomiga Lua bible

SALAMO 119

¹Amutia latou kola e 'ma faeloa olotou olaga, A latou e ola i te olaga pela eiloa mo tulafono a te Aliki.

²Amutia latou kola e tau'tali i ana fakatonuga, A latou e faka'logo mo olotou loto katoatoa ki a ia.

³E se masani o fai ne latou ne mea 'se; E sasale latou i auala o te Aliki.

⁴Te Aliki, ko oti ne tuku mai ne koe ki a matou au tulafono, Kae ne fai mai koe ke faka'logo matou mo te fakamaoni ki ei.

⁵E fakamoemoe au me ka tausi fakamaoni ne au au fakatonuga!

⁶Kafai e fakalogo au ki au fakatonuga, Ka se masiasi ei au.

⁷I taimi e akoako ei au ki au fakamasinoga tonu, Ka 'viki ei au ki a koe mo toku loto 'ma.

⁸Au ka fakalogo ki au tulafono; Sa tiaki mai ne koe au!

⁹E mafai pefea ne te tino koi tuputupu ake o tausi tena olaga ke 'ma? I te fakalogo ki au tulafono.

¹⁰Au e taumafai mo toku loto katoa o tavini atu ki a koe; Tausi mai ke mo a au e se fakalogo ki au tulafono.

¹¹Ko tausi ne au au tulafono i toku loto, Ko te mea ke se agasala atu au ki a koe.

¹²Te Aliki, a koe e tavae ne au; Akoako mai au ki ou ala.

¹³Ka folafola faeloa ne au mo te leo lasi au tulafono katoa kola ne tuku mai.

¹⁴E sili atu toku fiafia o tautali i au fakatonuga i lo te maua ne au a koloa e uke.

¹⁵E tauloto ne au au fakatonuga; E sukesuke foki ne au au akoakoga.

¹⁶Au e fiafia i au tulafono; Ka se puli foki i a au au fakatonuga.

¹⁷Alofa mai ki a au, i au ko tau tavini, Ko te mea ke ola au o fakalogo ki au akoakoga.

¹⁸Faka'pula aka oku mata, ko te mea ke iloa ne au te tonu mo te fakaofoofogina o au tulafono.

¹⁹E toetoe fua toku ola i te lalolagi nei; Sa funagina au tulafono mai i a au.

²⁰Ko fatifati toku loto i te manako malosi atu; Kae fia iloa ne au au fakamasinoga i taimi katoa.

²¹Fakatonu malosi ne koe a tino fakamata'mata; Fakamalaia atu latou kola e se tau'tali i au fakatonuga.

²²Fakasao mai au mai i olotou fatufatuga mo olotou muna fakatauemu, Me ko oti ne tausi ne au au tulafono.

²³Ko maopoopo a tino pule o fai se togafiti masei ki a au, Ka ko au e tauloto faeloa ki au akoakoga.

²⁴Au fakatonuga e fakafiafia ei au, e fakatonutonu mai foki ne ia a au.

²⁵Ko takato au mo te takavale i te pefu; Toe fakaola mai au e pela eiloa mo tau feagaiga.

²⁶Ne fakaasi atu ne au aku mea katoa ne fai, kae ne tali mai koe; Akoako mai au ki ou ala.

²⁷Akoako mai ke malamalama au i au tulafono, Kae ka mafaufau 'loto au ki au akoakoga 'gali.

²⁸Au ko takavale i te fanoanoa; Fakamalosi ake au pela eiloa mo tau feagaiga.

²⁹Tausi mai ke mo a ma fano au i te auala 'se; Mai i tou lei, akoako mai au ki au tulafono.

³⁰Ko oti ne tonu i a au ke fakalogo au ki a koe; Ko oti au ne fakalogo ki au fakamasinoga.

³¹Te Aliki, ko oti au ne tautali i au fakatonuga; Sa fakamasiasigina au.

³²Au ka fakalogo ki au fakatonuga mo te fiafia lasi, Me ka tai lasi atu toku malamalama ka aumai ne koe.

³³Te Aliki, akoako mai ki a au a te uiga o au tulafono, Kae ka fakalogo au ki ei i taimi katoa.

³⁴Fakamaina mai tau tulafono ki a au, kae ka fakalogo au ki ei; Ka tausi au ki ei mo toku loto katoa.

³⁵Takitaki mai au i auala o au tulafono, Mai i au tulafono ka maua ei ne au te fiafia.

³⁶Tuku mai ki au te fiafia o fakalogo ki au tulafono, i lo te manako ki koloa.

³⁷Tausi mai au keatea mai te sagatonu atu ki mea kola e se aoga; Alofa mai ki a au pela eiloa mo tau feagaiga.

³⁸Tausi tau feagaiga ki a au, ko tau tavini, Ko tau feagaiga tela ne fai ki a latou kola e fakalogo ki a koe.

³⁹Fakasao mai au i pati se 'lei kola e mataku au i ei; Ko oko eiloa i te fakaofoofogina o au fakamasinoga!

⁴⁰Au e manako o fakalogo ki au fakatonuga; Tuku mai foki ki au se ola fou, me i a koe e amiotonu.

⁴¹Te Aliki, fakaasi mai te lasi o tou alofa ki a au, Fakasao mai au e pela eiloa mo tau feagaiga.

⁴²Ka mafai ei ne au o tali atu ki a latou kola e ita mai ki a au, Me i a au e talitonu ki au muna.

⁴³Fai ne koe au ke mafai o faipati ki te mea tonu i taimi katoa, Me i toku fakamoemoega e i tau fakamasinoga.

⁴⁴Au ka fakalogo ki au tulafono i taimi katoa Ki te se gata mai, ki te se gata mai eiloa.

⁴⁵Au ka ola i te olaga saoloto, Me i a au e taumafai o fakalogo ki au akoakoga.

⁴⁶Ka se ma au o folafola atu au fakatonuga ki tupu.

⁴⁷Au e fiafia o fakalogo ki au tulafono, Me i a au e fiafia malosi ki ei.

⁴⁸Au e āva kae manako malosi ki au tulafono; Ka mafaufau 'loto au ki au fakatonuga.

⁴⁹E masaua ne koe tau feagaiga ki a au, tau tavini; Ko maua ne au mai i ei se fakamoemoega.

⁵⁰Au ne fakamafanafanagina mai oku puapuaga, Ne maua ne au te ola mai i tau feagaiga.

⁵¹A tino fakamata'mata ne fakatauemu mai ki a au, Kae ne seki tiaki ne au au tulafono.

⁵²Te Aliki, e masaua ne au au fakatonuga ne tuku mai ki a au i taimi ko teka, Kae e maua ne au a fakamafanafanaga mai i ei.

⁵³Au e kaitaua, manafai E lavea ne au a tino masei ko ofa au tulafono.

⁵⁴I toku olaga toetoe i te lalolagi nei, E fatu ne au a pese e uiga ki au fakatonuga.

⁵⁵Te Aliki, e masaua ne au koe i te po, Kae e mafaufau au ki au tulafono.

⁵⁶E maua toku fiafiaga i te fakalogo ki au fakatonuga.

⁵⁷Te Aliki, ko koe eiloa e manako katoatoa au ki ei; E tauto atu au me ka tausi ne au au tulafono.

⁵⁸Au ko fakamolemole atu ki a koe mo toku loto katoa, Alofa mai ki a au pela eiloa mo tau feagaiga!

⁵⁹Ko oti ne mafaufau au ki taku amio, Ka ko au e tauto atu i a au ka tautali ki au fakatonuga.

⁶⁰Au e vave o fakalogo ki au tulafono.

⁶¹Ko oti ne fakatoka ne tino ma'sei se malei mo oku, Kae e se puli eiloa i au au tulafono.

⁶²I te valuapo, au e ala o tavae koe ona ko au fakamasinoga tonu.

⁶³Au se taugasoa o tino katoa kola e tavini atu ki a koe, Mo latou katoa foki kola e fakalogo ki au tulafono.

⁶⁴Te Aliki, a te lalolagi ko fonu i tou alofa tumau; Akoako mai a au ki au tulafono!

⁶⁵Te Aliki, ko oti ne tausi ne koe tau feagaiga, A koe e atafai mai ki a au, i au ko tau tavini.

⁶⁶Tuku mai ki a au te poto mo te iloa, Me i a au e talitonu ki au tulafono.

⁶⁷Au e masani o fai mea 'se ka koi tuai au o fakasala ne koe, Kae nei ko fakalogo au ki au muna.

⁶⁸Ko oko eiloa i tou lei mo tou mata alofa, Akoako mai au ki au fakatonuga.

⁶⁹A tino fakamata'mata ne fai tala loi e uiga ki a au, Ka ko au e fakalogo ki au tulafono mo toku loto katoa.

⁷⁰A tino konei e seai se poto i a latou Ka ko au e fiafia faeloa i au tulafono.

⁷¹A taku fakasalaga se mea lei ki a au, Me ne fai ne ia ke tauloto ne au au tulafono.

⁷²A tau tulafono tela ne tuku mai ne koe, E silia atu tena aoga ki a au i lo tupe katoa i te lalolagi.

⁷³Ne faite ne koe au kae tausi fakalei au ne koe; Tuku mai ki a au te malamalama ko te mea ke tauloto ne au au tulafono.

⁷⁴A latou kola e ava ki a koe; Ka fia'fia manafai e lavea ne latou a au. Me i a au e talitonu ki tau feagaiga.

⁷⁵Te Aliki, e iloa ne au i au fakamasinoga e tonu, Kae ne fakasala ne koe a au me i a koe e fakamaoni.

⁷⁶Fakamafanafana mai au ki tou alofa tumau, E pela mo tau feagaiga ki a au, tau tavini.

⁷⁷Alofa mai ki au, ko te mea ke ola au, i a au e fiafia ki au tulafono.

⁷⁸Ke fakamasiasi ne koe a tino fakamatamata, me taku faka'se ne latou au; Kae pela mo au, ka mafaufau 'loto au ki au fakatonuga.

⁷⁹Ke o'mai ki au a latou kola e ma'taku ki a koe, Mo latou katoa kola e iloa ne latou au fakatonuga.

⁸⁰Ke katoatoa toku fakalogo ki au tulafono, Ko te mea ke sao au mai te masiasi o te takavale.

⁸¹Te Aliki, au ko fiu i te fakataliga ki a koe ke fakasao au; Au e talitonu faeloa ki tau muna.

⁸²Oku mata ko 'mae i te kilokilo atu ki mea ne tauto mai ei koe, Tela fesili ei au penei, “Ko afea e fesoasoani mai ei koe ki a au?”

⁸³Au ko se aoga e pela me se fagu uaina ko 'pei keatea, Ka ko au e seki puli eiloa i au au fakatonuga.

⁸⁴Se a foki te leva o te taimi e fakatali ei au? Ka fakasala ne koe afea a latou kola ne fakasaua mai ki a au?

⁸⁵A tino fakamata'mata kola e se faka'logo ki au tulafono, Ko oti ne keli ne latou a lua mo malei au.

⁸⁶E 'tonu katoatoa au tulafono, fesoasoani mai ki au, i a au ko fakasauagina ne tino ki olotou loi!

⁸⁷Toe itiiti ko taunu toku tamatega ne latou, Kae ne seki tiaki eiloa ne au au fakatonuga.

⁸⁸Alofa mai ki a au i tou alofa tumau, Ko te mea ke fakalogo au ki au tulafono.

⁸⁹Te Aliki, a tau muna ka tumau ki te se gata mai; E tumau i te lagi.

⁹⁰A tou fakamaoni e tumau i taimi katoa; Ko oti ne fakatu ne koe te lalolagi i tena tulaga, Kae ka tumau eiloa i ei.

⁹¹I tau fakatonuga ko tumau ei a mea katoa ki te aso nei, Me i mea katoa kona ko au tavini.

⁹²Moi se fai a tulafono mo fakavae o toku fiafia, Penei la, ko leva ne mate au i oku puapuaga.

⁹³Ka se tiaki eiloa ne au au fakatonuga, Me ola au i ei.

⁹⁴Au e o koe, fakaola mai au! Ko oti ne taumafai au o fakalogo ki au fakatonuga.

⁹⁵A tino masei ko fakatalitali o tamate au, Ka ko au e mafaufau 'loto ki au tulafono.

⁹⁶Ko oti ne iloa ne au i mea katoa e isi ne lotou gataga; Ka ko au fakatonuga fua e lei katoatoa.

⁹⁷Au ko oko eiloa i te fiafia ki au tulafono! E mafaufau au ki ei i te aso katoa.

⁹⁸Au tulafono e mau i a au i taimi katoa, E fai ne latou au ke poto atu i oku fili.

⁹⁹E sili atu a te mea e iloa ne au i lo oku faiakoga katoa, Me e maua oku mafaufauga mai i au fakatonuga.

¹⁰⁰E poto atu au i lo toeaina, Me i a au e fakalogo ki au fakatonuga.

¹⁰¹Ne seki fai ne au a amio masei katoa, Me i a au e manako o fakalogo ki tau muna.

¹⁰²Ne seki tiaki ne au au fakatonuga, Me i a koe ko toku faiakoga.

¹⁰³Ko oko eiloa te suamalie o au tulafono, E suamalie atu i te hani.

¹⁰⁴Ne maua ne au te poto mai i au tulafono, Tena te mea ko takalialia ei au ki amioga masei katoa.

¹⁰⁵A tau muna se moli e takitaki ne ia au, Se mainaga foki ki toku auala.

¹⁰⁶Ka tausi ne au taku feagaiga 'malu, Ke fakalogo au ki fakatonuga 'tonu.

¹⁰⁷Toku Aliki, ko oko eiloa i te uke o oku puapuaga, Tausi au ke ola pela eiloa mo tau feagaiga ko oti ne fai.

¹⁰⁸Te Aliki talia mai taku 'talo fakafetai; Kae akoako mai ki a au au fakatonuga.

¹⁰⁹Au e toka o tuku atu toku ola;[140] E seki puli i au au tulafono.

¹¹⁰A tino masei ko 'tao se malei mo oku, Ka ko au ne fakalogo faeloa ki au fakatonuga.

¹¹¹Au tulafono ko aku koloa tumau, Ko te fiafiaga o toku loto.

¹¹²Ko oti ne tonu i a au ke fakalogo au ki au tulafono, Ke oko ki te aso e mate ei au.

¹¹³Au e takalialia ki a latou kola e se fakamaoni atu ki a koe, Kae fiafia au ki au tulafono.

¹¹⁴A koe ko toku lafiga mo toku puipuiga; Au e fakamoemoe ki tau feagaiga.

¹¹⁵A koutou tino agasala, olo keatea mai i a au. Au ka fakalogo ki tulafono a toku Atua.

¹¹⁶E pela mo tau feagaiga, tuku mai ki a au te malosi ke ola au; Sa fakatukakigina au mai toku fakamoemoega!

¹¹⁷Puke mai ki a au ko au ke sao, Kae ka saga atu au ki au tulafono i taimi katoa.

¹¹⁸E tiaki ne koe latou kola e se fakalogo ki au tulafono; Ka se aoga olotou togafiti loi.

¹¹⁹E fai ne koe a tino masei katoa ke pela me ne kaiga, Ka ko au e fiafia ki au fakatonuga.

¹²⁰Au ko mataku ona ko koe; Au ko fonu i te mataku ona ko au fakamasinoga.

¹²¹Ko oti ne fai ne au te mea tonu mo te 'lei; Sa tiakina mai au ki oku fili!

¹²²Tauto mai i a koe ka fesoasoani mai ki a au, tau tavini; Sa tuku ne koe tino fakamatamata Ke fakatupu fakalavelave mai ki a au!

¹²³Oku mata ko 'mae i te 'pulaga ke oko mai tau fakaolataga, Ko te fakaolataga tela ne fai feagaiga mai ei koe.

¹²⁴Ke fai fakalei au ne koe ki tou alofa tumau, Kae akoako mai au ki au fakatonuga.

¹²⁵Au ko tau tavini, tuku mai te poto ki a au, Ke iloa ne au au akoakoga.

¹²⁶Te Aliki, ko oko ki tou taimi o fai se mea, Me i tino ko se fakalogo ki tau tulafono!

¹²⁷E sili atu toku fiafia ki au fakatonuga i lo aulo, Mo aulo tafasili foki i te 'lei.

¹²⁸Kae ko au ka tautali i au fakatonuga katoa; kae ita i auala se 'tonu katoa.

¹²⁹Ko oko eiloa i te gali o au akoakoga; Au e fakalogo ki ei mo toku loto katoa.

¹³⁰A te fakamatalaga o au akoakoga e maua mai ei te mainaga, E aumai ne ia te poto ki a latou kola e seai se atamai.

¹³¹Ko pusi toku manava, kae fakamaga toku gutu, Ona ko toku finafinau ki au fakatonuga.

¹³²Saga mai kae alofa mai ki a au, E pela mo tou saga tonu ki a latou kola e a'lofa atu ki a koe.

¹³³Tausi au ke mo a ma takavale e pela eiloa mo tau feagaiga; Sa fakatakavalegina au i te masei.

¹³⁴Fakasao mai au i a latou kola e fakasaua mai, Ko te mea ke fakalogo au ki au fakatonuga.

¹³⁵Fakamanuia mai au i toku nofo tasi mo koe, Kae akoako mai au ki au tulafono.

¹³⁶E ma'ligi oku loimata e pela me se vaitafe, Ona ko tino kola e se faka'logo ki au tulafono.

¹³⁷Te Aliki, a koe e amiotonu, E 'tonu foki au tulafono.

¹³⁸Au tulafono kola ko oti ne tuku mai ne koe, E lei katoatoa kae 'tonu.

¹³⁹A toku ita e 'ka mo se afi i loto i a au, Me i oku fili e seki 'saga atu ki au fakatonuga.

¹⁴⁰A tau feagaiga ko oko eiloa i te tonu! Ko oko eiloa toku fiafia ki ei!

¹⁴¹Au ko se taulia ka ko fakatauemugina, Kae se tiaki ne au au akoakoga.

¹⁴²A tau amiotonu ka tumau ki te se gata mai, Au tulafono e tonu faeloa i taimi katoa.

¹⁴³Au ko 'fonu i puapuaga mo te manava'se, Ka ko au tulafono e fakafiafia ei au.

¹⁴⁴Au fakatonuga e tonu faeloa ki te se gata mai; Tuku mai te malamalama i au tulafono, ke ola ei au.

¹⁴⁵Au e kalaga atu ki a koe mo toku loto katoa, Te Aliki, tali mai ko fakalogo ei au ki au fakatonuga!

¹⁴⁶Au e kalaga ki a koe; Fakasao mai au kae ka tausi ne au au tulafono.

¹⁴⁷Ka koi tuai o sae te la, au e kalaga ki a koe ke maua se fesoasoani; Au e fakamoemoe i tau feagaiga e taunu eiloa.

¹⁴⁸Au e moe alaala faeloa i te po katoa. E mafaufau 'loto au ki au fakatonuga.

¹⁴⁹Te Aliki, fakalogo mai ki a au e tusa mo tou alofa tumau; Fakaasi mai tou alofa 'nau, Kae tausi mai toku ola!

¹⁵⁰Ko gasolo o pili mai oku fili sauā, Ko latou kona e se tausi lele ki au tulafono.

¹⁵¹Te Aliki, a koe e pili faeloa ki a au, Au fakatonuga katoa e 'tonu.

¹⁵²Au ko leva ne akoako ki au fakatonuga; Ne fai ne koe au fakatonuga ke tumau ki te se gata mai.

¹⁵³Kilo mai ki oku puapuaga kae fakasao mai au i ei, Me ne seki tiaki ne au au tulafono.

¹⁵⁴Tausi toku talitonuga kae fakasaoloto ake au; Fakasao mai au pela eiloa mo tau feagaiga.

¹⁵⁵Ka seai se tino agasala e fakaola, Me se faka'logo latou ki au tulafono.

¹⁵⁶Te Aliki, e lasi tou alofa; Fakaasi mai tou alofa 'nau kae fakasao mai au!

¹⁵⁷E tokouke oku fili mo tino fakasaua ki a au, Kae se tiaki eiloa ne au te fakalogo ki au tulafono.

¹⁵⁸Au ko oko eiloa i te takalialia ma kilokilo ki a latou kola e gutu 'loi, Me e se faka'logo ki au fakatonuga.

¹⁵⁹Te Aliki, ko lavea ne koe toku fiafia ki au fakatonuga. A tou alofa e se mafai o fuli, tela la, fakasao mai au!

¹⁶⁰A te kano tonu o au tulafono ko te fai mea tonu, Au fakamasinoga tonu katoa e tumau.

¹⁶¹Au ne ta tauanoa fua ne tagata ma'losi, Ka ko au e fakaava eiloa ki au tulafono.

¹⁶²Ko oko eiloa toku fiafia ki au folafolaga, E fiafia pela eiloa mo te fiafia o se tino ko maua se koloa tāua.

¹⁶³Au e ita kae takalialia ki tala loi katoa, Ka ko au e alofa ki au tulafono.

¹⁶⁴E fakafitu o fakafetai atu au ki a koe i aso takitasi, E tusa mo au fakamasinoga 'tonu.

¹⁶⁵A latou kola e fiafia ki au tulafono e sao 'lei, Kae ka seai eiloa se mea e tatō latou i ei.

¹⁶⁶Te Aliki, e fakatalitali atu au ke fakasao mai au, Kae fai loa ne au mea kola e fakatonu mai koe ki ei.

¹⁶⁷Au e fakalogo ki au akoakoga; E fiafia au ki ei mo toku loto katoa.

¹⁶⁸Au e fakalogo ki au fakatonuga mo au akoakoga; E lavea ne koe mea katoa kola e fai ne au.

¹⁶⁹Te Aliki, taku tagi mō se fesoasoani ke oko atu ki a koe! Tuku mai te loto matala ki a au, e pela eiloa mo tau tautoga.

¹⁷⁰Fakalogo mai ki taku 'talo, Kae fakasao mai au e tusa mo tau feagaiga!

¹⁷¹Au ka viki faeloa ki a koe, i au e akoako ne koe ki au tulafono.

¹⁷²Au ka usu pese e uiga ki au tulafono, Me i au fakatonuga e 'tonu.

¹⁷³Ke toka koe o fesoasoani mai ki au i taimi katoa, Me i au e tautali i au fakatonuga.

¹⁷⁴Te Aliki, ko oko eiloa toku manako ki tou fesoasoani! E maua toku fiafia mai au tulafono.

¹⁷⁵Tuku mai te ola, ko te mea ke viki atu au ki a koe; Ko au fakatonuga ke fesoasoani mai ki a au.

¹⁷⁶Au e takasese pela me se mamoe ko galo; Tela la, vau o sala ake au, tau tavini me seki tiakina eiloa ne au au tulafono.