Read Te Tusi Tapu I Te Gana Tuvalu Lomiga Lua SALAMO 136 Bible Online

SALAMO 136 - Te Tusi Tapu I Te Gana Tuvalu Lomiga Lua bible

SALAMO 136

¹ Fakafetai atu ki te Aliki me i a ia e aga'lei, Ka ko tena alofa e se gata mai.

²Fakafetai atu ki a ia tela e tafasili i atua katoa; i tena alofa e se gata mai.

³Fakafetai atu ki te Aliki tela e tafasili i te malosi i aliki katoa; i tena alofa e se gata mai.

⁴Ko ia fua tokotasi e mafai o fai vavega lasi; i tena alofa e se gata mai.

⁵ Ne faite ne ia te lagi ki tena poto; i tena alofa e se gata mai;

⁶ Ne faite foki ne ia te lalolagi i luga o te moana 'poko; i tena alofa e se gata mai.

⁷ Ne faite ne ia te la mo te masina; i tena alofa e se gata mai;

⁸Ko te la ke pule ne ia te ao; i tena alofa e se gata mai;

⁹A te masina mo fetu ke pule ne latou te po; i tena alofa e se gata mai.

¹⁰ Ne tamate ne ia toekimua tagata o Aikupito; i tena alofa e se gata mai.

¹¹ Ne taki ne ia te fanauga a Isalaelu keatea mai Aikupito; i tena alofa e se gata mai;

¹²Ki tena lima malosi mo tena taganoa mafi; i tena alofa e se gata mai.

¹³ Ne vaelua ne ia a te Tai Kula; i tena alofa e se gata mai;

¹⁴Ne 'taki atu foki ne ia ona tino i loto i te koga tena; i tena alofa e se gata mai.

¹⁵Ne 'lemu ne ia a te tupu o Aikupito mo tena kautau; i tena alofa e se gata mai.

¹⁶Ne takitaki ne ia ona tino i te vao; i tena alofa e se gata mai.

¹⁷Ne tamate ne ia tupu ma'losi; i tena alofa e se gata mai.

¹⁸Ne tamate ne ia tupu takutakua; i tena alofa e se gata mai.

¹⁹ Ko Sekono, te tupu o Amoli; i tena alofa e se gata mai;

²⁰ Mo Oko te tupu o Pasana; i tena alofa e se gata mai.

²¹Ne tuku ne ia olotou laukele ki ona tino; i tena alofa e se gata mai.

²²Ne tuku ne ia ki tena tavini ko Isalaelu; i tena alofa e se gata mai.

²³Ne seki fakapuli ne ia tatou i taimi ne taka'vale ei tatou; i tena alofa e se gata mai.

²⁴Ne faka'sao ne ia tatou mai i o'tou fili; i tena alofa e se gata mai.

²⁵Ne tuku mai ne ia meakai ki tino katoa pela foki mo manu; i tena alofa e se gata mai.

²⁶Fakafetai atu ki te Atua i te lagi; i tena alofa e se gata mai.