Read Te Tusi Tapu I Te Gana Tuvalu Lomiga Lua SALAMO 138 Bible Online

SALAMO 138 - Te Tusi Tapu I Te Gana Tuvalu Lomiga Lua bible

SALAMO 138

¹[149] Ko fakafetai atu au ki a koe te Aliki, mo toku loto katoatoa; E usu atu ne au ou tavaega i mua o atua.

²E fakasaga atu oku mata ki tou Faletapu, O ifo atu kae viki atu ki tou igoa, e tusa mo tou alofa tumau mo tou fakamaoni, Me ko oti ne fakaasi mai ne koe i tou igoa mo au fakatonuga e tafasili i te maluga.[150]

³Ne tali mai koe i te taimi ne kalaga atu ei au, Ka ko tou malosi ne fakamalosi ei au.

⁴Te Aliki, a tupu katoa o te lalolagi ka 'viki atu ki a koe, Me ko oti ne lagona ne latou au folafolaga.

⁵Ka 'pese atu latou ki te Aliki mo ana galuega ne fai, Pela foki mo tena 'malu.

⁶E tiga eiloa tou 'mao ki luga, E tausi eiloa ne koe a latou kola e loto malalo; Ka ko latou kola e fakamata'mata E se mafai o 'muni mai i a koe.

⁷E tiga eiloa ne nikoi au ne fakalavelave, Ne puipui eiloa au ne koe. Ne 'teke atu ne koe oku fili fakamataku, Kae ne fakasao ne koe au ki tou malosi.

⁸Ka fai katoa ne koe mea kola ne tauto ei koe ki a au; Te Aliki, a tou alofa e tumau ke oko ki te se gata mai. Fakaoti te galuega tela ne kamata ne koe.