Read Te Tusi Tapu I Te Gana Tuvalu Lomiga Lua SALAMO 139 Bible Online

SALAMO 139 - Te Tusi Tapu I Te Gana Tuvalu Lomiga Lua bible

SALAMO 139

¹[151] Te Aliki, ko oti au ne sukesuke ne koe, ka ko iloa foki au ne koe.

²E iloa ne koe aku mea katoa e fai; E iloa 'mao mai ne koe oku mafaufauga.

³E lavea mai au ne koe, mafai au e galue io me malolo; E iloa katoa ne koe aku faifaiga.

⁴Koi tuai au o faipati, Ka ko leva ne iloa ne koe aku pati ka fai.

⁵Au e puipui ne koe mai oku feitu katoa; E tausi au ne koe ki tou malosi.

⁶A tou iloa i aku faiga ko to 'loto; E silia atu i toku malamalama.

⁷Tefea te koga ka tele au ki ei, ke galo au mai i a koe? Tefea te koga ka 'muni ei au mai ou mata?

⁸Kafai e fano au ki te lagi, a koe e nofo i ei; Kafai e moe au i te fenua o tino 'mate, e nofo foki koe i ei.

⁹Kafai e lele au ki tua atu o te saegala io me nofo i koga tafasili i te 'mao i te togala,

¹⁰E nofo foki koe i ei O takitaki au, E nofo foki koe i ei o fesoasoani mai.

¹¹E mafai ne au o fai ki te pouliga ke faka'muni au, io me ko te mainaga ke fuli ki te pouliga.

¹²A te pouliga ki a koe e se pouli, Ka ko te po e pau fua me se ao. A te pouliga mo te mainaga e pau faeloa i a koe.

¹³Ne faite ne koe a mea katoa i toku foitino; Ne faite ne koe au i te tinae o toku matua.

¹⁴Ko tavae koe ne au, me tau o ma'taku ki a koe a tino; E iloa ne au mo toku loto katoa, i au mea katoa e fai e fakaofoofogina kae gali.

¹⁵I te kamataga o te faitega o oku ivi, Ne sokosoko fakatasi i loto i te tinae o toku matua. Kae i taku tupuakega i te koga se matea tena, E iloa eiloa ne koe i au e nofo i ei —

¹⁶Ne matea mai au ne koe ka koi tuai au o fanau. A aso katoa kola ne fakatoka mo toku olaga, Ko oti ne fakamau i tau tusi, Ka koi tuai o kamata aso kona.

¹⁷Te Atua, e faigata mo au o malamalama i ou mafaufauga;[152] Me e se mafai o lau!

¹⁸Kafai e lau ne au, e uke atu i one; Ka ala ake au, au e fakatasi faeloa mo koe.

¹⁹Te Atua, au e manako ke tamate ne koe a tino amio ma'sei! Au e manako ko tino fakatupu taua ke se fakalavelave mai ki a au!

²⁰Ne faifai muna latou e uiga ki a koe; Kae muna masei foki ki tou igoa.

²¹Te Aliki, ko oko eiloa i toku se fiafia ki a latou kola e se fia'fia ki a koe! Au foki e ita ki a latou kola e 'teke atu ki a koe!

²²Ko oko eiloa i toku takalialia ki a latou, Ko taku ne au latou ko oku fili.

²³Te Atua, sukesuke mai au, ke iloa ne koe oku mafaufauga; Tofotofo mai au ke malamalama koe i aku faiga.

²⁴Sala ake me isi se mea masei i toku loto, Kae takitaki mai au ki te auala se gata mai.[153]