Read Te Tusi Tapu I Te Gana Tuvalu Lomiga Lua SALAMO 142 Bible Online

SALAMO 142 - Te Tusi Tapu I Te Gana Tuvalu Lomiga Lua bible

SALAMO 142

¹[156] Ko kalaga atu au ki te Aliki mō se fesoasoani; Au e fakatagi ki a ia.

²Ko fakaasi atu ne au ki a ia a mea e se fiafia au ki ei; Ko taku atu ne au ki a ia oku puapuaga katoa.

³Kafai au ka takavale, e iloa ne ia te mea e 'tau mo au o fai. I te auala tela e saele ei au, E isi se malei ne fakatoka ne oku fili mo tamate au.

⁴Ka kilo aka au ki oku tafa, E seai eiloa se tino e fesoasoani mai ki a au. E seai se tino e puipui ne ia au; E seai foki se tino e tausi mai ki a au.

⁵Te Aliki, ko kalaga atu au mō se fesoasoani; Te Aliki, ko koe fua toku lafiga; Ko koe fua e manako au ki ei i te olaga nei.

⁶Fakalogo mai ki taku fakatagi mō se fesoasoani, Me i au ko galo ki lalo i te loto vaivai. Fakasao mai au mai oku fili; Me ko tō malosi atu i au.

⁷Fakasao mai au mai oku puapuaga;[157] e tusa mo tou atafai mai ki a au, Tela ka viki atu ei au ki a koe i te maopoopoga o ou tino.