Read Te Tusi Tapu I Te Gana Tuvalu Lomiga Lua SALAMO 143 Bible Online

SALAMO 143 - Te Tusi Tapu I Te Gana Tuvalu Lomiga Lua bible

SALAMO 143

¹[158] Te Aliki, fakalogo mai ki taku talo! Fakalogo mai ki taku fakatagi! A koe e amiotonu kae fakamaoni, Tela la, tali mai ki a au!

² Sa tofotofo mai au, i a au ko tau tavini; E seai se tino e amiotonu i tau kilokiloga.

³Au ne fakasauā ne toku fili, Kae ne fakatakavale masei eiloa au ne ia. Ne 'pei ne ia au ki te fale puipui pouli, Tela ko pela ei au mo se tino ko leva ne mate.

⁴Au ko fakavaivai; Ko oko eiloa i toku fanoanoa.

⁵Ko masaua ne au aso ko teka, Ne mafaufau ei au ki au mea katoa ne fai, Ko fakamasaua ne au au galuega katoa ne fai.

⁶Ko sisi ake oku lima o 'talo ki ou mua; A toku agaga e fiainu ki a koe, e pela me se laukele malo e fiainu ki se vai.

⁷Te Aliki, tali mai nei ki a au! Ko seai eiloa soku fakamoemoega. Sa 'muni mai i a au, i a au ma to i te kau kola e olo ifo ki lalo i te fenua o tino mate.

⁸Fakamasaua mai ki a au tou alofa tumau i taeao katoa, Me i au e talitonu ki a koe. Aku talosaga e oko atu ki a koe; Fakaasi mai te auala e 'tau au o fano i ei.

⁹Te Aliki, au e fanatu ki a koe mō se puipuiga; Fakasao mai au mai oku fili.

¹⁰A koe ko toku Atua; Akoako mai au ke fai ne au tou loto. A koe ke alofa mai kae takitaki mai au ki se auala e sao ei au.

¹¹Te Aliki, fakaola mai au e pela mo tau tautoga; i tou aga'lei, e sao ei au mai oku puapuaga!

¹²Ona ko tou alofa mai ki a au, tamate aka la oku fili, Kae fakamalaia latou katoa kola e fakasauā mai ki a au, Me i a au ko tau tavini.