Read Te Tusi Tapu I Te Gana Tuvalu Lomiga Lua SALAMO 144 Bible Online

SALAMO 144 - Te Tusi Tapu I Te Gana Tuvalu Lomiga Lua bible

SALAMO 144

¹[159] Viki atu ki te Aliki toku 'puiga! Ne akoako ne ia au ke poto i te faiga o taua, Ne fakatoka foki ne ia au mo taua.

²Ko ia ko toku 'puiga mo toku lafiga, Ko toku malūga mo toku fakaola, tela e talitonu au me sao ei au. E tuku ne ia a malo mai i lalo o taku pulega.

³ Te Aliki, se a te tagata ke mafaufau 'mafa mai ei koe ki a ia; Se tino ola fua kae saga eiloa koe ki ei?

⁴A te tino e pela mo se laumatagi; Ona aso e pela fua me se ata e vave galo.

⁵Te Aliki, sae te lagi kae fanaifo ki lalo; Fakapatele ki mauga, kae ka pusa ake mai ei te ausaga.

⁶Faka'lapa uila, ke mafuta valevale ou fili; Fakalele mai au matasana, ke tele valevale latou.

⁷Kapa ifo ou lima, Futi ake au mai te moana poko, ke ola au; Fakasao mai au mai te malosi o tino fakaatea,

⁸Kola e se mafai o fai'pati ki te mea tonu, Kae loi faeloa ki olotou tautoga.

⁹Te Atua, ka usu atu taku pese fou; Ka ta atu ne au te kitala kae usu atu taku pese ki a koe.

¹⁰E tuku ne koe te manumalo ki tupu, Kae fakasao ne koe tau tavini ko Tavita.

¹¹Fakasao mai au mai oku fili sauā, Fakaola mai au mai malosi o tino fakaatea, Kola e se mafai o fai'pati ki te mea tonu, Kae loi faeloa ki olotou tautoga.

¹²Ke fai omotou tamaliki tagata talavou, Ke pela me ne lakau kola e tupu ake mo te malosi. Ke fai omotou tamaliki fafine ke fai mo pou taua kola e fakagaligali ki ei a matulimanu o se palesi.

¹³A omotou fale saito Ke fonu i vaega fuaga lakau valevale. A mamoe i omotou lau manafa, ke fanafanau i taki sefulu afe.

¹⁴A omotou pulumakau ke fanafanau faeloa, Ke mo a e isi ne manu e lele olotou tama io me galo. Ke seai ne tino e tagi mo te puapuagatia i omotou auala.

¹⁵Amutia te malo tela e fai ki ei a pati konei; Ke amutia a tino kola e fai mō latou te Atua ko te Aliki!