Read Te Tusi Tapu I Te Gana Tuvalu Lomiga Lua SALAMO 145 Bible Online

SALAMO 145 - Te Tusi Tapu I Te Gana Tuvalu Lomiga Lua bible

SALAMO 145

¹[160] Toku Atua mo toku tupu, ka folafola atu ne au tou 'malu; Ka tuku atu taku fakafetai ki a koe e se gata mai, e se gata mai eiloa.

²E fakafetai atu au ki a koe i aso katoa; Ka 'viki atu au ki a koe e se gata mai e se gata mai eiloa.

³Te Aliki e sili kae 'tau o faka'maluga ona vikiga; A tena malu e sili atu i te mea e iloa ne tatou.

⁴Au galuega ne fai ka vikia ne kautama katoa; Ka folafola atu ne latou au galuega 'mana.

⁵A tou 'mana mo tou maluga ka faipatigina ne tino, Kae ka mafaufau 'loto au ki au galuega fakaofoofogina ne fai.

⁶Au galuega 'mana ka faipatigina ne tino, Kae ka folafola atu ne au tou maluga.

⁷Ka fai'pati latou e uiga mo tou aga'lei, Kae usu pese e uiga ki tou alofa.

⁸Te Aliki e alofa kae alofa 'nau, E tuai o ita kae fonu i te alofa tumau.

⁹E aga'lei a ia ki tino katoa, E alofa a ia ki mea katoa a ia ne fai.

¹⁰Te Aliki, au manu katoa ne faite ka 'viki atu ki a koe, Ka ko ou tino ka fakafetai atu ki a koe.

¹¹Ka faipatigina ne latou te 'malu o tou malo, Kae tavae ne latou tou malosi,

¹²Ko te mea ke iloa ne tino katoa au galuega 'mana, Mo te 'malu fakatupu o tou malo.

¹³A tau pule e se gata mai, A koe foki ko te tupu e se gata mai. A te Aliki e fakamaoni ki ana feagaiga, Kae amiotonu i ana mea katoa e fai.

¹⁴E fesoasoani a ia ki a latou katoa kola e puapuagatia; E faka'tu ake ne ia latou katoa kola ne pakū.

¹⁵A mea ola katoa e 'kilo ki a koe mo te fakamoemoe, Me ka tuku ne koe meakai ki a latou mafai e ma'nako latou ki ei.

¹⁶E tuku ne koe ki ei a mea e lava mo latou, Kae fakamalie ne koe olotou manako.

¹⁷A te Aliki e amiotonu i ana mea katoa e fai, Ne fai ana galuega mo te alofa.

¹⁸E pili faeloa a ia ki a latou kola e ka'laga atu ki a ia, Kola e kalaga ki ei mo te loto fakamaoni.

¹⁹E tuku ne ia ki a latou kola e mataku ki a ia a mea katoa kola e ma'nako latou ki ei; E lagona ne ia olotou tagi, kae faka'sao ne ia latou.

²⁰E puipui ne ia latou katoa kola e alofa ki a ia, Kae ka fakamalaia ne ia a tino amio ma'sei.

²¹Au ka 'viki faeloa ki te Aliki; A meaola katoa e viki atu ki tena igoa tapu, Ke oko ki te se gata mai.