Read Te Tusi Tapu I Te Gana Tuvalu Lomiga Lua SALAMO 147 Bible Online

SALAMO 147 - Te Tusi Tapu I Te Gana Tuvalu Lomiga Lua bible

SALAMO 147

¹Viki atu koutou ki te Aliki! Se mea lei o usu atu a vikiga ki te tou Atua; E lei kae tonu te viki atu ki a ia.

²Ko toe atiake ne te Aliki a Ielusalema; Ko faka'foki mai ne ia latou kola ne ave fakapagota ki fenua fakaatea.

³Ka fakamafanafana ne ia latou kola e loto mafatia, Kae fusi ne ia olotou pa'kiaga.

⁴Ko oti ne fuafua ne ia te aofaki o fetu o te lagi, Kae fakaigoa ne ia a fetu takitasi.

⁵A te tou Aliki e malosi kae maluga; E se mafai o fuafuagina tena poto.

⁶Ka siki aka ne ia a tino loto maulalo; Kae tuki palapala ne ia ke ii ki lalo i te laukele a tino amio ma'sei.

⁷Usu atu a pese o vikiga ki te Aliki; Ta atu a pese ki te 'tou Atua i te kitala.

⁸Ne fakatofaki ne ia a kaumana i te lagi; Ne faka'to ne ia a vaiua ki te lalolagi, Kae fai ne ia a mouku ke ola i luga i mauga.

⁹Ne tuku ne ia meakai ki manu, Kae fagai ne ia a tama manu eva e igoa ko leveni, manafai e tagi atu ki a ia.

¹⁰E se fiafia a ia ki solofanua malosi, E se fiafia foki a ia ki sotia 'toa;

¹¹Kae fiafia a ia ki a latou kola e ava ki a ia, Pela foki mo latou kola e tali'tonu i tena alofa tumau.

¹²Ielusalema viki atu ki te Aliki! Siona, viki atu ki tou Atua!

¹³E tausi ne ia ou mataloa ke malosi; E fakamanuia foki ne ia ou tino.

¹⁴E tausi ne ia a tuakoi o tou fa'kai ke saogalemu, Kae fagai ne ia koutou ke makona ki saito e sili i te lei.

¹⁵E fai tena fakatonuga ki te lalolagi, Ka ko ana muna kona e fai, e fakataunu fakavave eiloa.

¹⁶E fola ne ia te kiona pela me se pulagiketi, Kae fakasalalau ne ia te sau moko e pela me se pefu.

¹⁷Ne faka'to mai ne ia te vaiua aisa e pela me ne kilikili; E seai se tino e mafai o ola i te 'moko tela ne tuku mai ne ia!

¹⁸Ne toe fai mai tena fakatonuga, ko te mea eiloa ko liu vai te aisa; Ne fakaagi mai ne ia te matagi, ko tafe mai ei te vai.

¹⁹E fai tena fakatonuga ki tena fenua, Ko ana fakatonuga mo tulafono ki a Isalaelu.

²⁰E seki fai ne ia te mea nei mō nisi malo; Me e se iloa ne latou ana tulafono. Viki atu koutou ki te Aliki!