Read Te Tusi Tapu I Te Gana Tuvalu Lomiga Lua SALAMO 17 Bible Online

SALAMO 17 - Te Tusi Tapu I Te Gana Tuvalu Lomiga Lua bible

SALAMO 17

¹[18] Te Aliki, fakalogo mai ki taku fakatagi mō se fai mea tonu; Saga mai foki ki taku kalaga atu mō se fesoasoani! Fakalogo mai ki taku talo mo toku loto katoatoa.

²Ke fai tau fakamasinoga mo te alofa ki a au, Me e iloa ne koe te mea tonu.

³E iloa ne koe toku loto. E asiasi mai koe ki au i te po. Ko oti ne sukesuke faka'lei ne koe au, Kae seki maua ne koe ne manatu masei i a au.

⁴Au e se faipati ki mea ma'sei e pela mo nisi tino; Au ne fakalogo ki au fakatonuga, Kae seki tau tali ki auala fakasaua.

⁵Au ne sasale faeloa i tou auala, Kae seki piko eiloa keatea.

⁶Te Atua, au e talo atu ki a koe i a koe e tali mai ki a au; Tela la, saga mai kae fakalogo mai ki aku muna.

⁷Fakaasi mai tou alofa gali kae fakasao mai matou; Ko te pili o matou ki a koe e 'sao ei matou mai omotou fili.

⁸Puipui mai au e pela eiloa mo tau puipuiga ki ou mata; Faka'muni aka au mai lalo ifo o ou kapakau,

⁹i taimi e faitaua mai ei oku fili ki a au. A au ko nikoi ne fili fakamataku;

¹⁰E seai se alofa i a latou, kae masani o fai'pati fakamata'mata.

¹¹Konei e fakatamilo ne latou a au, O kilokilo ki se avanoaga e ta ei au.

¹²E pela latou me ne leona e fakatalitali ki a au ke saesae likiliki ne latou au.

¹³Te Aliki, vau o teke atu oku fili kae fakatakavale latou! Fakasao mai au ki tau pelu mai tino ma'sei;

¹⁴Fakasao mai au mai i a latou kola e maumea i te olaga nei. Fakasala atu latou ki mea faigata kola ne fakatoka ne koe mō latou; Ke oko atu foki te fakasalaga ki olotou tama mo tama a olotou tama!

¹⁵Ka ko au e onoono atu faeloa ki a koe me i a au e amiotonu; Kafai e ala ake au, ko tou fakatasi mai e faka'fonu ne ia au i te fiafia.