Read Te Tusi Tapu I Te Gana Tuvalu Lomiga Lua SALAMO 18 Bible Online

SALAMO 18 - Te Tusi Tapu I Te Gana Tuvalu Lomiga Lua bible

SALAMO 18

¹[19] Te Aliki, ko oko eiloa toku alofa ki a koe! A koe ko toku lafiga.

²A te Aliki ko toku 'pui A ia foki ko toku olo malosi. A toku Atua ko toku 'pui e sao ei au. E puipui ne ia a au e pela me se talita; E faka'malu ne ia au kae tausi mai foki ke sao au.

³Au e kalaga atu ki te Aliki Ko fakasao ei ne ia au mai oku fili. Ke vikia te Aliki!

⁴A te fakamataku o te mate ko i oku feitu katoa; A te puapuaga ko 'fati pela me ne galu i luga i a au.

⁵A te fakamataku o te mate ko nikoi mai i a au; Mo te tanuga foki ko toka tena malei mo oku.

⁶I taimi o oku puapuaga ne kalaga ei au ki te Aliki; Ne kalaga au ki toku Atua ke fesoasoani mai. Ne lagona ne ia toku leo i loto i tena faletapu; Ne lagona foki ne ia taku tagi mo se fesoasoani.

⁷Tela, ne galulu te lalolagi kae gasuesue; Ne pena foki fakavae o mauga, ne gasue'sue kae ma'taku Me i te Atua ko kaitaua!

⁸Ne 'pusa mai te au mai ona puisu, Ne vau foki te afi mo te malala 'ka mai tena gutu.

⁹Ne 'vae ne ia a te lagi kae vau ki lalo Mo te kaumana pouli i lalo i ona vae.

¹⁰Ne eva makini a ia i te manu fai kapakau; Ne malaga a ia i luga i kapakau o te matagi;

¹¹E ufi tena foitino ki te pouliga; A kaumana matolutolu kae 'fonu i vai, e nikoi ia.

¹²A vaiua fatu mo uilaafi e o'mai mai te uila i ona mua Kae ulu i loto i kaumana pouli.

¹³Tena ne pakalaga mai te Aliki mai te lagi; Lagona ei ne latou te leo o ia tela e tafasili i te Maluga.[20]

¹⁴Ne sana mai ne ia ana matasana, 'tele valevale ei ona fili, Atuli ei ne ia latou ki lapalapaga o uila.

¹⁵Te Aliki, te takele papa o te moana ko takato fakasau, A fakavae foki o te lalolagi ko 'tu aliali fua mai i te taimi ne vao ei ne koe ou fili, Kae kalaga ki ei mo te kaitaua.

¹⁶Ne 'kapa ifo a lima o te Aliki mai te lagi o puke ake au; Ne avake ne ia a au mai te moana 'poko.

¹⁷Ne fakasao ne ia au mai oku fili ma'losi, Pela foki mai tino katoa kola e ita mai ki a au, Kola e silia atu te olotou ma'losi i a au.

¹⁸Ne faitaua mai latou ki a au, i te taimi ne puapuagatia ei au; Ka ko te Aliki ne puipui ne ia a au.

¹⁹Au ne fakasao ne te Aliki i taimi o puapuaga; Ne fakasao ne ia a au me e fiafia ki a au.

²⁰Ne maua ne au te taui 'lei mai te Aliki me i a au e amiotonu; Ne fakamanuia ne ia au me i a au se tino e amio 'ma.

²¹Ne tausi ne au a tulafono a te Aliki; A au e seki fuli keatea mai i toku Atua.

²²Au ne tausi ki ana tulafono katoa; Ne fakalogo foki au ki ana fakatonuga katoa.

²³E iloa ne ia i a au e fai mea tonu, Kae se fiafia foki ki te masei.

²⁴Tena te mea ko maua ei ne au te taui 'lei e tusa mo taku amiotonu, Me e iloa ne ia i a au e amio 'ma.

²⁵Te Aliki, a koe a fakamaoni ki a latou kola e fakamaoni ki a koe; Kae katoatoa foki tou 'lei ki a latou kola e amio'tonu.

²⁶E amio 'ma koe ki a latou kola e amio 'ma, Kae se fiafia foki koe ki a latou kola e amio ma'sei.

²⁷E faka'sao ne koe a latou kola e loto malalo, Kae fai ne koe ke malalo a latou kola e loto fakamaualuga.

²⁸Te Aliki, e aumai ne koe te mainaga ki a au, Kae ave keatea te pouliga mai i a au.

²⁹E tuku mai ne koe te malosi ki a au, E mafai ei ne au o fakatakavale oku fili, Ke oko foki ki te pukega olotou olo.

³⁰A te Atua tenei, e 'lei katoatoa ana faiga, E fakatuagagina ana muna! A ia e pela me se talita Mo latou katoa kola e salasala atu ki tena tausiga.

³¹A te Aliki ko ia eiloa te Atua e tokotasi; Ko ia foki eiloa te motou lafiga.

³²Ko ia ko te Atua tela ne maua mai ei toku malosi, E fakatoka foki ne ia te auala e sao ei au.

³³ E fakama'losi ne ia oku vae pela mo vae o te manu ko te tia; E tausi ne ia au i luga o mauga.

³⁴E fakaakoako ne ia au ki faiga o taua, Tena ko mafai ei ne au o fakaaoga te kausana tafasili i te malosi.

³⁵Te Aliki, ne puipui kae fakasao ne koe au; Ko tau tausiga ko fai ei au mo se tino maluga, Ka ko tou malosi e maua ei ne au te filemu.

³⁶Ne tausi ne koe ke se puke fakapagota au ne tino, Kae ne seki maua eiloa au ne latou.

³⁷E atuli ne au oku fili kae ne maua atu latou; E seki liakina eiloa ne au ke oko eiloa ki te taimi e fakatakavale ei latou ne au.

³⁸E 'ta fatifati ne au latou ki lalo, kae ko se maua ne latou o 'tu ki luga; Ko taka'vale ka ko tafola fua latou i lalo o oku vae.

³⁹E tuku mai ne koe ki a au te malosi i taimi o te taua mo te manumalo foki i luga i oku fili.

⁴⁰Ne fai ne koe oku fili ke tele keatea mai i a au; E fakamasei ne au a latou kola e ita mai ki a au.

⁴¹E 'tagi latou mō se fesoasoani, Kae seai se tino e fakasao ne ia latou; E ka'laga latou ki te Aliki, kae se tali mai a ia.

⁴²E tukipala ne au a latou, Ko pau ei latou pela me ne pefu e agina keatea i te matagi. E lakalaka ne au a latou pela mo ne pela i auala.

⁴³E faka'sao ne koe au mai tino fakakinau, Kae fai foki au mo pule i luga i fenua; A tino e seki iloa ne au ko i lalo nei o taku pulega.

⁴⁴E ifo mai ki a au a tino o fenua fakaatea; i taimi e lagona ei ne latou toku leo, e faka'logo ki ei.

⁴⁵Ko seai se malosi i a latou, Ka ko ma'futa mai latou keatea mai olotou olo mo te ma'taku.

⁴⁶E ola te Aliki! Tavae atu ki toku lafiga! Takutaku atu te sili o te Atua tela ne fakasao ne ia a au.

⁴⁷Ko aumai ne ia ki a au te manumalo i luga i oku fili; Ko fakaofo foki ne ia a malo mai lalo o taku pulega,

⁴⁸Kae fakasao ne ia au mai oku fili. Te Aliki, ko koe eiloa e maua ei ne au te manumalo i oku fili, Kae puipui foki au mai lima o tino fakasaua.

⁴⁹ Tela la, ka tavae atu au ki a koe i mua o malo; Ka usu atu foki ne au ou vikiga.

⁵⁰E tuku atu ne te Atua a te manumalo ki tena tupu; E fakaasi atu foki tena alofa tumau ki a ia tela ne filifili ne ia, Ko Tavita mo tena fanau ki te se gata mai.