Read Te Tusi Tapu I Te Gana Tuvalu Lomiga Lua SALAMO 21 Bible Online

SALAMO 21 - Te Tusi Tapu I Te Gana Tuvalu Lomiga Lua bible

SALAMO 21

¹[25] Te Aliki, ko fiafia te tupu ona ko te malosi ko maua ne ia mai i a koe; Ko 'fonu a ia i te fiafia me ne fai ne koe a ia ke manumalo.

²Ne tuku atu ne koe ki a ia te mea e manako a ia ki ei, Ne tali foki koe ki ana fakatagi.

³Ne vau koe ki a ia mo fakamanuiaga e uke, Kae tuku ne koe te foualiki aulo ki tena ulu.

⁴Ne fakatagi atu a ia ki a koe ke maua te ola, Kae ne tuku atu ne koe ki a ia te ola e tumau ki te se gata mai.

⁵Ko oko eiloa te lasi o tena 'malu ona ko tou fesoasoani; Ko oti foki ne avatu ne koe te 'malu fakatupu mo te takutakua ki a ia.

⁶Au fakamanuiaga ko i luga i a ia ki te se gata mai, Kae 'fonu a ia i te fiafia ona ko tou fakatasi mo ia.

⁷Ne fakatuaga te tupu ki te Aliki Tafasili i te Malosi; Ka maua ne ia te filemu Ona ko te alofa tumau o te Aliki.

⁸Ka puke ne te tupu ona fili katoa; Ka fakapagota ne ia a latou katoa kola e ita mai ki a ia.

⁹Ka 'ta fakapalele ne ia a latou e pela mo se afi 'ka ulaula, Manafai e oko mai a ia. Ka folo latou ne te Aliki i te taimi e kaitaua ei a ia, Kae ka 'sunu fakapalele latou i te afi.

¹⁰Ka seai se tino i te gafa o latou ka 'sao Me ka tamate katoa latou ne te tupu.

¹¹E fai ne latou a aofaga mo togafiti ma'sei ki a ia, Kae ka se taunu.

¹²Ka sana ne ia latou ki ana matasana, Ko latou loa ko tele keatea.

¹³Te Aliki, e viki atu matou ki a koe i a koe e malosi! Ka usu kae viki atu matou ki tou mana.