Read Te Tusi Tapu I Te Gana Tuvalu Lomiga Lua SALAMO 22 Bible Online

SALAMO 22 - Te Tusi Tapu I Te Gana Tuvalu Lomiga Lua bible

SALAMO 22

¹[26] Toku Atua, toku Atua, ai a ko tiaki mai ei au ne koe? Ne fakatagi atu au mō se fesoasoani, kae seki oko mai eiloa.

²Toku Atua, au ne kalaga atu ki a koe i te ao, Kae se tali mai eiloa koe; E kalaga atu foki au i te po, kae se maua eiloa se filemu.

³Ne fakasopo koe ke fai mo Tasi Tapu, ko ia tela e vikia ne Isalaelu.

⁴Ne fakatuaga a omotou tupuna ki a koe; Ne tali'tonu latou ki a koe, tela ne fakasao ei ne koe a latou.

⁵Ne ka'laga atu a latou ki a koe tela ne 'sao ei latou mai mea faigata; Ne tali'tonu a latou ki a koe tela ne seki fanoa'noa ei latou.

⁶Ka ko au nei, se se tino, kae se anufe fua, E fakaseaoga kae fakatakalialia ne tino!

⁷ A latou katoa kola e kilo mai ki a au, E fakatauemu mai; E fakasaesae mai olotou alelo kae lulu olotou ulu.

⁸ Olotou muna, “Ne fakalagolago koe ki te Aliki, kae ai a la seki fakaola ei ne ia koe? Kafai e alofa te Aliki ki a koe, Ai a la se fesoasoani atu ei ki a koe?”

⁹Ne tausi ne koe au i te tinae o toku matua ke oko ki taimi ne fanau mai ei au, Ne tausi foki au ne koe mai taku folikiga.

¹⁰Au ne fakalagolago ki a koe talu mai taimi ne fanau ei au, Ka ko koe ne fai faeloa mo oku Atua.

¹¹Sa fakamao keatea mo au! A mea faiga'ta konei ko 'pili mai, Kae seai se tino e fesoasoani mai.

¹²Ne nikoi au ne oku fili e tokouke pela me ne pulumakau tagata; Konei ko i oku feitu katoa, E pela mo pulumakau fe'kai mai te fenua ko Pasapa.

¹³Ne faka'maga olotou gutu pela me ne leona, E gulu kae saesae mai ne latou a au.

¹⁴Ko palele toku malosi, pela mo se suavai ko maligi ki luga i te laukele. Ko feseketaki oku sokoga ivi katoa; Toku loto ko liu suavai pela me se gako.

¹⁵Toku kakia ko malō pakupaku pela me se pefu, Mo toku alelo ko 'lave i loto i toku gutu. Ne tiaki ne koe au ke mate i luga i te laukele.

¹⁶Ne nikoi au ne te potukau ma'sei; E pela latou me se lafu kuli ko fakapilipili mai ki a au; O saesae mai oku lima mo oku vae.

¹⁷A oku ivi ko tuku faka'sau fua. Ne 'kilo mai ki a au oku fili kae 'pula 'toka mai.

¹⁸ Ne fai ne latou te vili ki oku gatu, Tufatufa ei ne latou i a latou eiloa.

¹⁹Toku Aliki, sa faka'mao mo au! Fakavave mai o fakasao au!

²⁰Fakasao mai au mai te pelu; Fakasao mai au mai kuli konei.

²¹Fakasao mai au mai leona konei; Au ko se aoga i mua o pulumakau konei.

²² Ka fakailoa atu ne au ki toku fenua au mea ne fai; Ka tavae ne au a koe i olotou maopoopoga:

²³“Tavae atu ki a ia, koutou tavini a te Aliki! Faka'malu ki a ia, koutou fanau a Iakopo! Tapuaki atu ki a ia, koutou te fenua o Isalaelu!

²⁴Ne seki tuku tiakina ne ia tino ma'tiva, kae seki puli foki i a ia olotou puapuaga; E se fakamao a ia keatea mai i a latou, Kae tali mai ki a latou i taimi e ka'laga atu ei latou mō se fesoasoani.”

²⁵Ka tavae ne au tou igoa i loto i fakapotopotoga e tusa mo au mea ne fai; Ka ofo atu ne au a taulaga ne tauto au ke ofo atu, i mua o tino kola e tapuaki ki a koe.

²⁶Ka 'kai a tino ma'tiva ki te mea e mafai ne latou o 'kai; Ka ko latou kola e o'mai ki te Aliki ka 'viki ki a ia. Ke tupu olaola foki latou ki te se gata mai!

²⁷Ka manatua ne malo katoa a te Aliki. A tino ka fuli mai ki a ia mai feitu katoa o te lalolagi; Mo itu kāiga tino katoa ka tapuaki atu ki a ia.

²⁸A te Aliki ko te tupu, kae pule foki a ia i malo katoa.

²⁹A tino fakamata'mata katoa ka ifo atu ki a ia;[27] A tino katoa e oko ki ei te mate ka ifo atu foki ki a ia.

³⁰Ka tavini ki a ia a kautama o aso mai mua; Ka takutaku atu ne tino te igoa o te Aliki ki te kautama tenei e 'tao mai ki ei.

³¹E oko atu foki ki tino kola e seki fa'nau te fakailoga penei: “Ko te Aliki ne fakaola ne ia tena fenua.”